Ontopolwa 9
Oshike Hashi Ningilwa Oonakusa Yetu Aaholike?
1. Aantu ohaya kala ye uvite ngiini uuna omuholike ta si?
“OMUNTU oha mono iihuna ngele omuholike gwe ta si molwashoka meso oto kanithile omuntu musha kaashi shiwike nando shoka itaashi vulu okuuviwa ko.” Shika osho omumati gumwe a popi sho a silwa he nombalambala konima yaashono oyina. Uuwehame we nomaiyuvo ge omolwokusilwa okundji oye mu uvitha kutya ye okwa “gwilililwa po pamaiyuvo.” Otashi vulika ngoye wa mona iihuna komukalo gwa faathana. Tashi vulika wa li wi ipula kutya aaholike yoye oye li peni nongele oto ke ya mona ngaa we.
2. Omapulo geni taga vundakanitha haga holoka po ge na ko nasha neso?
2 Aavali yamwe mboka ya nika oluhodhi oya li ya lombwelwa: “Kalunga oha toonona po oongala ndhoka oombwanawa unene e dhi fale megulu kuye.” Shika osho shi li ngawo mbela shili? Oonakusa yetu aaholike oya ya mbela moshilongo shoombepo? Osho mbela shoka yamwe hayi ithana Nirvana, shoka sha hokololwa osho onkalo ya lalekwa nuuyamba moka wa manguluka kuuwehame auhe nokehalo kehe? Aaholike yetu oya pita mbela mosheelo shu uka momwenyo ihaagu si moparadisa? Nenge ngaashi yamwe taya ti, eso olyo mbela okugwila mehepeko ihaali hulu po nando kwaamboka ya yematitha Kalunga? Oonakusa otaya vulu mbela okunwetha mo onkalamwenyo yetu? Opo tu mone omayamukulo goshili komapulo ga tya ngaaka, otu na okukonga omayele mOohapu dhaKalunga, Ombimbeli.
“OMBEPO” NDJOKA YI LI MAANTU OSHIKE?
3. Edhiladhilo lini Sokrates naPlato ya li ye na shi na ko nasha neso, nongiini tali nwetha mo aantu nena?
3 Aafilosofi yonale Aagreka Sokrates naPlato oya ti kutya opu na okukala sha sha thigululwa ihaashi si shi li meni lyomulumentu nomukiintu—omwenyo (mOshiingilisa, soul) ngoka tagu hupu po peso noihagu si nando shili. Nena muuyuni auhe, omamiliyona ogi itaala oshinima shika. Eitaalo ndika olundji otali pendutha uumbanda wokutila oonakusa shi thike naanaa pokukala u na ko nasha nonkalonawa yawo. Ombimbeli otayi tu longo sha shi ili unene kombinga yoonakusa.
4. (a) Genesis ote tu lombwele shike kombinga yomwenyo (soul)? (b) Kalunga okwa tula shike muAdam oku mu ninga omunamwenyo?
4 Mokukonakona onkalo yoonakusa, otu na okudhimbulukwa kutya tate yetu gwotango, Adam, ka li e na omwenyo (soul). Ye okwa li omwenyo (soul). Oshilonga shimwe oshikumithi sheshito, osha li sho Kalunga u umbu omuntu—omwenyo (soul)—okuza miinima ya simana yomevi nopo nduno okwa fudhile muye “omwenyomufudho.” Genesis 2:7 ote tu lombwele: “Omuwa Kalunga okwa kutha mo evi lyomevi nokwe li umbu omuntu nokwa fudhile momayulu ge omwenyomufudho, omuntu okwa [ningi omwenyo gu na omwenyo, KB].” Omwenyo (mOshiingilisa, life) gwaAdam ogwa li gwa kalekwa nomwenyo kokufudha. Ihe sho Kalunga a tula omwenyomufudho muAdam, osha li sha kwatela mo oshindji shaahe shi owala okufudhila ombepo momapunga gomulumentu. Ombimbeli otayi popi “oonkondo dhomwenyo” ndhoka hadhi longo miishitwa yokevi yi na omwenyo.—Genesis 7:22, NW.
5, 6. (a) “Oonkondo dhomwenyo” odho shike? (b) Oshike hashi ningwa po uuna “ombepo” ndjoka ya tumbulwa mEpsalmi 146:4 itayi kaleke we olutu nomwenyo?
