Ontopolwa 27

Nkene Taku Monika Ekwatho mEgalikano

1. Ekwatho lini po twa pumbwa kuKalunga, nongiini tatu li taamba?

OKUKONDJITHA enwethomo ewinayi lyuuyuni, Aakriste oya pumbwa unene ekwatho ndyoka tali monika megalikano. Jesus okwa ti: “Ho yeni yomegulu ta gandja Ombepo Ondjapuki kumboka taye mu indile.” (Lukas 11:13) Otwa pumbwa ombepo ondjapuki nenge oonkondo dhokulonga dhaKalunga ngaashi naanaa twa pumbwa ontseyo yOohapu dhe neendathano nehangano lye. Ihe okutaamba ombepo ondjapuki, otu na okugalikana molwayo.

2. (a) Egalikano oshike? (b) Egalikano otali vulu okukala momalupe geni po? (c) Omolwashike egalikano lya simana?

² Egalikano olyo esimanekopopyo naKalunga. Otali vulu okukala molupe lweindilo, ngaashi uuna tatu pula Kalunga sha. Ihe egalikano otali vulu wo okukala ehololo lyepandulo nenge lyehambelelo kuKalunga. (1 Ondjalulahokololo 29:10-13) Okukala nekwatathano ewanawa naTate yetu gwomegulu, otu na okupopya naye aluhe megalikano. (Aaroma 12:12; Aaefeso 6:18) Oonkondo dhe dhokulonga, ndhoka hatu mono ngele tatu dhi pula, otadhi vulu oku tu koleka okulonga ehalo lye nando pu na omaupyakadhi nenge omamakelo ngono Satana nenge uuyuni we hau tu etele.—1 Aakorinto 10:13; Aaefeso 3:20.

3. (a) Oonkondo dhini po tatu vulu oku dhi mona kuKalunga? (b) Ongiini owala tatu vulu okudhiginina ekwatathano ewanawa naKalunga?

³ Otashi vulika ho kondjo ekondjo enene okumanguluka kondjigilile nenge kelongitho ndyono ihaali opalele Kalunga. Pula ano ekwatho kuJehova. Hedha kuye megalikano. Omuyapostoli Paulus okwe shi ningi, nokwa nyola: “Ayihe otandi yi vulu munguka ta koleke ndje.” (Aafilippi 4:13; Epsalmi 55:23; 121:1, 2) Omukiintu nguka e etha po onkalamwenyo yokwaanomikalo, okwa ti: “Oye awike gumwe ngoka e na oonkondo oku ku kwatha okuza monkalo ndjono. Ou na okukala shili u na ekwatathano ndyoka lyopaumwene naJehova, nomukalo awike gwokudhiginina ekwatathano ndyono lyopaumwene ogwo egalikano.”

4. Omulumentu gumwe oonkondo dhokweetha po okuhila omakaya okwe dhi mono ngiini?

⁴ Ihe ngiika gumwe ota ti: ‘Onda galikana nale olundji kuKalunga molwekwatho, ihe natango itandi vulu okweetha po okulonga iinima ya puka.’ Aahili yomakaya olundji osho haa ti. Sho omulumentu a tya ngeyi a pulwa: “Uunake ho galikana?” ye okwa yamukula: “Ongulohi omanga inaandi ka lala, ongula uuna opo nda penduka, nokonima ngele ndi igandja e tandi hili omakaya, ohandi lombwele Jehova kutya ondu uvite ohenda kwaashono nda ningi.” Kuume ke okwa ti: “Ethimbo wa pumbwa ekwatho lyaKalunga halyo ethimbo uuna wa yelutha oshikaha shoye okukutha omakaya? Olyo ethimbo uuna wa pumbwa okugalikana kuJehova e ku koleke.” Sho tuu omulumentu e shi ningi, ye okwa mona ekwatho okweetha po okuhila omakaya.

5. (a) Oshike sha pumbiwa okulongela Kalunga nawanawa? (b) Oshike tashi holola kutya olundji opu na eehameko uuna omuntu te etha po omikalo dhuulunde?

