Ontopolwa 7

Shoka Kalunga A Ningi Okuhupitha Aantu

1, 2. (a) Ongiini elenga omunethele Omuroma u uvu ko kutya Omwana gwaKalunga oye lye? (b) Omolwashike Jehova e etha Jesus a se?

POSHITEMAMVULA shimwe omutenya, konyala oomvula 2 000 dha piti, elenga omunethele Omuroma olya li lya mono aalumentu yatatu taya si eso tali uvitha omwenyo omutoye. Omukwiita ngoka okwa kala ta tala nawa unene tuu gumwe gwomuyo—Jesus Kristus. Jesus okwa li a mbambangelwa noomboha kopaala yoshiti. Egulu olya luudha pokati komutenya sho ethimbo lyokusa kwe lya hedha popepi. Sho a si, evi olya kakama nekakamo edhigu, nomukwiita okwi igidha: “Omuntu nguka okwa li shili Omuna gwaKalunga.”—Markus 15:39.

² Omwana gwaKalunga! Omukwiita nguka okwa li e li mondjila. Opo owala a adhika a mono oshiningwanima sha simana shoka inaashi ningwa ko nando onale kevi. Poompito dha tetekele, Kalunga mwene okwa tile kutya Jesus Omwana gwe omuholike. (Mateus 3:17; 17:5) Omolwashike Jehova e etha Omwana gwe a se? Omolwashoka shika osha li omukalo gwaKalunga gwokuhupitha aantu muulunde nomeso.

A HOGOLOLELWA ELALAKANO LYI IKALEKELWA

3. Omolwashike sha li she eleka opo Epona lyaKalunga li hogololwe molwelalakano lyi ikalekelwa shi na ko nasha naantu?

³ Ngaashi twi ilongo nale membo ndika, Jesus okwa kala ko nale manga kaa li omuntu. Okwi ithanwa ‘Epona’ lyaKalunga molwashoka Jehova okwe mu shiti shu ukilila. Konima yaashono Kalunga okwa longitha Jesus okushita iinima yilwe ayihe. (Johannes 3:18; Aakolossa 1:16) Jesus okwa li unene tuu e hole aantu. (Omayeletumbulo 8:30, 31) Itashi kumitha sho Jehova a hogolola Epona lye a longe nelalakano lyi ikalekelwa sho aantu ya pangulilwa eso!

4, 5. Manga Jesus inee ya kevi, Ombimbeli oya holola shike kombinga yOluvalo lwopaMessias?

⁴ Sho Kalunga a pe Adam, Eva naSatana egeelo moshikunino shaEden, okwa li a popi Omuhupithi gwomonakuyiwa e li ‘oluvalo.’ Oluvalo nduka olwa li talu ka kutha po uuwinayi uutilithi mboka Satana Ondiaboli, “eyoka ndyoka ekulu,” e eta po. Dhoshili, Oluvalo lu uvanekwa otalu ka nyanyagula Satana naayehe mboka ye mu landula.—Genesis 3:15; 1 Johannes 3:8; Ehololo 12:9.

⁵ Momathelemimvo ga piti, Kalunga okwa holola kashona nakashona oshindji kombinga yOluvalo ndoka talu ithanwa wo Messias. Ngaashi shu ulikwa momusholondondo ngoka gu li pepandja 37, omahunganeko ogendji oga gandja omauyelele kombinga yiinima oyindji yonkalamwenyo ye kombanda yevi. Pashiholelwa, okwa li e na okwiidhidhimikila okuningwa nayi okutilithi opo a gwanithe oshilonga she melalakano lyaKalunga.—Jesaja 53:3-5.

