Ontopolwa omulongo nontitano
Pulakena epukululo, taamba ko egeelo
1. (a) Omolwashike atuheni twa pumbwa epukululo nosho wo egeelo? (b) Epulo lini twa pumbwa okwiipula?
“TSENI atuheni ohatu puka olwindji,” Ombimbeli osho tayi ti muJakob 3:2. (OB-1986) Otatu vulu okudhiladhila iikando oyindji mbyoka twa li kaatu shi aantu yoludhi ndoka Oohapu dhaKalunga tadhi tu ladhipike tu kale. Onkee ano otwa zimina kutya Ombimbeli oyi li mondjila sho tayi ti: “Pulakena omayele [“epukululo,” NW], taamba eputudho [“egeelo,” NW] opo u kale omunandunge komeho.” (Omayeletumbulo 19:20, OB-1986) Kapu na omalimbililo kutya otwa ninga nale omalunduluko monkalamwenyo yetu oku yi tsitha kumwe nomalongo gOmbimbeli. Ihe ohatu inyenge mbela ngiini ngele Omukriste omukwetu te tu pe epukululo moshinima shokondandalunde?
2. Otu na okuninga shike uuna tatu pewa epukululo?
2 Yamwe ohaya kambadhala okwiiyukipalitha, okutala ko onkalo ya fa inaayi kwata miiti nenge ya pe yalwe uusama. Ihe oshi li hwepo okupulakena epukululo noku li tula miilonga. (Aaheberi 12:11) Dhoshili, kapu na gumwe e na okutegelela yalwe ya kale ya gwanenena, nenge e na okukala ha pukulula aluhe yalwe miinima iishona nenge miinima mbyoka Ombimbeli ye etha aantu ya ninge etokolo yo yene. Kakele kaashono, ngoka ta gandja epukululo, otashi vulika inaa tala kuuyelele auhe, naashoka ota vulu oku shi yelithilwa nawa nesimaneko. Ihe moonkundathana dhomuutendo tau landula, natu tye nduno epukululo nenge egeelo ndyoka lya gandjwa olye eleka nolya kankamena kOmbimbeli. Mbela omuntu oku na okwiinyenga ngiini?
Iiholelwa mbyoka tu na okudhimbulukwa uuna tatu pewa epukululo
3, 4. (a) Ombimbeli oyi na shike shoka tashi vulu oku tu kwathela tu kale hatu tala ko shi li mondjila epukululo nosho wo egeelo? (b) Omukwaniilwa Saul okwi inyenge ngiini kepukululo, noshizemo osha li shini?
3 Oohapu dhaKalunga odhi na iimoniwa ya ningwa shili yaantu mboka ya li ya pewa epukululo lya pumbiwa. Omathimbo gamwe, epukululo olya li lya gandjwa pamwe negeelo. Gumwe gwomaantu ya tya ngaaka okwa li omukwaniilwa Saul gwaIsrael. Ina vulika kelombwelo lyaJehova shi na ko nasha noshigwana shAayamaleki. Aayamaleki oya li ya pataneke aapiya yaKalunga, nepangulo lye olya li kutya Aayamaleki nenge iimuna yawo kaye na okuhupithwa. Ihe omukwaniilwa Saul okwa hupitha omukwaniilwa gwawo niimuna yawo mbyoka iiwanawa.—1 Samuel 15:1-11.
4 Jehova okwa tumu omuprofeti Samuel a ka pukulule Saul. Saul okwa li i inyenge ngiini? Okwa ti kutya okwa sinda Aayamaleki ihe okwa tokola owala okuhupitha omukwaniilwa gwawo. Ihe shoka osha li tashi tsu ompinge nelombwelo lyaJehova. (1 Samuel 15:20) Saul okwa kambadhala okupa aantu uusama molwashoka ya hupitha iimuna, a ti: “Ongame nda tila aantu nonda pitikile okuhala kwawo.” (1 Samuel 15:24) Okwa li ti ipula unene shi na ko nasha nesimano lye, nokwa pula nokuli Samuel e mu simanekithe momeho gaantu. (1 Samuel 15:30) Lwahugunina, Jehova okwe etha po Saul kaa kale we omukwaniilwa.—1 Samuel 16:1.
