Ontopolwa 14

Oolye Taa Yi mEgulu, nOmolwashike?

1. Aantu oyendji otaa ka yamukula ngiini kepulo, Oolye taa yi megulu, nomolwashike?

AANTU OYENDJI otaa ti: ‘Aantu ayehe aawanawa otaa yi megulu.’ Ihe ngele yo taa pulwa molwashike yo taa yi megulu, otashi vulika taa ti: ‘Omolwoku ka kala puKalunga,’ nenge, ‘Osho ondjambi kwaangoka ta longo uuwanawa.’ Ombimbeli otayi longo ngiini kwaashino?

2, 3. (a) Omolwashike tatu vulu okwiinekela shili kutya aantu yamwe otaa ka ya megulu? (b) Epulo lini po li na okuyamukulwa?

² Ombimbeli otayi holola sha yela kutya Jesus okwa yumudhwa kuusi nokwa londo a yi megulu. Otayi ti wo kutya aantu yamwe oya li taa ka falwa hwiya. Uusiku mboka wa tetekele eso lye, Jesus okwa lombwele aayapostoli ye aadhiginini: “Megumbo lyaTate omu na omahala ogendji, ando kakwa li ngeyi, andola tandi mú lombwele, tandi ke mú longela eha. Nonando tandi yi, ndi ke mú longele eha, otandi galuka notandi mú ile, mu kale wo nkoka ndi li.”—Johannes 14:1-3.

³ Osha yela kutya Jesus okwa lombwele aayapostoli ye kutya oya li taa ka falwa megulu ya ka kale puye. Olundji omuyapostoli Paulus okwa hololele Aakriste yotango kombinga yetegameno ndyoka ekumithi. Pashiholelwa, ye okwa nyola: “Uukwashilongo wetu otu u na megulu, moka twa tegelela mo Omuwa Jesus Kristus, e tu hupithe.” (Aafilippi 3:20, 21; Aaroma 6:5; 2 Aakorinto 5:1, 2) Omolwomauvaneko ngoka, aantu omamiliyona oye na edhiladhilo okuya megulu. Ihe aantu ayehe aawanawa otaa ka ya tuu megulu?

AANTU AYEHE AAWANAWA OTAA YI MEGULU?

4, 5. Euliko lini po li li po kutya David naJob inaa ya megulu?

⁴ Okathimbo konima sho Jesus a yumudhwa kuusi, omuyapostoli Petrus okwa lombwele ongundu yAajuda: “Kuku David, oye okwa si nokwa fumvikwa, nonena ndjika ombila ye oyi li mokati ketu. . . . Oshoka David mwene ina londa megulu.” (Iilonga 2:29, 34) Ano David omulumentu omwaanawa ina ya megulu. Ongiini kombinga yomulumentu omuyuki Job?

⁵ Omanga a li te ehamekwa, Job okwa galikana kuKalunga: “Ando ongoye to ka pungula ndje muusi, nowa holeke ndje, ndongo ondjahi yoye ya lota, noto lombwele ndje sigo uunake, ngu u dhimbulukwe ndje ihe.” Job okwa li a tegelela kutya konima yeso lye ota ka lala mombila kee shi sha. Okwa li e shi shi kutya ye ita yi megulu. Ihe okwa li e na etegameno, ngaashi ye e shi yelitha: “Omuntu nge ta si, ota ka yumuka we e na omwenyo? Ongame ando nda hala okwiidhidhimikila omasiku golugodhi [ethimbo lyu uthwa mombila], ndongo okuyakulwa kwandje taku adha ndje. Ongoye ando to ithana, ongame notandi ku yamukule andola.”—Job 14:13-15.

6, 7. (a) Oshike tashi holola kutya kapu na gumwe ngoka a sa komeho gaKristus a yi megulu? (b) Oshike tashi ka ningilwa aadhiginini ayehe mboka ya sa komeho gaKristus?

⁶ Johannes, ngoka a ninginitha Jesus, naye wo okwa li omulumentu omwaanawa. Ihe nando ongaaka, Jesus okwa ti: “Oonguka omushuushuka gwomoshilongo shomegulu oye e mu vule.” (Mateus 11:11) Shika osho lela molwashoka Johannes Omuninginithi ita ka ya megulu. Sho Jesus a li kombanda yevi, oomvula dhi vule 4 000 konima yoshipotha shaAdam naEva, ye okwa ti: “Kape na nando ogumwe a yile megulu kakele kOmuna gwOmuntu, ngoka a zi megulu.”—Johannes 3:13, OB-1986.