MOLWASHIKE MESSIAS A LI E NA OKUSA

6. PaDaniel 9:24-26, Messias okwa li ta ka ninga shike, nongiini?

⁶ Ehunganeko ndyoka lya nyolwa muDaniel 9:24-26 olya hunganeke kutya Messias—Omugwayekwa gwaKalunga—ota ka gwanitha elalakano enene. Okwa li e na okuya kevi opo “okwiiteka po taku hulithwa [po] ihe, noondjo tadhi ka hotekithwa oshihotekitho, [okuninga ekwatakanitho omolwomayonagulo, NW], uuyuuki waaluhe tau hololwa” sigo aluhe. Messias okwa li ta ka kutha po okupangulilwa eso kwaantu aadhiginini. Ihe okwa li te ke shi ninga ngiini? Ehunganeko otali yelitha kutya ota ka “dhipagwa.”

7. Omolwashike Aajuda ya gandja omayambo giinamwenyo, noga li ga thaneke shike?

⁷ Aaisrael yonale oya li ya tseya nawa edhiladhilo li na ko nasha nekwatakanitho lyomayonagulo. Mokulongela Kalunga kwawo kohi yOmpango ndjoka Kalunga e ya pe okupitila muMoses, oya gandja aluhe omayambo giinamwenyo. Ngaka oga dhimbulukitha oshigwana shaIsrael kutya aantu oya pumbwa sha okuninga ekwatakanitho omolwoondjo dhawo nenge oku dhi siikila. Omuyapostoli Paulus okwa kwatele kumwe ekotampango ndika komukalo nguka: ‘Kaku na edhimopo lyomayonagulo lyaa na etiko lyombinzi.’ (Aaheberi 9:22) Aakriste kaye li kohi yOmpango yaMoses niitegelelwa yayo, ngaashi omayambo. (Aaroma 10:4; Aakolossa 2:16, 17) Oya tseya wo kutya omayambo giinamwenyo itaga vulu okugandja edhiminopo lyoondjo tali kalelele nolya gwanenena. Pehala lyaashono, omayambo ngaka oga thaneke eyambo li na ondilo unene—ndyoka lyaMessias, nenge Kristus. (Aaheberi 10:4, 10; yelekanitha Aagalati 3:24.) Ihe otashi vulika to pula: ‘Osha li mbela sha pumbiwa shili opo Messias a se?’

8, 9. Iinima yi na ondilo yini Adam naEva ya kanitha, nongiini iilonga yawo ya gumu oluvalo lwawo?

⁸ Eeno, Messias okwa li e na okusa opo aantu ya vule okuhupithwa. Okuuva ko kutya omolwashike, otu na okudhiladhila ishewe kombinga yoshikunino shaEden nokukambadhala okuuva ko uuwindji waashoka Adam naEva ya kanitha sho ya tukuluthile Kalunga oshipotha. Oya li ye na etegameno lyokukala nomwenyo sigo aluhe! Ye li oyana yaKalunga, oya li wo ya nyanyukilwa ekwatathano naye shu ukilila. Ihe sho ye ekelehi epangelo lyaJehova, oya kanitha shoka ashihe noye eta uulunde neso kaantu ayehe.—Aaroma 5:12.

⁹ Aakuluntu yetu yotango oya li ya fa ya shinagula po eliko olindji noyi itula yo yene moongunga odhindji. Adam naEva oya taambekidha oongunga ndhoka koluvalo lwawo. Molwashoka inatu valwa twa gwanenena nokaatu na oondjo, kehe gumwe gwomutse oha yono nota si. Uuna tatu ehama nenge tatu popi sha tashi ehameke shoka tatu kala ando twa hala oku shi galulula, otatu mono iilanduliko yoongunga dhetu ndhoka twa thigulula—okwaagwanenena kwopantu. (Aaroma 7:21-25) Etegameno lyetu alike olyo okumonununa shoka Adam a kanitha. Ihe omwenyo gwopantu gwa gwanenena itatu vulu oku gu longela. Molwashoka aantu ayehe inaaya gwanenena ohaya yono, tse atuhe otwi ilongele eso, hamwenyo.—Aaroma 6:23.

