Ontopolwa 15
Nkene Taku Ningwa Omupangelwa gwEpangelo lyaKalunga
1, 2. Oshike sha pumbiwa okuninga omupangelwa gwepangelo lyaKalunga?
OWA HALA okukala sigo aluhe kombanda yevi kohi yepangelo lyaKalunga? Kehe omuntu e na oondunge dhi li nawa ota ka tya, Eeno! Aantu otaa ka nyanyukilwa omalaleko nuuyamba omakumithi. Ihe oku ga taamba, itashi vulika owala u yeluthe oshikaha shoye e to ti: ‘Ngame onda hala okukala omupangelwa gwepangelo lyaKalunga.’ Opwa pumbiwa oshindji.
2 Pashiholelwa, natu tye owa hala okuninga omukwashilongo gwoshilongo shilwe shi ili. Nongele osho lela, ando u na okugwanitha iitegelelwa mbyoka yu uthwa kepangelo lyoshilongo shoka. Ihe tango, ando ou na okumona mo kutya iitegelelwa mbika oshike. Nosho ngawo u na okumona mo shoka Kalunga ta tegelele kwaamboka ya hala okuninga aapangelwa yepangelo lye. Opo nduno u na okugwanitha iitegelelwa mbika.
ONTSEYO OYA PUMBIWA
3. Oshitegelelwa shilwe oshini po okuninga omupangelwa gwepangelo lyaKalunga?
3 Oshitegelelwa sha simana unene okuninga omupangelwa gwepangelo lyaKalunga, osho ontseyo ‘yelaka’ lyalyo. Shika osho ondungelela shili. Omapangelo gaantu gamwe oga tegelela wo kutya aakwashilongo aape ya vule okupopya elaka lyoshilongo shawo. Eeno, “elaka” olini po ano li na okwiilongwa kwaamboka taa ka taamba omwenyo kohi yepangelo lyaKalunga?
4. “Elaka lya yogoka” olini po li na okwiilongwa koshigwana shaKalunga?
4 Tala shoka Jehova ta ti kwaashino mOohapu dhe, Ombimbeli: “Opo nduno tandi ka pa aantu elaka lya yogoka, oyo ayehe yi ithane edhina lyaJehova, opo ye mu longele epepe nepepe.” (Sefanja 3:9, NW) “Elaka lya yogoka” ndika olyo oshili yaKalunga ndjoka tayi adhika mOmbimbeli. Muulela wo wene, oyo oshili kombinga yepangelo lyUukwaniilwa waKalunga. Ano okuninga omupangelwa gwepangelo lyaKalunga, u na okwiilonga “elaka” ndika, molwokumona ontseyo yaJehova noyelongekidho lyUukwaniilwa we.—Aakolossa 1:9, 10; Omayeletumbulo 2:1-5.
5. (a) Otu na okutseya shike kombinga yepangelo lyaKalunga? (b) Otwa pumbwa ontseyo yini po okumona omwenyo gwaaluhe?
5 Nena omapangelo gaantu gamwe oga tegelela kutya mboka taa taamba uukwashilongo, ya kale ya tseya sha kombinga yondjokonona yepangelo lyawo osho wo kombinga yokulonga kwalyo. Nosho ngawo u na okutseya iinima mbyoka yokombinga yepangelo lyaKalunga ngele wa hala okuninga omupangelwa gwalyo. Ontseyo ndjika otayi vulu okufala sigo okomwenyo gwaaluhe. Megalikano kuHe, Jesus okwa ti: “Nomwenyo gwaaluhe ogwo tuu nguka, oyo ye ku tseye, ongoye Kalunga awike gwashili, naanguka we mu tuma, Jesus Kristus.”—Johannes 17:3.
6. (a) Omapulo geni po taga vulu okuyamukulwa kaapangelwa yepangelo lyaKalunga? (b) Oto vulu oku ga yamukula?
6 Ngele owa konakona oontopolwa dha tetekele dhembo ndika, nena owa mono oshindji shontseyo ndjika ya simana kwaashihe. Owe shi ninga? Oto vulu okuholola kutya owe shi ninga, mokuyamukula omapulo ngaashi taga landula: Uunake Kalunga a tumbula lwotango ompangela ye molwepangelo lyUukwaniilwa? Oolye yamwe yaapiya yaKalunga ya tegelela okukala aapangelwa yalyo yokevi? Epangelo lyaKalunga otali ka kala li na aapangeli, nenge aakwaniilwa, yangapi? Aakwaniilwa mbaka otaa ka pangela ye li peni? Oolye ishewe yotango ya hogololwa okukala aakwaniilwa mepangelo lyaKalunga? Ongiini Jesus u ulike kutya ye ota ka kala omukwaniilwa omwaanawa? Ihe okuninga omupangelwa gwepangelo lyaKalunga, omuntu okwa tegelelelwa oshindji shi vulithe owala ontseyo yalyo.