5 “Oonkondo dhomwenyo” odho shike? Odho ohandje yomwenyo ndjoka Kalunga a tula molutu kaalu na omwenyo (life) lwaAdam. Oonkondo ndhika odha li nduno dha kalekwa nomwenyo komuyo gwokufudha. Ihe “ombepo” ndjoka tayi popiwa mEpsalmi 146:4 oyo shike? Ovelise ndjoka otayi popi kombinga yaangoka ta si tayi ti: “[Ombepo ye tayi zi mo, nota, NW] shuna mevi; olyo tuu esiku omadhiladhilo ge agehe ga hulu po.” Sho aanyoli yOmbimbeli ya longitha oshitya “ombepo” komukalo nguka, kaya li taya dhiladhila omwenyo kaagu na olutu ngoka tagu tsikile okukala nomwenyo konima yokusa kwolutu.
6 “Ombepo” ndjoka hayi zi momuntu peso oyo oonkondo dhomwenyo ndhoka dha zile kOmushiti gwetu. (Epsalmi 36:10; Iilonga 17:28) Oonkondo dhomwenyo ndhika kadhi na nando omaukwatya gasha goshishitwa shoka shi dhi nithe omwenyo, ngaashi naanaa olusheno kaalu na omaukwatya goshilongitho shoka hashi lu pe oonkondo. Uuna gumwe ta si, ombepo (oonkondo dhomwenyo) ihayi kaleke we oosele dholutu nomwenyo, ngaashi naanaa ihaapu kala we uuyelele uuna olusheno lwa dhimwa. Uuna oonkondo dhomwenyo itadhi kaleke we olutu lwomuntu nomwenyo, omuntu—omwenyo (soul)—ota si.—Epsalmi 104:29; Omuuvithi 12:1, 7.
‘OTO KA SHUNA MONTSI YEVI’
7. Oshike sha li tashi ka ningilwa Adam ngele okwa kala inaa vulika kuKalunga?
7 Jehova okwa yelitha sha yela shoka eso lya li tali ka tya komulunde Adam. Kalunga okwa ti: “Oshikwiila shoye u na oku shi lya wa pusha omazigudhe moshipala, ndongo to ka shunine mevi, we li fulwa mo, oshoka ongoye [ontsi yevi noto ka shuna montsi yevi, NW].” (Genesis 3:19) Adam okwa li mbela ta ka shuna peni? Omevi, montsi yevi moka a li a shitwa. Peso Adam okwa li owala itaa kala po we!
8. Ye li oomwenyo (souls), omondunge yini aantu kaaye vule iinamwenyo?
8 Moshinima shika, eso lyaantu inali yooloka ko kwaandyoka lyiinamwenyo. Yo wo oyo oomwenyo (souls), nombepo oyo tuu ndjoka, nenge oonkondo dhomwenyo, ohadhi yi kaleke nomwenyo. (Genesis 1:24, NW) MOmuuvithi 3:19, 20, omulumentu omunandunge Salomo ote tu lombwele: “Ongashika tashi si po, naangwiyaka ta si po; naayehe ye na [ombepo yi, NW] thike pamwe. [Meso] aantu kaye na shoka tashi ya lunditha iimuna . . . Ayehe ya zilila montsi yevi naayehe otaa ka [shuna] montsi [yevi].” Omuntu oku vule iimuna mondunge kutya ye okwa shitwa oshifetha shaKalunga notu ulike omaukwatya gaJehova. (Genesis 1:26, 27) Ihe peso aantu nosho wo iinamwenyo ohaya shuna montsi yevi.
9. Oonakusa oye li monkalo ya tya ngiini, nopeni haya yi?
9 Salomo okwa yelitha natango shoka eso tali ti mokutya: “Aanamwenyo oye na owino, oyo ye na okusa po, ihe oonakusa kaye shi sha.” Eeno, oonakusa kaye shi sha nando. Omolwashoka Salomo a ladhipike: “Shaa shoka oshikaha shoye tashi vulu kulonga, shi longitha, oshoka kamu na we oshilonga nenge owino nenge oondunge omuusi [Sheol, NW] to ka ya mo.” (Omuuvithi 9:5, 10) Oonakusa ohaya yi peni? OmoSheol (Oshiheberi, sheʼohlʹ), ombila yaantu ayehe. Oonakusa yetu aaholike kaye shi sha. Yo itaya mono iihuna, noitaya vulu nando oku tu nwetha mo.