10. Oshike sha li sha pumbiwa okukulila shoka Adam a kanitha?

¹⁰ Ihe opu na sha shoka tashi vulu mbela okuyambwa okupingena po omwenyo ngoka Adam a kanitha? Omuthikampango gwaKalunga gwuuyuuki otagu pula sha shi thike pugo, ‘omwenyo omomwenyo.’ (Eksodus 21:23) Ano omwenyo ogwa li gu na okuyambwa okufuta omwenyo ngoka gwa kana. Hamwenyo kehe owala gwa gwana. Epsalmi 49:8, 9 otali popi aantu inaaya gwanenena tali ti: “Kaku na omuntu, ta vulu okukulila omumwayina nokugandjela Kalunga iikulila molwe, oshoka iikulila yoomwenyo dhawo iidhigu unene, yo otayi [nyengana] sigo aluhe.” Ano onkalo kayi na mbela etegameno? Aawe, hasho nando.

11. (a) Oshitya “iikulila” otashi ti ngiini mOshiheberi? (b) Olye awike a li ta vulu okukulila aantu, nomolwashike?

¹¹ Melaka lyOshiheberi, oshitya “iikulila” otashi ulike komwaalu ngoka tagu futwa okukulila nakukwatwa notashi ulike wo uuthikepamwe. Omuntu owala ngoka e na omwenyo gwa gwanenena a li ta vulu okuyamba sha shi thike pwaashoka Adam a kanitha. Konima yaAdam, Jesus Kristus oye awike a valwa e li omuntu a gwanenena kombanda yevi. Onkee ano, Ombimbeli tayi ithana Jesus “Adam ngoka a hugunine” notayi tu shilipaleke kutya Kristus okwi “igandja e li iikulila yaayehe ya gwana po.” (1 Aakorinto 15:45; 1 Timoteus 2:5, 6, NW) Nonando Adam a taambekidha eso kaanona ye, uuthiga waJesus owa li omwenyo gwaaluhe. Aakorinto yoTango 15:22 otaya yelitha: “Ngaashi ayehe taa sile muAdam, nosho tuu ayehe taa ningwa aanamwenyo muKristus.” Oshe eleka ano sho Jesus ti ithanwa ‘He gwaaluhe.’—Jesaja 9:5, 6.

NKENE IIKULILA YA FUTWA

12. Uunake Jesus a ningi Messias, nonkalamwenyo yini ye a landula konima yaashono?

¹² Poshikufuthinge sho 29 E.N., Jesus okwa yile komukwanezimo lye Johannes a ka ninginithwe nomokuninga ngawo okwi igandja ye mwene okulonga ehalo lyaKalunga. Pethimbo ndyoka Jehova okwa gwayeke Jesus nombepo ondjapuki. Ano Jesus okwa ningi Messias, nenge Kristus, gumwe ngoka a gwayekwa kuKalunga. (Mateus 3:16, 17) Opo nduno Jesus okwa tameke uukalele we woomvula ndatu netata. Okwe endaenda moshilongo shaandjawo noku uvitha kombinga yUukwaniilwa waKalunga nokwa gongele aalanduli aadhiginini. Ihe ngaashi sha hunganekwa, epataneko tali mu pataneke olya tameke mbala okwiindjipala.—Epsalmi 118:22; Iilonga 4:8-11.

13. Iiningwanima yini ya tetekele eso lyaJesus e li omukakateli gwuudhiginini?

¹³ Jesus okwa tula pomutenya uufudhime waawiliki yelongelokalunga kee na uumbanda, noya kambadhala oku mu dhipaga. Hugunina oya ningi ompangela ombwinayi yomeholamo ndjoka ya kwatela mo egwaaleko, ekwato lyaa li mondjila, ompangu yaa li paveta noshipotha shomalundilo giifundja kutya ota kondjitha epangelo. Jesus okwa li a dhengwa, a hiyilwa omayeye, a yolwa nokwa dhengwa nongola ndjoka ya nuninwa okutuulagula oontumba dhe. Opo nduno omupangeli Omuroma Pontius Pilatus okwe mu pangulile eso komuti gwomahepeko. Okwa li a mbambangelwa noomboha kopaala yoshiti nokwe endjelelekwa hoka u ukilila. Omufudho kehe ogwa li tagu mu ehameke unene, nosha kutha oowili odhindji opo a se. Miihuna ayihe mbika, Jesus okwa kala a kakatela uudhiginini wa gwanenena muKalunga.