⁵ Itashi ti kutya egalikano kuKalunga, nopamwe nekonakono lyOohapu dhe neendathano nehangano lye li wetike, otashi ke ku pupalela okulonga shono shu uka. Otashi pumbwa natango eitulomo; eeno, ekondjo edhigu ndyono nokuli tali vulu okukwatela mo eehameko. (1 Aakorinto 9:27) Omikalo omiwinayi otadhi vulu okufala sigo omehalo enene kiinima mbyoka ya puka. Omolwashoka olundji hashi eta eehameko uuna omuntu te etha po omikalo dhuulunde. Owi ilongekidha tuu okweehamekwa okulonga shoka shu uka?—1 Petrus 2:20, 21.

OMAGALIKANO NGOKA KALUNGA HU UVU

6. (a) Omolwashike oyendji haa mono oshidhigu okugalikana? (b) Otwa pumbwa shike ngele twa hala Kalunga u uve omagalikano getu?

⁶ Aantu oyendji ohaa mono oshidhigu okugalikana. “Ohandi mono oshidhigu okugalikana kugumwe ngoka ihandi vulu okumona,” osho omukiintu omugundjuka a zimine. Molwashoka kapu na omuntu a mono Kalunga, otwa pumbwa eitaalo okugalikana nokuuvika kuKalunga. Otu na okwiitaala kutya Kalunga oko e li shili nokutya ye ota vulu okuninga shoka tatu pula. (Aaheberi 11:6) Ngele tu na eitaalo lyoludhi ndono, nohatu hedha kuKalunga nomutima gu uka, otatu vulu okwiinekela kwaashono kutya ye ote ke tu kwatha. (Markus 9:23) Omolwashoka Kalunga u uvu elenga lyAaroma Kornelius sho lya galikana muuyuki molwewiliko, nando pethimbo ndyono kalya li oshitopolwa shehangano lyaKalunga.—Iilonga 10:30-33.

7. (a) Omagalikano goludhi luni po taga opalele Kalunga? (b) Okomagalikano goludhi luni po Kalunga itaa pulakene?

⁷ Aantu yamwe ohaa mono oshidhigu okupititha mo omadhiladhilo gawo moohapu. Ihe shino kashi na oku ya keelela okugalikana kuKalunga. Otatu vulu okukala nuushili mwaashono kutya ye oku shi oompumbwe dhetu odhini nota ka uva ko shono twa hala okutya. (Mateus 6:8) Dhiladhila kashona: Ehololo lyolupandu lini po ho nyanyukilwa unene komunona—iyaloo ye yowala yu uka nenge iitya yi ili mbyono a longwa kugumwe okupopya? NaTate yetu megulu oha nyanyukilwa sha faathana omahololo gowala nogu uka okuza kutse. (Jakob 4:6; Lukas 18:9-14) Haohapu dhi ili nenge elaka lyelongelokalunga lya pumbiwa. Ye ita ka uva nokuli mbono taa galikana melaka li ikalekelwa nenge mbono haa kala nokweendulula mokupopya iinima tuu yimwe momukalo inagu uka.—Mateus 6:5, 7.

8. (a) Oshike tashi holola kutya Kalunga ota vulu okuuva omagalikano ngono ga ningwa meimweneneno? (b) Ombimbeli otayi holola mbela kutya tse otu na okugalikana momukalo gwontumba nenge mehala lyontumba?

⁸ Nokuli ngele to galikana neimweneneno, Kalunga ota vulu okuuva ko. Shino Nehemia sho e shi ningi, Kalunga okwa longo paindilo lye lyu uka, nosho ngaaka naHanna wo. (Nehemia 2:4-8; 1 Samuel 1:11-13, 19, 20) Niishewe omukalo gwolutu lwomuntu ngele ta galikana hagwo oshinima sha simana. Oto vulu okugalikana momukalo kehe, pethimbo kehe nopehala kehe. Ihe Ombimbeli otayi holola kutya omukalo gweifupipiko, ngaashi okusizimaneka omutse nenge okutsa oongolo, ogwa gwana. (1 Aakwaniilwa 8:54; Nehemia 8:6; Daniel 6:10; Markus 11:25; Johannes 11:41) NaJesus oku ulike kutya oshiwanawa okuninga egalikano lyopaumwene pehala li ikalela mpono aantu itaa vulu oku ku mona.—Mateus 6:6.