10. Omolwashike tatu vulu okutya kutya inashi pumbiwa opo eso li kale olyo ehulilo?
10 Tse atuhe naaholike yetu otu na mbela okukala nomwenyo oomvula oonshona owala nopo nduno itatu kala po we sigo aluhe? PaMbimbeli, hasho. Sho Adam a ningi oshipotha, Jehova Kalunga okwa ningi po mbalambala omalongekidho okukutha po iilanduliko iitilithi yuulunde waantu. Eso kalya li oshitopolwa shelalakano lyaKalunga kaantu. (Hesekiel 33:11; 2 Petrus 3:9) Onkee ano inashi pumbiwa opo eso li kale ehulilo lyetu nolyaaholike yetu.
“OKWA KOTHA”
11. Jesus okwa hokolola ngiini onkalo yakuume ke Lasarus ngoka a sa?
11 Osho elalakano lyaJehova oku tu hupitha tse naaholike yetu meso lyopaAdam. Onkee ano, Oohapu dhaKalunga tadhi popi kutya oonakusa oya kotha. Pashiholelwa, sho Jesus Kristus u uvu kutya kuume ke Lasarus okwa sa, okwa lombwele aalongwa Ye: “Lasarus, kuume ketu, okwa kotha, ihe ongame tandi yi, ndi ke mu penduthe.” Molwashoka aalongwa inayu uva ko nziya oohapu ndhika kutya otadhi ti ngiini, Jesus okwa popi shu ukilila: “Lasarus okwa si.” (Johannes 11:11, 14) Opo nduno Jesus okwa yi koshilando shaBetania, hoka aamwayina yaLasarus Marta naMaria ya li taya lili eso lyomumwayinamati. Sho Jesus a lombwele Marta: “Omumwanyoko ota yumuka,” Marta okwa popi eitaalo lye melalakano lyaKalunga okukutha po iilanduliko mbyoka eso lye etele aantu. Okwa ti: “Ondi shi shi, ota yumuka meyumuko esiku lyahugunina.”—Johannes 11:23, 24.
12. Etegameno lini nakusilwa Marta a li e na shi na ko nasha noonakusa?
12 Marta ina popya nando omwenyo ihaagu si hagu tsikile okukala shaampoka konima yeso. Ye ini itaala kutya Lasarus okwa ya nale moshilongo shoombepo shontumba okutsikila nokukala po kwe. Marta okwa li e na eitaalo metegameno ekumithi lyeyumuko okuyumuka kuusi. Ka li u uva ko kutya omwenyo ihaagu si ogwa thigi po olutu lwaLasarus, ihe okutya omumwayinamati omuholike ke po we. Eyumuko lyomumwayinamati olyo tali ka kala ekandulopo lyaashoka.
13. Oonkondo dha gandjwa kuKalunga dhini Jesus e na, nongiini u ulike oonkondo ndhika?
13 Jesus Kristus oye ngoka a pewa oonkondo kuJehova Kalunga okukulila aantu. (Hosea 13:14) Omolwashono Jesus, mokuyamukula epopyo lyaMarta, a ti: “Ongame eyumuko nomwenyo; oongoka i itaala ndje, oye ta kala e na omwenyo, nando na kale a sa.” (Johannes 11:25) Jesus oku ulike oonkondo dhe ndhoka a pewa kuKalunga moshinima shika sho a yi kombila yaLasarus, ngoka a ninga nale omasiku gane a sa, nokwe mu yumudha. (Johannes 11:38-44) Dhiladhila owala enyanyu mpoka li thike lyaamboka ya mono eyumuko ndika nenge galwe ngoka ga longwa kuJesus Kristus!—Markus 5:35-42; Lukas 7:12-16.
14. Omolwashike eyumuko itaali tsu kumwe nedhiladhilo kutya omwenyo ihaagu si?
14 Dhiladhila uule wokathimbo kwaashika: Andola okwa li omwenyo ihaagu si hagu hupu po peso, ando inashi pumbiwa opo gumwe a yumudhwe, nenge a galulilwe momwenyo. Dhoshili, itashi ka kala nando oshilonga shuunambili okuyumudha omuntu ngaashi Lasarus a galukile momwenyo inaagu gwanenena kevi ngele ye okwa li a mona nale ondjambi onkumithi yomegulu. Dhoshili, Ombimbeli ihayi longitha nando uutumbulilo “omwenyo ihaagu si.” Pehala lyaashono, Omanyolo otaga ti kutya omwenyo gwomuntu ngoka tagu yono otagu si. (Hesekiel 18:4, 20) Ano Ombimbeli otayi ulike kesiloshimpwiyu lyeyumuko li li ekandulopo lyolela lyeso.
“AYEHE MBOKA YA KALA MOOMBILADHIMBULUKO”
15. (a) Oshitya “eyumuko” otashi ti ngiini? (b) Omolwashike okuyumudha aantu itaaku ka kala okudhigu kuJehova Kalunga?
