Oshileshwa 2

Kalunga Oye Lye?

Kalunga kashili oye lye, nedhina lye olye? (1, 2)

Ye oku na olutu lwa tya ngiini? (3)

Oku na omaukwatya ga tongomana geni? (4)

Otu na mbela okulongitha iimenka nomandhindhiliko moku mu galikana? (5)

Omikalo mbali dhini moka tatu vulu okwiilonga kombinga yaKalunga? (6)

1. Aantu ohaya galikana iinima oyindji. Ihe Ombimbeli otayi tu lombwele kutya oku na owala Kalunga KASHILI gumwe awike. Ye okwa shiti iinima ayihe megulu nokombanda yevi. Molwaashono ye okwe tu pe omwenyo, Oye awike tu na okugalikana.—1 Aakorinto 8:5, 6; Ehololo 4:11.

2. Kalunga oku na omadhinasimaneko ogendji ihe oku na owala edhina limwe alike. Edhina ndyoka olyo JEHOVA. MOombimbeli odhindji, edhina lyaKalunga olya kuthwa mo nolya pingenwa po nedhinasimaneko OMUWA nenge KALUNGA. Ihe sho Ombimbeli ya nyolwa, edhina Jehova olya holoka mo iikando 7 000 lwaampono!—Eksodus 15:3; 1 Samuel 2:2, 7.

3. Jehova oku na olutu, ihe inalu fa lwetu. “Kalunga oye Ombepo,” Ombimbeli osho tayi ti. (Johannes 4:24) Ombepo oyo olupe lwomwenyo ndoka li vule unene kokule lwetu. Kapu na nando omuntu a mona Kalunga. Jehova oku li megulu, ihe oha vulu okumona iinima ayihe. (Epsalmi 11:4, 5; Johannes 1:18) Ihe ombepo ondjapuki oshike? Kayi shi omuntu ngaashi Kalunga. Pehala lyaashono, oyo oonkondo dhaKalunga tadhi longo.—Epsalmi 104:30.

4. Ombimbeli otayi tu hololele uuntu waJehova. Otayi ulike kutya omaukwatya ge ga tongomana ogo ohole, uuyuuki, uunongo noonkondo. (Deuteronomium 32:4; Job 12:13; Jesaja 40:26; 1 Johannes 4:8) Ombimbeli otayi tu lombwele kutya oye wo omunahenda, omunalukeno, omudhimipo gwoondjo, omugandji nomwiidhidhimiki. Ngaashi aanona aavuliki, tse otu na okukambadhala oku mu holela.—Aaefeso 5:1, 2.

5. Otu na mbela okwiisizimikila nenge okugalikana iimenka, omathano, nenge omandhindhiliko megalikano lyetu? Aawe! (Eksodus 20:4, 5) Jehova ota ti kutya tse otu na oku mu galikana oye awike. Ye ita topola esimano lye nakehe gumwe i ili nenge nakehe shimwe shi ili. Iimenka kayi na nando oonkondo dhasha oku tu kwathela.—Epsalmi 115:4-8; Jesaja 42:8.

6. Ongiini mbela tatu vulu okutseya Kalunga nawa? Omukalo gulwe omokutala iinima mbyoka a shita nokudhiladhila unene kombinga yaashoka tayi tu lombwele. Iinima mbyoka ya shitwa kuKalunga otayi tu ulikile kutya ye oku na oonkondo oonene nuunongo. Otatu mono ohole ye mwaashihe shoka a shiti. (Epsalmi 19:2-7(Correct in OB; Aaroma 1:20) Omukalo omukwawo moka tatu vulu okwiilonga kombinga yaKalunga omokukonakona Ombimbeli. Muyo ye ote tu lombwele oshindji unene shi na ko nasha nokutya oye Kalunga koludhi luni. Ye ote tu lombwele wo kombinga yelalakano lye naashoka a hala tu ninge.—Amos 3:7; 2 Timoteus 3:16, 17.

[Pictures on page 5]

Tse otatu ilongo kombinga yaKalunga okuza meshito nomOmbimbeli