ONKALAMWENYO YOPAKRISTE
Koleka eitaalo lyoye mOohapu dhaKalunga
Oohapu dhaKalunga otadhi vulu okulundulula onkalamwenyo yetu. (Heb 4:12) Nonando ongawo, otatu vulu owala okumona mo uuwanawa mudho, ngele otwa kala twa tompwa kutya odhi li shili “oohapu dhaKalunga.” (1Tes 2:13) Ongiini tatu vulu okukoleka eitaalo lyetu mOmbiimbeli?
Kala ho lesha oovelise dhontumba mOmbiimbeli esiku kehe. Sho to lesha, tala kuumbangi mboka tawu ulike kutya Jehova oye Omunyoli gwayo. Pashiholelwa, konakona omayele ngoka ge li membo lyOmayeletumbulo, e to tala nkene taga vulu oku tu kwathela nokunena. — Omayel 13:20; 14:30.
Kala ho ningi ekonakono lyopaumwene. Tseya omanyolo ngoka taga gandja uumbangi kutya Ombiimbeli oya nwethwa mo. MEmbo lyokukonga uuyelele lyOonzapo dhaJehova, tala kohi yoshipalanyolo “Ombiimbeli,” e to yi mpoka pwa nyolwa “Oya nyolithwa kuKalunga.” Oto vulu wo okukoleka eitaalo lyoye kutya etumwalaka lyOmbiimbeli inali lunduluka, mokukonakona uuyelele mboka wu li mo-Appendix A3 yOmbiimbeli yo-New World Translation.
TALA OKAVIDIO OMOLWASHIKE TU NA EITAALO . . . MOOHAPU DHAKALUNGA, E TO YAMUKULA OMAPULO NGAKA:
Ekuma lyotempeli ndyoka lya li lya monika moKarnak muEgipiti, olya koleke ngiini kutya Oohapu dhaKalunga odhi li paushili?
Otu shi shi ngiini kutya etumwalaka lyOmbiimbeli inali lunduluka?
Ongiini okukala po kwOmbiimbeli sigo okunena, taku ulike kutya oyi li shili Oohapu dhaKalunga? — Lesha Jesaja 40:8