9. (a) Okulye omagalikano getu agehe ge na okuukithwa, nomolwashike? (b) Omedhina lyalye tu na okugalikana ngele twa hala omagalikano getu ga kale ga taambwa ko kuKalunga?

⁹ Omagalikano ogo oshitopolwa shokugalikana kwetu. Omolwashoka omagalikano getu ge na okuukithwa owala kOmushiti gwetu, Jehova Kalunga, hakugumwe i ili. (Mateus 4:10) NOmbimbeli otayi holola kutya Aakriste oye na okuhedha kuKalunga tashi pitile muJesus, ngono a gandja omwenyo gwe okukutha po oondjo dhetu. Otashi ti kutya omagalikano getu oge na okuningwa medhina lyaJesus.—Johannes 14:6, 14; 16:23; Aaefeso 5:20; 1 Johannes 2:1, 2.

10. (a) Omagalikano goolye ihaaga opalele Kalunga? (b) Oshitegelelwa shopekota shini po tu na okugwanitha ngele twa hala Kalunga u uve omagalikano getu?

¹⁰ Ihe omagalikano agehe ohaga opalele Jehova? Ombimbeli otayi ti: “Onakwiipilameneka po okutsi kwe kee uve ko ompango, negalikano lye wo iihuna.” (Omayeletumbulo 28:9; 15:29; Jesaja 1:15) Ano ngele twa hala Kalunga u uve omagalikano getu, osho oshitegelelwa shopekota kutya tu longe ehalo lye, kutya tu vulike koompango dhe. Ngele hasho, Kalunga ite ke tu uva, ngaashi naanaa omuntu omuyuki ita ka pulakena koprograma yoradio ndjono a tala ko kutya oyo okwaanomikalo. Ombimbeli otayi ti: “Noshaa shoka tatu shi indile, otatu shi pewa kuye, oshoka otse hatu dhiginine iipango ye nohatu longo shono she mu opalele.”—1 Johannes 3:22.

11. Otashi ti shike okweetha iilonga yetu i tse kumwe nomagalikano getu?

¹¹ Otashi ti kutya iilonga yetu oyi na okutsa kumwe nomagalikano getu. Pashiholelwa, otashi kala epuko komuntu okupula Kalunga ekwatho okweetha po okuhila omakaya nenge epangwe ihe e ta yi a ka lande iinima mbino. Ita vulu wo okupula Jehova e mu kwathe okwiiyageka okwaanomikalo nopo ihe ta ka lesha iinyolomwa nokutala kookino nokooradiomuzizimbe ndhono hadhi thindi okwaanomikalo. Nenge ngele uunkundi womuntu owo okundombola, ita vulu okugalikana kuKalunga e mu kwathe okweetha po nopo nduno ta yi komahala gomathigathanopo nenge kugamwe gi ili hono haku ndombolwa. Ngele twa hala Kalunga u uve omagalikano getu, otu na oku mu ulukila miilonga yetu kutya otu shi shi shili shoka tatu ti.

12. (a) Oshike tatu vulu okukwatela mo momagalikano getu? (b) Otu na okutseya shike ngele twa hala omagalikano getu ga kale taga opalele Kalunga?

¹² Ano iinima yini po yopaumwene tatu vulu oku yi kwatela mo momagalikano getu kuKalunga? Paushili, kehe tuu shoka tashi gumu ekwatathano lyetu naKalunga osho oshinima shu uka kegalikano, pashiholelwa ngaashi uukolele wetu wopalutu, osho wo eputudho lyaanona. (2 Aakwaniilwa 20:1-3; Aatokolihapu 13:8) Omuyapostoli Johannes okwa nyola: “Kashi na oshilonga kutya oshike tatu mu indile pahalo lye, ote tu uvu.” (1 Johannes 5:14, NW) Ano oshinima sha simana osho kutya omagalikano getu oge na okukala ga tsa kumwe nehalo lyaKalunga. Otashi ti kutya tango otu na okutseya shono shi li ehalo lye. (Omayeletumbulo 3:5, 6) Ngele tatu dhimbulukwa ehalo nompangela yaKalunga uuna tatu galikana, pehala owala lyokusila oshimpwiyu iinima yetu yopaumwene, ano omagalikano getu otaga ka taambwa ko kuJehova. Oshu uka kutya tu hambelele Jehova esiku kehe molwiinima iiwanawa mbyoka ta gandja.—Johannes 6:11, 23; Iilonga 14:16, 17.