EIHUMBATO LYU UKA OLYA TEGELELWA
7. Iitegelelwa yomapangelo gaantu kuukwashilongo oya yooloka ngiini?
7 Nena omapangelo otaga tegelele kutya aakwashilongo aape ya gwanithe omuthika gwontumba gweihumbato. Pashiholelwa, otashi vulika taa ti kutya omulumentu e na okukala owala e na omukiintu gumwe nomukiintu omulumentu gumwe owala. Ihe omapangelo gamwe gi ili oge na oompango dhimwe dhi ili. Yo otaa pitika aakwashilongo yawo ya kale nookuume yopandjokana ye vulithe pugumwe. Eihumbato lini po lya tegelelelwa aantu mboka ya hala okuninga aapangelwa yepangelo lyaKalunga? Kalunga ota ti oshike sho opala moshinima shondjokana?
8. (a) Omuthika gwaKalunga kondjokana oshike? (b) Eyonondjokana oshike, naKalunga ota ti ngiini kombinga yalyo?
8 Pontsapo Jehova okwa tula po omuthika kondjokana sho a pe Adam omukiintu gumwe awike. Kalunga okwa ti: “Omulumentu onkee ota thigi po he nayina nota ka kwatakana nomukiintu gwe, oyo [noya] tya onyama, ontumba—yimwe.” (Genesis 2:21-24) Jesus okwa yelitha kutya osho omuthika gu uka kAakriste. (Mateus 19:4-6) Oshoka ookuume yopandjokana otaa ningi “onyama yimwe,” otaa shundula ondjokana ngele taa lala nagumwe i ili. Shika osha lukwa eyonondjokana, naKalunga ota ti kutya ota ka pangula aayonindjokana.—Aaheberi 13:4; Malakia 3:5.
9. (a) Ongiini Kalunga ha tala ko elalathano pokati kaantu mboka inaaya hokanathana? (b) Oluhondelo oshike?
9 Kombinga yimwe, ooyaali oyendji oye li pamwe notaa lalathana, pwaa na ondjokana. Ihe Kalunga ina dhiladhila nando kutya ekwatathano ndika lyopothingo pokati komulumentu nomukiintu li kale onkalo yeimakelo. Ano ekalo lyopamwe pwaa na ondjokana, osho uulunde kuKalunga, ngoka a tula po elongekidho lyondjokana. Shika osha lukwa oluhondelo. Oluhondelo olwo okukala nagumwe ngoka inaamu hokana naye. Ihe Ombimbeli otayi ti: “Ehalo lyaKalunga olyo ndika, . . . mu yande oluhondelo.” (1 Aatessalonika 4:3-5) Ano epuko ngele omuntu inaa hokana ta lala nagumwe.
10. Omalongitho gamwe ogeni po goluhondelo ge li eteyo lyoompango dhaKalunga?
10 Nena aalumentu naakiintu otaa lala naantu yuunshitwe wumwe—aalumentu naalumentu, aakiintu naakiintu. Aantu ya tya ngaaka oya lukwa omashenge. Oolumwe omashenge omakiintu oga lukwa aaholi yiipala. Ihe Oohapu dhaKalunga otadhi ti kutya iinima mbyoka haa ningi oyo epuko, “iihuna.” (Aaroma 1:26, 27) Niishewe, osho eyono lyompango yaKalunga ngele omuntu ta lala noshimuna. (Levitikus 18:23) Kehe gumwe ngoka a hala okukala kohi yepangelo lyaKalunga, e na okuyanda omalongitho ngoka gonyata.
11. (a) Ongiini Kalunga ha tala ko elongitho lyiikolitha? (b) Omalongitho geni po ge li oshiponga kuukolele ge na okuyandwa kwaamboka ya hala okukala aapangelwa yepangelo lyaKalunga?
11 Omuntu ita yono ompango yaKalunga ngele ta nu nondjele omaviinu, omalovu nenge oshikunwa oshikolithi. Dhoshili, Ombimbeli otayi holola kutya omaviinu omashona otaga vulu okukala go opala molwuukolele womuntu. (Epsalmi 104:15; 1 Timoteus 5:23) Ihe osho eyono lyompango yaKalunga ngele omuntu ta kolwa nenge ti itula miituthi moka aantu ye na omikalo dha nyata. (Aaefeso 5:18; 1 Petrus 4:3, 4) Kakele kiikolitha, nena aantu oyendji otaa longitha iingangamithi yi ili noyi ili ya kolwe nenge ya ndjange. Natango, oyendji otaa hili epangwe nenge omakaya molweinyanyudho, omanga yamwe taa taasina omahuku gobetel nenge omafo gokoka. Ihe iinima mbika ohayi nyateke omalutu gawo nohayi yono po uukolele wawo. Ano ngele wa hala okukala omupangelwa gwepangelo lyaKalunga, u na okuyanda iinima mbika yiihuna.—2 Aakorinto 7:1.
