Oshileshwa 1

Nkene To Vulu Okutseya Shoka Kalunga Ta Pula

Ombimbeli oyi na omayelithilo ga simana geni? (1)

Omunyoli gwOmbimbeli oye lye? (2)

Omolwashike u na okukonakona Ombimbeli? (3)

1. Ombimbeli oyo omagano ge na ondilo ga za kuKalunga. Oya fa ontumwafo ndjoka he omunahole a nyolele oyana. Otayi tu lombwele oshili kombinga yaKalunga—kutya oye lye nonokutya omithikampango dhe odho shike. Otayi yelitha nkene omaupyakadhi ge na okukandulwa po nonkene enyanyu lyashili tali vulu okumonika. Ombimbeli oyo ayike tayi tu lombwele shoka tu na okuninga opo tu nyanyudhe Kalunga.—Epsalmi 1:1-3; Jesaja 48:17, 18.

2. Ombimbeli oya nyolwa kaalumentu yi ili noyi ili 40 lwaampono uule woomvula dhi vulithe 1 600, ya tameke mo 1513 K.E.N. Oya thikama po muumbo 66. Mboka ya nyola Ombimbeli oya li ya nwethwa mo kuKalunga. Oya nyola omadhiladhilo ge, ihe hagawo yene. Onkee ano Kalunga komegulu oye Omunyoli gwOmbimbeli, ihe hamuntu gwontumba kombanda yevi.—2 Timoteus 3:16, 17; 2 Petrus 1:20, 21.

3. Kalunga okwa shilipaleke opo Ombimbeli yi nyolululwe noyi dhigininwe naanaa yi li ngaashi yi li. Opwa nyanyangidhwa Oombimbeli odhindji shi vulithe embo kehe limwe lyi ili. Hakehe gumwe ta ka nyanyukwa moku ku mona to konakona Ombimbeli, ihe ino pitika shoka shi ku imbe. Onakuyiwa yoye yaaluhe oyi ikolelela kokutseya kwoye Kalunga nokulonga ehalo lye nando ope na epataneko.—Mateus 5:10-12; Johannes 17:3.