⁷ Onkee ano, ngaashi Jesus mwene a ti, inapu kala nando gumwe ngoka a yi megulu pethimbo lyoomvula ndhoka 4 000 dhondjokonona yaantu sigo tuu opethimbo lye. David, Job naJohannes Omuninginithi otaa ka mona eyumuko lyomwenyo gwokombanda yevi. Dhoshili, aadhiginini ayehe aalumentu naakiintu mboka ya si komeho omanga Jesus inaa sa, oya li ye na etegameno lyokukala ishewe kombanda yevi, hamegulu. Otaa ka yumudhwa okukala aapangelwa yokevi yUukwaniilwa waKalunga.—Epsalmi 72:7, 8; Iilonga 17:31.

MOLWASHIKE AADHIGININI YAMWE TAA YI MEGULU

8. Omayamukulo gomapulo geni po ge na oshilonga, nomolwashike?

⁸ Omolwashike Jesus a yi megulu? Oku na oku ka longa shike mwiya? Omayamukulo komapulo ngaka oge na oshilonga. Shika omolwashoka mboka taa yi megulu otaa ka kala ye na ombinga moshilonga shaJesus. Yo otaa yi megulu omolwelalakano tuu ndyoka.

9, 10. PaDaniel, oolye taa ka pangela mepangelo lyaKalunga kakele kaKristus?

⁹ Otwi ilongo moontopolwa dha tetekele kutya Jesus ota ka pangela kombanda yeviparadisa epe oye omukwaniilwa gwepangelo lyaKalunga lyomegulu. Nalenale omanga Jesus inee ya kevi, Embombimbeli lyaDaniel olya hunganeke kutya “omuna gwomuntu” okwa li ta ka pewa “epangelo.” “Omuna gwomuntu” oJesus Kristus. (Markus 14:41, 62) Ihe Daniel okwa tsikile ta ti: “Epangelo lye olyo epangelo lyaaluhe ndyoka itaali ka hula po, nuukwaniilwa we owo wumwe mboka itaau hanagulwa po.”—Daniel 7:13, 14, NW.

¹⁰ Ihe oshi na oshilonga okundhindhilika kutya embo lyaDaniel otali holola kutya “omuna gwomuntu” ita ka pangela owala oye awike. Ombimbeli otayi ti: “Nuukwaniilwa nepangelo . . . oya pewa oshigwana shoka osho aayapuki yOgwokombandambanda. Uukwaniilwa wawo owo uukwaniilwa waaluhe.” (Daniel 7:27, NW) Omatumbulo “oshigwana” na “uukwaniilwa wawo” otaga holola kutya yamwe otaa ka pangela pamwe naKristus mepangelo lyaKalunga.

11. Oshike tashi holola kutya aalanduli yotango yaKristus otaa ka pangela pamwe naye?

¹¹ Uusiku wahugunina mboka Jesus a li naayapostoli ye 11 aadhiginini, ye okwa holola kutya oya li ye na oku ka pangela pamwe naye mUukwaniilwa waKalunga. Ye okwe ya lombwele: “One tuu mbaka mwa kala pungame momamakelo gandje, ngame notandi mú uthile ongaashi Tate ku uthile ndje [uukwaniilwa].” (Lukas 22:28, 29, faathanitha KB.) Konima, omuyapostoli Paulus naTimoteus oya kwatelwa mo wo mehangano nenge meuvathano ndika molwUukwaniilwa. Omolwashono Paulus a nyolele Timoteus: “Ngele tatu idhidhimikeni, nena otatu ka kaleni nokupangela wo pamwe naye.” (2 Timoteus 2:12) Nomuyapostoli Johannes okwa nyola mboka taa ka “kala nokupangela evi oyo aakwaniilwa” pamwe naJesus Kristus.—Ehololo 5:9, 10, NW; 20:6.

12. Uushili uni po kombinga ‘yoluvalo’ lwaAbraham tau holola kutya Kristus ota ka kala e na aapangeli ooyakwawo?

¹² Ano aantu mboka taa yi megulu, otaa yi hwiya ya ka longe mepangelo lyomegulu lyaKalunga oyo aapangeli ooyakwawo yaKristus. Nonando Jesus oye oshilyo sha simana ‘sholuvalo’ lwu uvanekwa, Kalunga ota hogolola wo yamwe maantu ya ka pangele pamwe naJesus mUukwaniilwa. Ngawo yo otaa ningi ombinga ‘yoluvalo,’ ngaashi naanaa Ombimbeli tayi ti: “One ngele yaKristus, nena one oluvalo lwaAbraham naathigululi pauvaneko.”—Aagalati 3:16, 29; Jakob 2:5, faathanitha KB.

YANGAPI TAA YI MEGULU?

13. (a) Omolwashike uuhanona itau ka ya megulu? (b) Ongiini Jesus a hokolola okangundu hoka taka ka pewa Uukwaniilwa?