12. (a) Omalongitho kaage shi guuyuki ogeni po ge li eteyo lyoompango dhaKalunga? (b) Ongiini omuntu ngoka ta longo iinima mbika ta vulu okumona ezimino lyaKalunga?
12 Oshi iwetikile kutya omapangelo gaantu inaga hala aakwashilongo aape aalongi yomuyonena. Nonokuli Jehova oku na omithika dhopombanda. Ye ota tegelele tu ende ‘nuuyuki miinima ayihe.’ (Aaheberi 13:18) Ngele aantu itaa dhiginine oompango dhaKalunga, itaa ka pitikilwa okukala kohi yUukwaniilwa we. Nena aantu olundji otayi ifethitha aayuki, omanga haa yono oompango odhindji. Ihe Kalunga oku wete ayihe. Hagumwe ta vulu oku mu fundjaleka. (Aaheberi 4:13; Omayeletumbulo 15:3; Aagalati 6:7, 8) Ano Jehova ota ka sa oshimpwiyu opo aantu mboka haa yono oompango dhe, ngaashi ndhoka tadhi kondjitha iifundja neyako, yaa ka ninge aapangelwa yepangelo lye. (Aaefeso 4:25, 28; Ehololo 21:8) Ihe nando ongaaka, Kalunga omutalanteni noha dhimine po. Onkee ano Kalunga ota taamba ko omulongi gwuuwinayi ngele te etha po omalongitho ge guuwinayi nokutameka okulonga uuwanawa.—Jesaja 55:7.
13. Ongiini aakalele yaKalunga ye na okutala ko oompango dhomapangelo gaantu?
13 Ongiini kombinga yedhiginino lyoompango dhomapangelo gaantu? Omanga omapangelo gaantu ge li po, Kalunga ota pumbwa aakalele ye ya kale taa vulika ‘kaapangeli mboka ye li po.’ Oompale odhi na okugandjwa, nando oompale odhi kale dha londa nomuntu oku kale ina zimina omukalo ngoka oompale hadhi longithwa. Opu na wo okuvulikwa koompango dhoshilongo. (Aaroma 13:1, 7; Titus 3:1) Kakele owala mwaashoka ngele evuliko kompango tali ningitha omuntu a taaguluke oompango dhaKalunga. Mwaashono, otu na okuninga ngaashi Petrus naayapostoli ooyakwawo ya ti: “Okuvulika kuKalunga ku vule okuvulika kaantu.”—Iilonga 5:29.
14. Ongiini tatu vulu okuholola kutya natse wo otatu tala ko ondilo yomwenyo ngaashi Kalunga?
14 KuKalunga omwenyo ogwo oshinima shi na ondilo lela. Mboka ya hala okuninga aapangelwa yepangelo lye, ye na oku shi uva ko. Edhipago olyo naanaa eteyo lyompango yaKalunga. Ihe olundji uutondwe ohau fala sigo omedhipago, nonokuli ngele gumwe ta tsikile okutonda omuntu omukwawo, ye ita vulu okukala omupangelwa gwepangelo lyaKalunga. (1 Johannes 3:15) Onkee ano osha pumbiwa shili okuninga ngaashi Ombimbeli tayi ti muJesaja 2:4, hakukuthila ooyakwetu iilwitho. Oohapu dhaKalunga otadhi holola kutya nokuli nomwenyo gwokanona hoka natango inaaka valwa ke li moshivalelo shayina, ogu na ondilo kuJehova. (Eksodus 21:22, 23; Epsalmi 127:3) Nonando ongaaka, omumvo kehe ohapu ikuthwa omala omamiliyona. Eyonopo ndika lyomwenyo olyo eteyo lyompango yaKalunga, molwashoka omuntu mela lyayina oye omuntu omunamwenyo noke na okuyonwa po.
15. Omalombwelo geni po gOmukwaniilwa gwaKalunga aapangelwa yUukwaniilwa ayehe ye na okuvulika kugo?
15 Inashi gwana kutya mboka ya hala okuninga aapangelwa yepangelo lyaKalunga yaa ninge owala iinima ya puka nenge ya nyata. Yo ye na okukondja shili okuningila yalwe iinima iiwanawa noyokwaaihola mwene. Yo ye na okukala pampango yetilokalunga ndjoka ya tulwa po kOmukwaniilwa, Jesus Kristus: “Shaa shoka mwa hala, aantu ye mu ningile, osho ya ningileni wo.” (Mateus 7:12) Kristus okwa tula po oshiholelwa mokuulikila yalwe ohole. Nokuli okwa gandjele uuntu omwenyo gwe, nokwa lombwele aalanduli ye: “Mu holathane, ngaashi nda kala ndi mú hole.” (Johannes 13:34; 1 Johannes 3:16) Oyo ohole yoludhi nduka lwokwaaihola mwene noyesiloshimpwiyu lyayamwe ndjoka tayi ka nyanyudha shili omwenyo kohi yUukwaniilwa waKalunga.—Jakob 2:8.