5. Oshike sha ningilwa omukwaniilwa Ussia sho inaa taamba ko epukululo?
5 Omukwaniilwa Ussia gwaJuda “[okwa] yonene koshipala shOmuwa, Kalunga ke, sho kwa ka ya motempeli yOmuwa, a ka tsinine kondjambelo yetsinino.” (2 Ondjalulahokololo 26:16) Aasaaseri oyo owala ya li ye na uuthemba okuninga omatsinino. Sho omusaaseri omukuluntu a kambadhala okukeelela Ussia, omukwaniilwa okwa geye. Oshike sha ningwa po? Ombimbeli otayi ti: “Uuvu wonziya we mu ya moshipala she . . . oshoka Omuwa kwe mu dhenge ngeyi. Osho ngeyi omukwaniilwa Ussia kwa kala ku na uuvu wonziya sigo esiku lyokusa kwe.”—2 Ondjalulahokololo 26:19-21.
6. (a) Omolwashike Saul naUssia ye ekelehi epukululo? (b) Omolwashike okweekelahi epukululo ku li uupyakadhi wa kwata miiti nena?
6 Omolwashike sha li oshidhigu kuSaul naUssia okutaamba ko epukululo? Uupyakadhi uunene owa li uuntsa, sho ya li tayi idhiladhila owala yo yene. Aantu oyendji ohayi iyemateke molwuukwatya mboka. Otashi vulika haya dhiladhila kutya okuzimina epukululo otaku ulike kutya oye na uunkundi wontumba nenge taku yono po edhina lyawo. Ihe uuntsa owo uunkundi. Uuntsa ohau yono po okudhiladhila kwomuntu opo e ekelehi ekwatho ndyoka a pewa kuJehova okupitila mOohapu dhe nomehangano lye. Onkee ano, Jehova ote tu londodha ta ti: “Uuntsa tau tetekele ehanagulo, einenepeko otali tetekele epunduko.”—Omayeletumbulo 16:18, OB-1986; Aaroma 12:3.
Okutaamba ko epukululo
7. Iiyilongomwa iiwanawa yini tatu vulu okwiilonga momukalo moka Moses i inyenge kepukululo?
7 Omanyolo oge na wo iiholelwa iiwanawa yaamboka ya li ya taamba ko epukululo, notatu vulu okwiilonga sha muyo. Dhiladhila kuMoses, ngoka a li a pewa epukululo kuhemweno nkene e na okuungaunga niilonga ye iidhigu. Moses okwa li a pulakene kuye nokwa ningi nziya ngaashi e mu lombwele. (Eksodus 18:13-24) Mbela omolwashike Moses a li e na ehalo okutaamba ko epukululo nonando okwa li e na oonkondopangelo oonene? Omolwashoka okwa li e na eifupipiko. “Moses okwa li omulumentu omwiifupipiki e vule aantu ayehe kombanda yevi.” (Numeri 12:3, OB-1986) Mbela eifupipiko olya simana ngiini? Sefanja 2:3 otu ulike kutya otali ti omwenyo gwetu.
8. (a) Eyono lini David a ningi? (b) David okwi inyenge ngiini kepukululo lyaNatan? (c) Iilanduliko yokuyona kwaDavid oya li yini?
8 Omukwaniilwa David okwa li a hondele naBatseba nokwa li a kambadhala oku shi holeka mokudhipagitha omusamane gwe, Uria. Jehova okwa tumu omuprofeti Natan a ka pukulule David. David okwi iyele ombedhi nokwa zimine nziyanziya ta ti: “Ongame nda yonene momeho gOmuwa.” (2 Samuel 12:13) Nonando Kalunga okwa li a taamba ko okwiiyela ombedhi kwaDavid, okwa li ta ka mona iihuna yiilanduliko mbyoka ye etithwa kokuyona kwe. Jehova okwe mu lombwele kutya egongamwele “itaali pu mo megumbo” lye, kutya aakiintu ye otaya ka gandjwa “kugulwe,” nonokutya omwana omumati kwe mu valelwa meyonondjokana okwa li e na “okusa.”—2 Samuel 12:10, 11, 14.