¹³ Oshoka oyo taa ka pangela evi alihe, osha yela kutya mboka taa yi megulu otaa ka kala aalanduli yaKristus mboka ya makelwa. Shika otashi ti kutya uuhanona nenge aanona aashona, mboka inaa makelwa thiluthilu pethimbo lyoomvula dhoshilonga shopakriste, itaa ka falwa megulu. (Mateus 16:24) Ihe aanona mboka ya si, oye na etegameno lyokuyumudhwa okukala nomwenyo kombanda yevi. (Johannes 5:28, 29) Ano omwaalu ngoka tagu yi megulu ogu li omushona mokuyelekanitha nongundu ndjoka tayi ka pewa omwenyo kohi yepangelo lyUukwaniilwa kombanda yevi. Jesus okwa lombwele aalongwa ye: “Ino tila, oshigunda oshishona, oshoka Ho a hala oku mú pa [uukwaniilwa].”—Lukas 12:32, faathanitha KB.

14. Omiilyo ingapi mwa thikama “oshigunda oshishona” shoka tashi yi megulu?

¹⁴ Ongundu ndjoka yaapangeli yUukwaniilwa otayi ka thikama miilyo ingapi? Oya kwatela mo owala aayapostoli naalanduli yamwe yotango yaJesus? Aawe, Ombimbeli otayi holola kutya “oshigunda oshishona” osha kwatela mo wo yamwe. MEhololo 14:1, 3 Ombimbeli otayi ti: “Ongame nonda mono, tala ihe, Onzigona [Jesus Kristus] ya thikama kondundu yaSion [yomegulu] nopamwe naye omayuvi gethele nogomilongo ne nagane, . . . oomboka ya kulilwa mo [nenge, ya kuthwa] mevi.” Ndhindhilika kutya aantu owala 144 000 ya monika kondundu yaSion yomegulu, pamwe nOnzigona, Jesus Kristus. (Aaheberi 12:22) Peha lyaashono kutya aantu ayehe aawanawa otaa yi megulu, Ombimbeli otayi holola kutya aantu 144-000 owala mboka aamakelwa naadhiginini taa falwa hwiya ya ka pangele pamwe naKristus.

MOLWASHIKE YA HOGOLOLWA OKUZA KOMBANDA YEVI?

15. Omolwashike Kalunga ta hogolola aapangeli yUukwaniilwa okuza muuntu?

¹⁵ Ihe omolwashike Kalunga ta hogolola aapangeli mbaka okuza muuntu? Omolwashike ye ite etha aayengeli ya pangele pamwe naKristus? Eeno, opo mpaka kombanda yevi mpoka uuthemba waJehova okupangela wa shongwa. Opo mpoka uudhiginini waantu kuKalunga wa tulwa memakelo kohi yepatanitho lyOndiaboli. Opo mpoka Jesus u ulike uudhiginini we wa gwanenena kuKalunga momamakelo nomwenyo gwe okwe gu gandjele ekulilo lyuuntu. Omolwashono Jehova oku utha “oshigunda oshishona” shaantu mboka ye na okupangela pamwe nOmwana gwe mUukwaniilwa womegulu, ya kuthwe kombanda yevi. Oyo mboka, kuudhiginini wawo kuKalunga, yu ulike nkene etamaneko lyOndiaboli lyiifundja sho yo ya ti kutya aantu oya kalela owala Kalunga omolwomatompelo gokwiihola mwene. Ano oshe eleka kutya Jehova ota longitha aantu mbaka sigo esimaneko lye.—Aaefeso 1:9-12.

16. Omolwashike tatu vulu okukala twa pandula sho aapangeli yUukwaniilwa ya kala kombanda yevi?

¹⁶ Dhiladhila wo nkene tashi ka kala oshiwanawa okukala naapangeli yaantu mboka ya kala ya dhiginina kuKalunga kombanda yevi, noyendji yomuyo nokuli oya gandja oomwenyo dhawo eyambo molwUukwaniilwa. (Ehololo 12:10, 11; 20:4) Aayengeli inaa kala momamakelo ga tya ngawo. Nayo inaa mona wo omaupyakadhi gopantu. Ano yo itaa ka uva ko thiluthilu nkene omuntu omulunde e uvite nomaupyakadhi ngoka aantu ye ga na. Ihe 144 000 otaa ka uva ko, molwashoka nayo wo oya li nomaupyakadhi tuu ngoka. Yamwe yomuyo oya li wo ye etha po omalongitho goonyata, noye shi shi nkene tashi vulu okukala oshidhigu oku shi ninga. (1 Aakorinto 6:9-11) Onkee ano yo otaa ka longa nohenda naakalele yawo yokombanda yevi.—Aaheberi 2:17, 18.