16, 17. (a) Omatompelo omawanawa ogeni po tu ga na okweeta po omalunduluko tu gwanithe iitegelelwa yaKalunga? (b) Omolwashike tatu vulu okukala nuushili kutya otatu vulu okweeta po omalunduluko ga pumbiwa?
16 Ombimbeli otayi hokolola kutya aantu ye na okweeta po omalunduluko monkalamwenyo yawo okugwanitha iitegelelwa molwokuninga aapangelwa yepangelo lyaKalunga. (Aaefeso 4:20-24) Oho longo ngaa okweeta po omalunduluko ngaka? Oshe eleka u shi longe noonkondo adhihe! Omolwashike? Omolwashoka itashi ka tya kutya oto ka kala owala oomvula dhimwe u li hwepo kohi yepangelo lyomuntu. Aawe, ihe oto ka taamba omwenyo gwaaluhe muundjolowele wa gwanenena meviparadisa kohi yepangelo lyaKalunga!
17 Nokuli ngashingeyi, ngele to gwanitha iitegelelwa yaKalunga, oto ka kala nonkalamwenyo yelago. Ihe u na okweeta po omalunduluko. Aantu oyendjiyendji mboka ya li aatondadhi nenge aanalwiho, oya lunduluka nale. Naahondeli, aayonindjokana, omashenge, oonkolwe, aadhipagi, aafuthi, aapika yiingangamithi naalongithi yomakaya oya lundulula nale omikalo dhonkalamwenyo yawo. Oye shi ninga mokukondja shili nokekwatho lyaKalunga. (1 Aakorinto 6:9-11; Aakolossa 3:5-9) Ano ngele u na okweeta po omalunduluko omanene okugwanitha iitegelelwa yaKalunga, ino teka omukumo. Ngoye oto vulu oku shi ninga!
UUDHIGININI KEPANGELO LYAKALUNGA
18. Ongiini Kalunga a tegelela tse tu holole eambidhidho lyetu nuudhiginini kUukwaniilwa we?
18 Itashi tu kumitha kutya Jehova Kalunga ota tegelele aapangelwa ye ya ambidhidhe nuudhiginini epangelo lyUukwaniilwa we. Omapangelo gaantu oga tegelela wo sha faathana kaakwashilongo yago. Ihe omomukalo guni po gwi ili Kalunga a hala tu gandje eambidhidho lyetu nuudhiginini? Omokukutha iilwitho nokukondjela Uukwaniilwa we? Aawe. Ihe, ngaashi Jesus Kristus naalanduli ye yotango, yo ye na okukala aahumbati yoohapu nenge aauvithi yUukwaniilwa waKalunga. (Mateus 4:17, KB; 10:5-7, KB; 24:14, KB) Osho ehalo lyaJehova ayehe ya tseye kutya Uukwaniilwa we oshike nonkene tau ka kandula po omaupyakadhi guuntu. Owa hokololela ngaa nale aanegumbo lyoye, ookuume koye nayamwe kombinga yiinima mbika wi ilongo mOohapu dhaKalunga? Osho ehalo lyaKalunga u shi ninge.—Aaroma 10:10; 1 Petrus 3:15.
19. (a) Omolwashike tatu vulu okutegelela epataneko ngele tatu popi nayamwe kombinga yUukwaniilwa waKalunga? (b) Omapulo geni po u na oku ga yamukula?
19 Kristus naalanduli ye yotango oya li ya pumbwa omukumo okupopya nayamwe kombinga yUukwaniilwa, molwashoka olundji oya patanekwa. (Iilonga 5:41, 42) Osho wo shi li ngeyi nena. Uuyuni mbuka tau pangelwa kOndiaboli inau hala onkundana ombwanawa yUukwaniilwa yu uvithwe. Ano omapulo ogo: Owa gama peni? Oto ka ambidhidha nuudhiginini Uukwaniilwa waKalunga? Shika osho ehalo lye kutya uunzapo uunene wUukwaniilwa u gandjwe omanga ehulilo inaali ya. Oto ka kala u na mo ombinga?
[Picture on page 128]
Mboka taa ningi aapangelwa yepangelo lyaKalunga, ye na okukala nontseyo yalyo
[Pictures on page 131]
Aapangelwa yepangelo lyaKalunga ye na okuyanda iilonga mbyoka ya pangulwa kuKalunga
[Picture on page 133]
Aapangelwa yepangelo lyaKalunga ye na oku li hokololela yalwe