9. Oshike kaatu na okudhimbwa ngele tatu pewa epukululo nenge egeelo?
9 Omukwaniilwa David okwa li a tseya nkene shi li nawa okupulakena kepukululo ewanawa. Omathimbo gamwe, okwa li a pandula Kalunga molwomuntu ngoka e mu tumine oku mu pukulula. (1 Samuel 25:32-35) Mbela natse osho hatu ningi? Ngele osho, otashi ke tu keelela kaatu popye iinima oyindji noku yi longa mbyoka tayi vulu oku tu yemateka. Ihe ongiini ngele tu li monkalo ndjoka tayi tu ningi tu pukululwe nenge nokuli tu pewe egeelo? Inatu dhimbwa kutya shoka osho euliko lyohole yaJehova nomonakuyiwa otashi tu etele uuwanawa waaluhe.—Omayeletumbulo 3:11, 12; 4:13.
Omaukwatya ge na ondilo ngoka tu na okukala tu na
10. Uukwatya uni Jesus u ulike owo mboka ya hala okuya mUukwaniilwa ya pumbwa okukala ye na?
10 Ngele otwa hala okukala tu na ekwatathano ewanawa naJehova nosho wo naamwatate Aakriste, otwa pumbwa okukala tu na omaukwatya gontumba. Jesus okwa popi gamwe gomugo sho a thikameke okanona mokati kaalongwa ye nokwa ti: “Ngele itamu itedhulula notamu ningi ngaanona, kamu na mpoka tamu ka ya [muukwaniilwa wokegulu, KB]. Onkee ano, oongoka ti ifupipike ngokanona nkaka, oye omukuluntu e vule ooyakwawo [muukwaniilwa wokegulu, KB].” (Mateus 18:3, 4) Aalongwa yaJesus oya li ya pumbwa okukala ye na eifupipiko, molwashoka oya li ya tsu oompata kutya olye omukuluntu e vule ooyakwawo.—Lukas 22:24-27.
11. (a) Otwa pumbwa okukala aaifupipiki koolye, nomolwashike? (b) Otatu ki inyenga ngiini kepukululo, ngele otwi ifupipika?
11 Omuyapostoli Petrus okwa nyola ta ti: “Naamuhe mokukalathana kweni zaleni eifupipiko, oshoka Kalunga ha tondo aaholuuntsa, ihe ta sile ohenda aaneifupipiko.” (1 Petrus 5:5) Otu shi shi kutya otwa pumbwa okukala aaifupipiki koshipala shaKalunga, ihe enyolo ndika otali ulike kutya otwa pumbwa wo okukala aaifupipiki kooitaali ooyakwetu. Ngele tu li ngawo, itatu ka kwatela onkone omaetopo omawanawa ngoka yalwe taye tu pe, ihe otatu ki ilonga sha kuyo.—Omayeletumbulo 12:15.
12. (a) Uukwatya wa simana uni wa pambathana unene neifupipiko? (b) Omolwashike tu na okukala tu na ko nasha nankene eihumbato lyetu tali gumu yalwe?
12 Shoka sha pambathana thiluthilu neifupipiko osho okukala tu na ko nasha nuuwanawa wayalwe. Omuyapostoli Paulus okwa nyola a ti: “Inaku kala ngoka ta kongo uuwanawa we mwene, aawe, oombuka tuu womukwawo. . . . Onkee ano nge tamu li nenge tamu nu, nenge shaa shoka tamu shi ningi, ashihe shi ningeni okusimanekitha Kalunga. Inamu hugitha, nongele Aajuda nenge Aagreka nenge egongalo lyaKalunga.” (1 Aakorinto 10:24-33) Paulus ina tya kutya otu na okweetha po ashihe shoka tu hole, ihe okwe tu ladhipike kaatu ninge sha shoka tashi vulu okuningitha gumwe a longe shoka omaiyuvo ge tage mu lombwele kutya osha puka.
13. Oshiholelwa shini tashi vulu okuulika kutya otatu tula aluhe miilonga epukululo lyopamanyolo?
13 Mbela owa pititha komeho uuwanawa wayalwe komeho yaashoka u hole? Atuheni otu na okwiilonga oku shi ninga. Opu na omikalo odhindji moka shika tashi vulu okuningwa. Pashiholelwa, dhiladhila shi na ko nasha nokuzala nosho wo neiyopaleko. Mbika oyo iinima mbyoka ya kwatela mo omahogololo gopaumwene metsokumwe nomisindalandu dhopamanyolo dhi na ko nasha nokuzala iizalomwa yi li nawa noyi li pandjele, yuufuuli noya yogoka. Mbela oto ka ninga omalunduluko ngele owa mono kutya omukalo gwoye gwokuzala nenge gwokwiiyopaleka otagu imbi aantu yomomudhingoloko gweni molweputuko lyawo ya pulakene ketumwalaka lyUukwaniilwa? Dhoshili, osha simana noonkondo okukwathela omuntu gulwe a mone omwenyo gwaaluhe shi vulithe okwiinyanyudha mwene.
