Ondjokana oshinima tashi kalelele

Oondjokana dhopaKriste ndhoka tadhi shi enditha nawa, ohadhi simanekitha Jehova, naaihokani ohaya kala mo lela ya nyanyukwa. (Mark 10:9) Aakriste oye na okukala metsokumwe nomakotampango gOmbiimbeli, uuna taya hogolola ookuume kopandjokana, opo oondjokana dhawo dhi kalelele noya kale mo ya nyanyukwa.

Oshi li pandunge, ngele omwe endelathana konima ngele “mwa piti methimbo lyokamukondapweyu” (NW), ano ethimbo ndyoka omahalo gopamilalo haga kala ge na oonkondo nohashi kala oshidhigu okuninga omatokolo ge li mondjila. (1Kor 7:36) Oshi li pandunge wu longithe ethimbo ndyoka kuu li mondjokana, wu koleke ekwatathano lyoye naKalunga nowu kokeke omaukwatya gopaKriste. Shoka otashi ke ku kwathela wu vule oku shi enditha nawa, ngele wa yi mondjokana.

Manga inoo ya mondjokana, kambadhala okutseya nawa ‘uuntu womeni’ womuntu ngoka to endelathana naye. (1Pet 3:4) Ngele owa mono mo iikala tayi limbilike momuntu ngoka, yi kundathana naye. Ngaashi owala omakwatathano galwe gopantu, nomondjokana owa tegelelika wu pitithe oompumbwe dhakuume koye kopandjokana komeho yoompumbwe dhoye. (Fil 2:3, 4) Ngele owa tula miilonga omakotampango gOmbiimbeli, manga inoo ya mondjokana, otashi ka kala oshipu okutsikila oku shi ninga nokonima ngele mwa hokana, notamu ka kala mo mwa nyanyukwa.

TALA OKAVIDIO ILONGEKIDHILA ONDJOKANA — OSHITOPOLWA 3: ‘YALULA KUTYA OTAYI PULA SHI THIKE PENI’ E TO YAMUKULA OMAPULO NGAKA:

• Ekwatathano lyomumwameme naShane olya li ngiini?

• Omumwameme okwa ndhindhilike shike mokweendela ko kwethimbo?

• Aavali ye oya li ye mu kwathele ngiini, netokolo lini lyopandunge a li a ningi?