EGONGALO LYAKALUNGA

17. Oshitya “egongalo” otashi ulike kushike?

¹⁷ Ombimbeli otayi tu lombwele kutya Kristus oye omutse gwegongalo lyaKalunga nonokutya iilyo yalyo aapiya yaJesus. (Aaefeso 5:23, 24) Ano iitya “ongeleka” nenge “egongalo lyaKalunga,” itayi ulike nando ketungo. Ihe otayi ulike kongundu yAakriste. (1 Aakorinto 15:9) Ngashingeyi otatu popi egongalo lyAakriste ndyoka tatu kwatathana nalyo. Ngaashi naanaa tatu lesha mOmbimbeli kombinga ‘yegongalo lyomuLaodikea,’ nomontumwafo yomuyapostoli Paulus kuFilemon, kombinga ‘yegongalo lyomegumbo lye.’—Aakolossa 4:16; Filemon 2.

18. (a) Oolye taa ningi “egongalo lyaKalunga omunamwenyo”? (b) Onomatumbulo gamwe geni po Ombimbeli tayi ulike kegongalo ndika?

¹⁸ Ihe ngele Ombimbeli tayi popi kombinga ‘yegongalo lyaKalunga omunamwenyo,’ otayi ulike kongundu yu uthwa yaalanduli yaKristus. (1 Timoteus 3:15) Yo oyi ithanwa wo “egongalo lyaatango ya shangelwa megulu.” (Aaheberi 12:23) “Egongalo lyaKalunga” ndika olya thikama ano mAakriste ayehe kombanda yevi mboka ye na etegameno lyomwenyo gwomegulu. Omaantu owala 144 000 ayehe kumwe tamu ka thikama “egongalo lyaKalunga.” Nena opu na owala natango aashona yomuyo, oshihupe, kombanda yevi. Aakriste mboka ya tegelela okukala sigo aluhe kombanda yevi, oya tala ‘kegongalo lyaKalunga omunamwenyo’ ndika molwewiliko lyopambepo. Ombimbeli otayi ulike wo kegongalo ndika lyiilyo 144 000 nomatumbulo ngaashi “omufuko, omukiintu gwOnzigona,” “olutu lwaKristus,” “otempeli yaKalunga,” “Israel yaKalunga,” na “Jerusalem oshipe.”—Ehololo 21:9; Aaefeso 4:12; 1 Aakorinto 3:17; Aagalati 6:16; Ehololo 21:2.

OSHINIMA OSHIPE MOMPANGELA YAKALUNGA

19. Elongekidho epe lini po Kalunga e eta po a gwanithe ompangela ye nevi?

¹⁹ Jehova Kalunga ina lundulula ompangela ye kevi naantu mboka ye li ko, konima sho Adam a fala uuntu muulunde nomeso. Ando Kalunga okwe shi ningile, ando shika osha li sha ti kutya ye okwa nyengwa okugwanitha ompangela ye yopetameko. Ompangela ye okuza petameko oya li okukala e na oparadisa yevi alihe yu udhithwa aantu aanelago, noya kola, noshi li natango ompangela ye. Shoka owala oshipe Kalunga e eta po, osha li elongekidho lyepangelo epe li gwanithe ompangela ye. Ngaashi twa mono, Omwana gwe Jesus Kristus oye omupangeli a simana mepangelo ndika, naantu 144 000 otaa ka kuthwa muuntu ya ka pangele pamwe naye megulu.—Ehololo 7:4.

20. (a) Oolye taa ningi “egulu epe nevi epe”? (b) U na okuninga shike u kale ombinga ‘yevi epe’?

²⁰ Aapangeli mbaka megulu otaa ka ninga “egulu epe” lyonkalelo ompe yaKalunga. Ihe osha yela kutya ngele otapu ka kala aapangeli aayuki ya tya ngawo okupangela evi, opu na okukala wo mboka taa pangelwa kuyo. Ombimbeli otayi popi aantu mboka “evi epe.” (2 Petrus 3:13; Ehololo 21:1-4) Otashi ka kwatela mo Job, David naJohannes Omuninginithi—eeno, aadhiginini ayehe mboka ya li ko omanga Kristus inee ya kevi. Ihe otaku ka kala aantu oyendji mboka taa ka ninga “evi epe,” sha kwatela mo aantu mboka taa ka hupa mehulilo lyonkalelo ndjika yuukolokoshi. Oto ka kala gumwe gwoonakuhupa mbaka? Owa halelela okukala omupangelwa gwepangelo lyaKalunga? Nongele osho, opu na iipumbiwa mbyoka u na oku yi gwanitha.

[Pictures on page 121]

Aalumentu mbano aawanawa oya yi megulu?

Omukwaniilwa David

Job

Johannes Omuninginithi

[Picture on page 122]

Muusiku we wahugunina pamwe naayapostoli ye, Jesus okwa ti yo oya li taa ka pangela pamwe naye mUukwaniilwa waHe