14. Omolwashike sha simana okukala u na eifupipiko nokukala u na ko nasha nayalwe?
14 Jesus okwa tula po oshiholelwa okukala omwiifupipiki nokukala e na ko nasha nayalwe. Okwa yogo nokuli oompadhi dhaalongwa ye. (Johannes 13:12-15) Oohapu dhaKalunga otadhi popi kombinga ye tadhi ti: “Omadhiladhilo geni naga fe ngeyaka gaKristus Jesus kwa li e ga na, oonguka nando olupe lwaKalunga, ina hakana, a kale a fa Kalunga, aawe, okwi ihula nokwa zala olupe lwomupika nokufaathana naantu nomokukala kwe kwa li a fa omuntu; nokwi ifupipike a vulika sigo okusa.”—Aafilippi 2:5-8; Aaroma 15:2, 3.
Ino ekelahi egeelo lyaJehova
15. (a) Omalunduluko geni twa pumbwa okuninga ngele otwa hala okukala tu na uukwatya mboka tau nyanyudha Kalunga? (b) Jehova okwe tu pukulula nokwe tu putudheni atuheni okupitila moshike?
15 Molwashoka atuheni aalunde, otwa pumbwa okuninga omalunduluko miikala yetu nomeihumbato lyetu ngele otwa hala okuulika uukwatya waKalunga ketu. Otwa pumbwa okuzala ‘omuntu omupe.’ (Aakolossa 3:5-14) Epukululo negeelo otayi tu kwathele tu mone mpoka twa pumbwa okuninga omalunduluko nopo nduno tatu tala nkene tatu vulu oku ga ninga. Onzo ya simanenena yelongo ndyoka twa pumbwa oyo Ombimbeli. (2 Timoteus 3:16, 17) Iileshomwa yOmbimbeli nokugongala ya gandjwa kehangano lyaJehova otayi tu kwathele tu ninge shoka sha popiwa mOohapu dhaKalunga. Nokuli ngele epukululo ndyoka otwe li uva nale, mbela itatu ka zimina kutya otwe li pumbwa e tatu kambadhala okuninga ehwepopalo?
16. Ekwatho lini Jehova he tu pe pauhandimwe?
16 Molwokunakonasha kwe kwopahole, Jehova ohe tu kwathele momaupyakadhi getu. Aantu omamiliyona oya kwathelwa okupitila momakonakono gOmbimbeli gopegumbo. Aavali ohaya pukulula nohaya geele aanona yawo opo ye ya gamene keihumbato ndyoka tali vulu okweeta oluhodhi. (Omayeletumbulo 6:20-23) Megongalo, aantu yamwe olundji ohaya pula epukululo nomaetopo gaakalele mboka ya pyokoka opo ya hwepopaleke oonkambadhala dhawo miilonga yomomapya. Omathimbo gamwe aakuluntugongalo ohaya pulathana omayele nenge ya pule yalwe mboka ya pyokoka muukalele. Mboka ya pyokoka pambepo ohaya longitha Ombimbeli okugandja ekwatho kwaamboka ye li pumbwa nohaye shi ningi nombepo yombili. Ngele to gandja epukululo, dhimbulukwa okukala wa ‘angala nangoye wo, waa hongololwe.’ (Aagalati 6:1, 2) Dhoshili, atuheni otwa pumbwa epukululo negeelo opo tu longele Kalunga awike kashili twa hangana.
Oonkundathana dhokweendulula
• Jehova ohe tu kwathele ngiini pahole opo tu mone mpoka twa pumbwa okuninga omalunduluko?
• Omolwashike shi li oshidhigu kaantu oyendji okutaamba ko epukululo lya pumbiwa, nongiini shoka sha kwata miiti?
• Omaukwatya ge na ondilo geni tage ke tu kwathela tu kale hatu taamba ko epukululo, nongiini Jesus a tula po oshiholelwa mwaashoka?
[Ethano pepandja 142]
Ussia okwe ekelehi epukululo nokwa li a kwatwa kuuvu wonziya
[Ethano pepandja 142]
Moses okwa mono uuwanawa mokutaamba ko epukululo lya za kuJetro