Oshileshwa 3
Jesus Kristus Oye Lye?
Omolwashike Jesus ti ithanwa Omwana gwaKalunga “omutango”? (1)
Omolwashike ti ithanwa “Ohapu”? (1)
Omolwashike Jesus i ile kombanda yevi e li omuntu? (2-4)
Omolwashike a longo iikumithalonga? (5)
Jesus ota ka longa shike monakuyiwa yi li popepi? (6)
1. Jesus okwa li a kala megulu e li omuntu gwopambepo manga inee ya kombanda yevi. Ye okwa li eshito lyotango lyaKalunga, nonkene ti ithanwa Omwana gwaKalunga “omutango.” (Aakolossi 1:15; Ehololo 3:14) Jesus oye awike Omwana ngoka Kalunga a shiti ye mwene. Jehova okwa longitha Jesus manga inaa ninga omuntu e li “omulongi onkulungu” gwe okushita iinima ayihe yilwe yi ili megulu nokombanda yevi. (Omayeletumbulo 8:22-32, NW; Aakolossa 1:16, 17) Kalunga okwe mu longitha wo e li omupopikalelipo Gwe omunene. Omolwaashono Jesus ti ithanwa “Ohapu.”—Johannes 1:1-3; Ehololo 19:13.
2. Kalunga okwa tumu Omwana Gwe kevi mokulundululila omwenyo gwe moshivalelo shaMaria. Onkee ano Jesus ka li e na he gwopantu. Omolwaashono ye inaa thigulula uulunde nenge okwaahagwanenena kwasha. Kalunga okwa tumu Jesus kombanda yevi omolwomatompelo gatatu: (1) Oku tu longa oshili kombinga yaKalunga (Johannes 18:37), (2) okukakatela uudhiginini wa gwanenena noku tu pa oshiholelwa tu shi landule (1 Petrus 2:21), na (3) okuyamba omwenyo gwe opo e tu mangulule muulunde neso. Omolwashike mbela shika sha li sha pumbiwa?—Mateus 20:28.
3. Mokwaahavulika kelombwelo lyaKalunga, omuntu gwotango, Adam, okwa longo shoka Ombimbeli tayi shi ithana “uulunde.” Onkee ano Kalunga okwe mu pangulile eso. (Genesis 3:17-19) Ye ina kala we pamithikampango dhaKalunga, onkene ka li we a gwanenena. Kashona nakashona okwa kulupa nokwa si. Adam okwa taambekidha uulunde kaanona ye ayehe. Omolwaashono hatu kulupa wo, hatu ehama nohatu si. Ongiini mbela aantu taya vulu okuhupithwa?—Aaroma 3:23; 5:12.
4. Jesus okwa li omuntu a gwanenena naanaa ngaashi Adam. Ihe mepingathano naAdam, Jesus okwa li a vulika sha gwanenena kuKalunga nokuli nomemakelo enenenene. Onkee ano ye okwa li ta vulu okuyamba omwenyo gwe wa gwanenena gwopantu mokufuta uulunde waAdam. Shika osho tashi ulikwa kOmbimbeli shi li “iikulila.” Kungeyi oyana yaAdam oya li taya vulu okumangululwa mepangulilo lyeso. Ayehe mboka tayi itaale Jesus otaya vulu okudhiminwa po oondjo dhawo nokumona omwenyo gwaaluhe.—1 Timoteus 2:5, 6; Johannes 3:16; Aaroma 5:18, 19.
5. Sho Jesus a li kombanda yevi okwa aludha aavu, okwa kutitha aasindjala nokwa kodhitha iikungulu. Okwa yumudha nokuli aasi. Omolwashike mbela a longo iikumithalonga? (1) Ye okwa li e uvitile aantu mboka taya mono iihuna ohenda, nokwa li a hala oku ya kwathela. (2) Iikumithalonga ye oyu ulike kutya ye Omwana gwaKalunga. (3) Yo oyu ulike shoka ta ka ningila aantu aavuliki sho ta ka pangela ombanda yevi e li Omukwaniilwa.—Mateus 14:14; Markus 2:10-12; Johannes 5:28, 29.
6. Jesus okwa si nokwa yumudhwa kuKalunga e li omushitwa gwopambepo, nokwa shuna megulu. (1 Petrus 3:18) Okuza mpono, Kalunga okwe mu ningi Omukwaniilwa. Masiku Jesus ota ka kutha po uukolokoshi nokumona iihuna akuhe kombanda yevi ndika.—Epsalmi 37:9-11, OB-1986; Omayeletumbulo 2:21, 22, NW.
[Pictures on page 7]
Uukalele waJesus owa li wa kwatela mo okulonga aantu, okulonga iikumithalonga, nokuli noku tu yambela omwenyo gwe