15 Oshitya shoka aalongwa yaJesus ya longitha shi na ko nasha ‘neyumuko’ otashi ti lelalela “okuyambuka po” nenge “okuthikama po.” Ndika olyo eyambukopo okuza monkalelo yeso yokwaahe na omwenyo—pathaneko, okuthikama okuza mombila yaantu ayehe. Jehova Kalunga ota vulu okuyumudha omuntu nuupu. Omolwashike? Omolwashoka Jehova oye Onzo yomwenyo. Nena aantu ohaya vulu okukwata nuungalo wovidio omawi nomathano gaalumentu naakiintu nuungalo mbuka ohau vulu okudhanwa konima yeso lyaantu mboka. Ano Omushiti gwetu omunankondo ota vulu shili okudhimbulukwa okanima kehe shi na ko nasha nomuntu kehe noku mu yumudha e li omuntu oye tuu ngoka noku mu pa olutu olupe.
16. (a) Euvaneko lini Jesus a ningi li na ko nasha naayehe mboka ye li moombiladhimbuluko? (b) Oshike tashi ku utha kutya omuntu ota ka mona eyumuko lini?
16 Jesus Kristus okwa ti: “Ethimbo tali ya, nena ayehe mboka ya kala [moombiladhimbuluko, NW], otaa uvu ewi lye [lyaJesus], e tamu holoka mo mboka ya longa uuwanawa okuyumukila omwenyo, naamboka ya longa uuwinayi okuyumukila epangulo.” (Johannes 5:28, 29) Ayehe mboka taya dhimbulukiwa kuJehova otaya ka yumudhwa notaya ka longwa oondjila dhe. Kwaamboka taya katuka taya tsu kumwe nontseyo okutseya Kalunga, otashi ka tya eyumukilo momwenyo. Ihe otapu ka kala eyumukilo mokupangulwa kwaamboka ye ekelehi omalongo gaKalunga nokupangela kwe.
17. Oolye taya ka yumudhwa?
17 Oshoshili kutya mboka ya lalakanene ondjila yuuyuuki ye li aakalele yaJehova otaya ka yumudhwa. Dhoshili, etegameno lyeyumuko olya nkondopaleke oyendji ya taalele eso, nokuli sho ya hepekwa nekuni. Yo oya li ya tseya kutya Kalunga ota vulu oku ya yumudha. (Mateus 10:28) Ihe aantu omamiliyona oya si inaayu ulika ngele oya li ngaa taya ka kala pamithikampango dhaKalunga dhuuyuuki. Yo otaya ka yumudhwa wo. Neinekelo melalakano lyaJehova shi na ko nasha naashika, omuyapostoli Paulus okwa ti: “[Ondi] na etegelelo ndyoka lyomuKalunga . . . nokutya oku na eyumuko lyaayuuki nolyaalunde.”—Iilonga 24:15.
18. (a) Omuyapostoli Johannes okwa mono emoniko lyashike li na ko nasha neyumuko? (b) Oshike tashi hanagulilwa “mefuta lyomulilo,” ‘nefuta’ ndika otali thaneke shike?
18 Omuyapostoli Johannes okwa mono emoniko linyanyudha lyaayumudhwa mboka ya thikama komeho yoshipangelapundi shaKalunga. Opo nduno Johannes okwa nyola: “Efuta olya gandja mo oonakusa yalyo, eso noshaasi [“Hades,” NW] oya gandja mo oonakusa yayo, oyo noya pangulilwa okehe tuu ngoka piilonga yawo. Eso noshaasi [“Hades,” NW] oyu umbilwa mefuta lyomulilo. Olyo eso etiyali, efuta ndi lyomulilo.” (Ehololo 20:12-14) Dhiladhila owala kwaashika! Oonakusa ayehe mboka taya dhimbulukiwa kuKalunga oye na etegameno okumanguluka moHades (Oshigreka, haiʹdes), nenge Sheol, ombila yaantu ayehe. (Epsalmi 16:10, NW; Iilonga 2:31, NW) Otaya ka kala ye na ompito okuulika tashi pitile miilonga yawo ngele otaya ka longela Kalunga. Opo nduno “eso noshaasi” otayi ku umbilwa mwaashoka hashi ithanwa ‘efuta lyomulilo,’ ndyoka tali thaneke ehanagulo lyothiluthilu, ngaashi naanaa oshitya “Gehenna” tashi thaneke. (Lukas 12:5, NW) Ombila yo yene yaantu ayehe otayi ka kala yi li owala noitayi ka kala po we uuna eyumuko lya pu. Okwiilonga mOmbimbeli kutya Kalunga iha hepeke aantu itashi hekeleke tuu!—Jeremia 7:30, 31.