14. Omolwashike Kalunga e ethele Omwana a mone iihuna noku se?

¹⁴ Ano osha li mo 14 Nisan 33 E.N., sho Jesus a gandja omwenyo gwe gu li “iikulila yoyendji.” (Markus 10:45; 1 Timoteus 2:5, 6) Jehova okwa li a vulu okumona e li megulu nkene Omwana gwe omuholike ta mono iihuna nota si. Omolwashike Kalunga e ethele oshinima oshitilithi sha tya ngaaka shi ningwe? Okwe shi ningi molwashoka ye oku hole aantu. Jesus okwa ti: “Osho Kalunga kwa li e hole uuyuni, oye a gandja Epona lye, opo shaa ngoka e mu itaale, kaa kane, ihe a mone omwenyo gwaaluhe.” (Johannes 3:16) Eso lyaJesus otali tu longo wo kutya Jehova oye Kalunga e na uuyuuki wa gwanenena. (Deuteronomium 32:4) Yamwe ngiika otayi ipula kutya molwashike Kalunga inee etha omakotampango ge guuyuuki ngoka taga pula omwenyo omomwenyo e ta kala kee na ko nasha nofuto yokufuta ondjila yomayono gaAdam. Etompelo olyo kutya Jehova oha kala aluhe paompango dhe nohe dhi dhiginine, nokuli nando otashi mu pula oshindji.

15. Molwashoka osha li tashi ka kala ando okwaahe na uuyuuki okweetha okukala po kwaJesus ku hule po sigo aluhe, Jehova okwa ningi shike?

¹⁵ Uuyuuki waJehova owa pula wo opo eso lyaJesus li kale li na oshizemo shelago. Dhoshili, ando osha kala ngaa mbela pauyuuki ando Jesus omudhiginini okwe ethelwe a kothe sigo aluhe meso? Hasho nando! Omanyolo gOshiheberi oga hunganeke kutya omuyapuki gwaKalunga ka li ta ka kala mombila. (Epsalmi 16:10; Iilonga 13:35) Okwa lala meso konyala omasiku gatatu, nopo nduno Jehova Kalunga okwe mu yumudhile momwenyo e li omuntu gwopambepo omunankondo.—1 Petrus 3:18.

16. Jesus okwa ningi shike sho a shuna megulu?

¹⁶ Peso lye, Jesus okwa gandja omwenyo gwe gwopantu sigo aluhe. Sho a yumudhilwa momwenyo gwomegulu, okwa ningi ombepo tayi gandja omwenyo. Niishewe, sho Jesus a londo a yi mehala eyapuki elela meshito alihe, okwa hangana ishewe naHe omuholike nokomukalo gwa longekidhwa okwa gandja kuYe ongushu yomwenyo gwe gwopantu gwa gwanenena. (Aaheberi 9:23-28) Ongushu yomwenyo ngoka gu na ondilo okwa li ano tayi vulu okulongithwa molwaantu aavuliki. Shika otashi ti shike kungoye?

