Oho mono mo ngaa uuwanawa mokambo Konakona Omanyolo esiku kehe?

Mbela oho lesha ngaa Ombiimbeli esiku kehe netyokosha lyomokambo Konakona Omanyolo esiku kehe opo wu hedhe popepi naJehova? Ngele hasho, mbela ito vulu okutameka okukala ho shi ningi? Oyendji ohaya lesha enyolo lyesiku ethimbo lyongula, opo ya vule oku ka tedhatedha kulyo sho taya longo iilonga yawo momukokomoko gwesiku. (Jos 1:8, NW; Eps 119:97) Ongiini to vulu oku mona mo uuwanawa owundji menyolo lyesiku? Lesha ontopolwa ayihe moka mwa za ovelise ndjoka, wu mone kutya oshike tashi popiwa mo. Kambadhala okudhiladhila kehokololo lilwe mOmbiimbeli ndyoka lya kwatela mo ekotampango ndyoka li li movelise ndjoka, e to tula ekotampango ndyoka miilonga. Ngele oho ningi omatokolo gi ikolelela kOohapu dhaKalunga, otadhi ke ku wilika monkalamwenyo yoye notadhi ke ku etela lela uuwanawa. — Eps 119:105.

Aabetel muuyuni awuhe ohaya lesha enyolo lyesiku ye li pamwe pethimbo sho taya li oshuumbululwa. Momimvo opo dha piti, odhindji dhomoonkundathana ndhika odha kala hadhi tulwa kotiivi yetu yoJW moshitopolwa OOPOLOHALAMA NIININGWANIMA. Uunake wa li wa tala ishewe yimwe yomoonkundathana ndhoka? Otashi vulika yimwe yomiipopiwa mbyoka oyo lela wa pumbwa. Pashiholelwa, ehokololo lyaLot otali vulu ngiini oku ku kwathela uuna to ningi omatokolo?

TALA OKAVIDIO INAMU KALA MU HOLE UUYUNI (1Joh 2:15), E TO YAMUKULA OMAPULO NGAKA:

• Oonkundathana dhenyolo lyesiku ndika odha li dhi ikolelela kekotampango lini?

• Ehokololo lyaLot otali ulike ngiini kutya osha nika oshiponga okukala tu hole uuyuni nenge iinima ayihe yamo? — Gen 13:12; 14:12; 19:3, 12, 13, 24-26

• Ongiini tatu vulu okuulika kutya otu hole Jehova, ihe hauyuni niinima yamo?