EYUMUKO LYOKUYA PENI?
19. Omolwashike aantu yamwe taya ka yumukila omwenyo gwomegulu, nolutu lwa tya ngiini Kalunga te ke ya pa?
19 Omwaalu gwa ngambekwa gwaalumentu naakiintu otagu ka yumukila omwenyo gwomegulu. Ye li aakwaniilwa naasaseri pamwe naJesus, otaya ka kutha ombinga mokuhulitha po iilanduliko ayihe yeso ndyoka aantu ya thigulula komuntu gwotango, Adam. (Aaroma 5:12; Ehololo 5:9, 10) Yangapi Kalunga ta ka fala megulu oku ka pangela pamwe naKristus? PaMbimbeli, 144 000 ayeke. (Ehololo 7:4; 14:1) Jehova ota ka pa kehe gumwe gwomaayumuki mbaka olutu lwopambepo opo ya vule oku ka kala megulu.—1 Aakorinto 15:35, 38, 42-45; 1 Petrus 3:18.
20. Aantu aavuliki, mwa kwatelwa oonakuyumuka, otaya ka nyanyukilwa shike?
20 Oyendji yomwaamboka ya sa otaya ka yumukila meviparadisa. (Epsalmi 37:11, 29, OB-1986; Mateus 6:10) Etompelo limwe molwashike yamwe taya yumukile omwenyo gwomegulu olyo okugwanitha elalakano lyaKalunga li na ko nasha nevi. Jesus Kristus no 144 000 ye li megulu otaya ka galulila aantu aavuliki kashona nakashona megwaneneno ndyoka aakuluntu yetu yotango ye ekelehi. Shika otashi ka kwatela mo aayumuki, ngaashi shu ulikwa kuJesus sho a lombwele omulumentu ta si ngoka a alelwa pooha naye: “To [ka, NW] kala pamwe nangame muParadisa.”—Lukas 23:42, 43.
21. Pamuprofeti Jesaja nomuyapostoli Johannes, oshike tashi ka ningilwa eso?
21 MEviparadisa, eso, ndyoka li li nena onkalo yaa na oshilonga, otali ka kuthwa po. (Aaroma 8:19-21) Omuprofeti Jesaja okwa ti kutya Jehova Kalunga ‘ota ka hanagula po eso sigo aluhe.’ (Jesaja 25:8) Omuyapostoli Johannes oku ulikilwa emoniko lyethimbo uuna aantu aavuliki taya ka mangululwa kuuwehame neso. Eeno, “Kalunga mwene ota ka kala pamwe nayo nota ka ninga Kalunga kawo. Oye ota ka theta omahodhi agehe momeho gawo. Oko noitaku ka kala we eso, oluhodhi, [elilo] nenge uuwehame. Oshoka iikulu oya hula po.”—Ehololo 21:1-4, OB-1986.
22. Ontseyo kombinga yeyumuko otayi ku gumu ngiini?
22 Omalongo gOmbimbeli ga yela otaga kutha po epiyagano kombinga yaashoka hashi ningilwa oonakusa. Omanyolo otaga popi sha yela kutya eso olyo ‘omutondi gwahugunina’ ngoka ta ka hanagulwa po. (1 Aakorinto 15:26) Oonkondo nehekeleko oyi thike peni tatu vulu okumona montseyo okutseya etegameno lyeyumuko! Noitatu vulu tuu okukala twa nyanyukwa sho oonakusa yetu aaholike mboka taya dhimbulukiwa kuKalunga, taya ka penduka moomposi dhuusi okunyanyukilwa iinima ayihe iiwanawa mbyoka a pungulila mboka ye mu hole! (Epsalmi 145:16) Omalaleko nuuyamba ga tya ngaaka otaga ka gwanithwa okupitila mUukwaniilwa waKalunga. Ihe uunake wa li tau ka tameka okupangela? Natu shi tale.
KONAKONA ONTSEYO YOYE
Ombepo maantu oshike?
Oto hokolola ngiini onkalo yoonakusa?
Oolye taya ka yumudhwa?
[Picture on page 85]
Ngaashi naanaa Jesus i ithana mo Lasarus mombila, osho omamiliyona taga ka yumudhwa
[Picture on page 86]
Otapu ka kala enyanyu uuna ‘Kalunga ta ka hanagula po eso sigo aluhe’