13. (a) Jesus oku ulike ngiini shono shi na okutulwa komeho momagalikano getu? (b) Okombinga yiinima yimwe yini po tu na okugalikana?

¹³ Jesus okwa pe aalanduli ye oshiholelwa shegalikano oku ya ulukila oludhi lwegalikano ndyono Kalunga ta taamba ko. (Mateus 6:9-13) Egalikano ndino otali holola kutya edhina lyaKalunga, Uukwaniilwa we nelongo lyehalo lye kombanda yevi oyi na okutulwa komeho. Opo ihe tatu vulu okupula oompumbwe dhetu dhopaumwene, ngaashi iikulya yetu yesiku kehe, edhiminopo lyoondjo, nehupitho momamakelo nokomunuuwinayi, Satana Ondiaboli.

OMAGALIKANO OKUKWATHA YALWE

14. Ombimbeli otayi ulike ngiini esimano lyokugalikanena yalwe?

¹⁴ Jesus oku ulike koshiholelwa she nkene sha simana okugalikanena yalwe. (Lukas 22:32; 23:34; Johannes 17:20) Omuyapostoli Paulus okwa tseya nkene omagalikano ga tya ngawo ge na ondilo unene nolundji okwa pula yalwe ye mu galikanene. (1 Aatessalonika 5:25; 2 Aatessalonika 3:1; Aaroma 15:30) Sho a li mondholongo ye okwa nyola: “Ndi na etegelelo, otamu pewa ndje omolwomagalikaneno geni.” (Filemon 22; Aaefeso 6:18-20) Uushili kutya Paulus okwa mangululwa konima yokathimbo, otau holola uundilo womagalikano ngono ge mu ningilwa.

15. Omaindilo goludhi luni po tatu vulu okuninga molwaambono tu ya hole?

¹⁵ Paulus okwa galikanene wo yalwe omagalikano ge na ekwatho. “Onkee ano tatu mú galikanene aluhe, Kalunga ketu [e] mú tale mwo opalela eithano lye,” osho ye a nyola. (2 Aatessalonika 1:11) Nokegongalo lilwe ye okwa yelitha: “Otse tatu galikana Kalunga, mwaa ninge uuwinayi nando washa, . . . one tuu mu longe uuwanawa.” (2 Aakorinto 13:7) Osho oshiwanawa shili okulandula oshiholelwa shaPaulus nokuninga omaindilo lela molwaantu mbono tu ya hole. Eeno, oshili, “egalikano lyomuyuuki otali vulu oshindji, ngele lya shili.”—Jakob 5:13-16.

16. (a) Lungapi tu na okugalikana okumona ekwatho lya pumbiwa? (b) Omolwashike egalikano li li uuthembahenda uunene?

¹⁶ Uuna omukalele gumwe ta wilike ekonakono lyOmbimbeli, olundji ye oha pula: “Oho galikana wo tuu pomathimbo gamwe gi ili kakele pekonakono lyoye lyOmbimbeli koshiwike?” Okumona ekwatho lya pumbiwa, otu na okugalikana olundji kuKalunga. (1 Aatessalonika 5:17; Lukas 18:1-8) Ilonga okupopya naye neifupipiko ngaashi to popi nakuume omuholike nomwiinekelwa. Dhoshili, uuthembahenda uukumithi ngiini sho to vulu okugalikana kOmupangeli omusimanekwa gweshito alihe, Omuuvi gwegalikano, nokutseya kutya ye ote ku uvu!—Epsalmi 65:3.

[Picture on page 227]

Omuntu oku na okuninga shike ngele te ya memakelo okuhila omakaya—ota galikana molwekwatho nenge oti igandja kemakelo?

[Picture on page 229]

Oto galikana molwekwatho nokonima to ka vundakana neipyakidhilo ndyono wa tseya kutya otali vulu okufala sigo omuulunde?

[Picture on page 230]

Oho galikana paumwene ongoye awike, nenge ongele owala u li pamwe nayalwe?