EKULILO LYAKRISTUS NANGOYE

17. Otatu vulu ngiini okwiimonena edhiminopo shi ikolelela kekuliloyambo lyaKristus?

¹⁷ Tala omikalo ndatu moka ekuliloyambo lyaKristus tali ku kwatha nokuli ngashingeyi. Gwotango, otali eta edhiminopo lyoondjo. Okupitila meitaalo okwiitaala mombinzi ya tika yaJesus, tse otu na “emanguluko okupitila mekulilo,” eeno, “edhiminopo lyomayonagulo getu.” (Aaefeso 1:7, NW) Ano nonando otwa yona sha kwata miiti, otatu vulu okupula Kalunga e tu dhimine po medhina lyaJesus. Ngele otwi iyela ombedhi shili, Jehova ota longitha ongushu yekuliloyambo lyOmwana omolwetu. Kalunga ohe tu dhimine po, ohe tu pe omalaleko nuuyamba okukala neiyuvo ewanawa, pehala lyoku tu pangulila egeelo lyeso ndyoka twi iyetele molwokuyona kwetu.—Iilonga 3:19; 1 Petrus 3:21.

18. Okomukalo guni eyambo lyaJesus tali tu pe etegameno?

¹⁸ Omutiyali, ekuliloyambo lyaKristus otali gandja ekankameno ketegameno lyetu lyomonakuyiwa. Memoniko, omuyapostoli Johannes okwa mono kutya “ongundu onene, ya nyenge okuyalulwa” otayi ka hupa mehulilo lyoshiponga lyonkalelo ndjika yiinima ndyoka tali ya. Omolwashike tayi ka hupa sho Kalunga ta hanagula po yalwe oyendji? Omuyengeli okwa lombwele Johannes kutya ongundu onene oya “yogo oonguwo dhawo noye dhi yelitha [mombinzi] yOnzigona,” Jesus Kristus. (Ehololo 7:9, 14) Shampa tatu kala tu na eitaalo tali longo mombinzi ya tika yaJesus Kristus notatu kala metsokumwe niitegelelwa yaKalunga, otatu ka kala twa yela momeho gaKalunga notatu ka kala tu na etegameno lyomwenyo gwaaluhe.

19. Eyambo lyaKristus otali ulike ngiini kutya ye naHe oye ku hole?

¹⁹ Omutitatu, ekuliloyambo olyo euliko lya dhenga mbanda lyohole yaJehova. Eso lyaKristus oli lile po iilonga iyali iinenenene yohole mondjokonona yeshito alihe: (1) Ohole yaKalunga mokutuma Omwana a se molwetu; (2) Ohole yaJesus mokwiigandja ye mwene nehalo ewanawa e li iikulila. (Johannes 15:13; Aaroma 5:8) Ngele tatu kala tu na shili eitaalo tali longo, ohole ndjika otayi vulu okukala yi niwe kukehe gumwe gwomutse. Omuyapostoli Paulus okwa ti: “Omuna gwaKalunga . . . e hole ndje nokwi igandja peha lyandje.”—Aagalati 2:20; Aaheberi 2:9; 1 Johannes 4:9, 10.

20. Omolwashike tu na okukala tu na eitaalo tali longo mekuliloyambo lyaJesus?

²⁰ Onkee ano, natu ulikeni olupandu lwetu molwohole ndjoka yu ulikwa kuKalunga nokuKristus mokukala tu na eitaalo tali longo mekuliloyambo lyaJesus. Okuninga ngawo otaku fala momwenyo gwaaluhe. (Johannes 3:36) Ihe ehupitho lyetu halyo etompelo lya simana unene komwenyo neso lyaJesus kombanda yevi. Aawe, okwa li e na ko nasha unene tuu nokuli nompata onenenene, ndjoka yi na ko nasha neshito alihe. Ngaashi tatu ka mona montopolwa tayi landula, ompata ndjoka otayi gumu ayehe yomutse oshoka otayi ulike molwashike Kalunga e etha uukolokoshi nokumona iihuna yi tsikile okukala po muuyuni ethimbo ele li thike mpono.

KONAKONA ONTSEYO YOYE

Omolwashike Jesus a li e na okusa opo a hupithe aantu?

Iikulila oya futwa ngiini?

Okomikalo dhini to kwathelwa kekulilo?

[Full-page picture on page 67]