Owe shi tseya ngaa?

Elenga lyokuEtiopia olya li mosheenditho sha fa peni, sho Filippus e ya kulyo?

OSHITYA shoka sha tolokwa “etemba” mOmbiimbeli otashi vulu okuukitha komatemba ga yoolokathana. (Iil. 8:28, 29, 38) Ihe osha fa shi li ngeyi kutya Omuetiopia ngoka okwa li mosheenditho oshinene shi vule etembakwiita, nenge etemba lyokuninga omathigathanopo. Tala kutya omolwashike tatu tile ngawo.

Omuetiopia ngoka okwa li elenga ekuluntu, ndyoka lya li lya enda oshinano oshile. “Omulumentu nguka okwa li elenga enene nomudhiginini gweliko lyaKandake, omukwaniilwa omukiintu gwaEtiopia.” (Iil. 8:27) Etiopia shonale osha kwatela mo Sudan shokunena nosho wo oshitopolwa shokuumbugantu waEgipiti shokunena. Nonando otashi vulika omulumentu ngoka a li a ende miiyenditho ya yoolokathana, oku na okukala a li e na oondongelwa, oshoka ondjila oya li onde. Iiyenditho yokweenda aantu mbyoka ya li hayi longithwa methelemumvo lyotango, oya li ya kwatela mo omatemba gomagulu gane ge na uutala womunzile. Embo Acts — An Exegetical Commentary olya ti: “Omatemba ngoka oga li haga vulu okuhumbata oondongelwa odhindji, aantu haya ende mo ya manguluka nohaga kwathele aantu ya ende iinano iile.”

Omuetiopia ngoka okwa adhika ta lesha sho Filippus e ya kuye. Ombiimbeli otayi ti kutya “Filippus okwa matukile ketemba noku uvu, elenga tali lesha membo lyomuhunganeki Jesaja.” (Iil. 8:30) Omatemba gokweenda aantu kaga li ge na ondapo. Molwaashoka oga li haga ende kashona, elenga olya li tali vulu okweenda tali lesha, naashoka osha li sha kwathele wo Filippus a vule okwaadha etemba ndyoka ta ende kolupadhi.

Omuetiopia ngoka okwa “ithana Filippus, a londe metemba ye a kuutumbe pamwe naye.” (Iil. 8:31) Momatemba gomathigathanopo aantu ohaya ende mo ya thikama. Ihe mwaandyoka lyokweenda aantu omwa li mu na ehala lya gwana lyokukuutumba elenga nosho wo Filippus.

Metsokumwe naashoka tashi popiwa mIilonga ontopolwa 8 nosho wo nuuyelele wulwe wopandjokonona, omathimbo opo ga zi ko iileshomwa yetu oya li ya ulike omathano gelenga lyokuEtiopia lya londa metemba enene, li vule uutemba mboka wa li hawu longithwa miita nenge momathigathanopo.