Ontopolwa 1

Omolwashike Jesus a li Omulongi Omunene?

OOMVULA dhi vulithe pomayuvi gaali dha piti, opwa li pwa valwa okanona ki ikalekelwa hoka sho ka koko ka ningi omuntu omunenenene ngoka a li ko nale. Pethimbo mpoka kapwa li omuntu e na oondhila nenge iihauto. Kapwa li iinima ngaashi oo-TV nooradio.

Okanona hoka oka li ka lukwa Jesus. Jesus okwa li omunandunge e vule aantu ayehe kombanda yevi. Okwa li wo omulongi dhingi. Okwa li ha yelithile aantu iinima iidhigu momikalo ndhoka tadhi uviwa ko nuupu.

Jesus okwa li a longo aantu shaa mpono e ya adha. Okwa li e ya longele komunkulofuta nomoowato. Okwa li e ya longele momagumbo naashono a li te ende. Jesus ka li e na ohauto noka li he ende mombesa nenge meshina lyokolutenda. Okwa li he ende ehala nehala ta longo aantu.

Ohatu ilongo iinima oyindji kaantu yalwe. Ihe otatu vulu okwiilonga iinima ya simanenena kOmulongi Omunene, Jesus. Iinima mbyoka otatu yi adha mOmbiimbeli. Uuna tatu yi lesha mOmbiimbeli, ohatu kala twa fa tu wete Jesus ta popi natse.

Omolwashike Jesus a li Omulongi Omunene? Etompelo limwe olyo kutya naye mwene oku na ngoka e mu longa. Okwa li a tseya kutya okupulakena okwa simana. Ihe Jesus okwa li ha pulakene kulye?— Olye a li e mu longo? Ohe. He yaJesus oKalunga.

Manga Jesus inee ya kombanda yevi e li omuntu okwa li a kala megulu pamwe naKalunga. Onkee ano, Jesus okwa li a yooloka ko kaantu yalwe molwaashoka kapwa li omuntu gulwe a kala megulu manga inaa valwa e li omuntu kombanda yevi. Jesus megulu okwa kala mo ha vulika kuHe noha pulakene kuye. Onkee ano, Jesus okwa li a vulu okulonga aantu iinima mbyoka a li i ilongo kuKalunga. Ngele owa kala ho pulakene kutate gwoye nokumeme gwoye, nena oto holele Jesus.

Etompelo lilwe molwaashoka Jesus a li Omulongi Omunene, olyo kutya okwa li e hole aantu. Okwa li a hala oku ya kwathela yi ilonge kombinga yaKalunga. Jesus okwa li e hole aakuluntu nosho wo aanona. Aanona oya li ye hole okukala puJesus molwaashoka okwa li ha popi nayo nokupulakena kuyo.

Esiku limwe aavali yamwe oya li ye eta aanona yawo kuJesus, ihe ookuume ke oya li ya dhiladhila kutya Omulongi Omunene okwi ipyakidhila unene noita vulu okupopya naanona. Ano oya li ye ya lombwele ya ze po. Ihe mbela Jesus okwa li a ti ngiini?— Okwa ti: “Etheni uunona, u ye kungame. Inamu u keelela ko.” Eeno, Jesus okwa li a hala aanona ye ye kuye. Nokuli nonando Jesus okwa li omunandunge lela nokwa simana, okwa li a longitha ethimbo okulonga aanona.—Markus 10:13, 14.

Mbela owa tseya kutya omolwashike Jesus a li a longo aanona nokwa pulakene kuyo? Etompelo limwe olyo kutya okwa li a hala oku ya nyanyudha moku ya hokololela iinima kombinga yaKalunga, He gwomegulu. Ongiini to vulu okunyanyudha aantu?— Omoku ya hokololela iinima mbyoka wi ilonga kombinga yaKalunga.

Pompito yimwe, Jesus okwa longithile okanona opo a longe ookuume ke oshiilongomwa sha simana. Okwa li a kutha okanona e te ka thikameke mokati kaalongwa ye, mboka ya li aalanduli ye. Opo nduno Jesus okwa ti kutya aantu mbaka oye na okulundulula omikalo dhawo e taya kala ya fa okanona haka.

Mbela Jesus okwa li a hala okutya shike sho a ti ngawo? Mbela owa tseya kutya ongiini omuntu omukuluntu, nenge nokuli okanona okakuluntu, ke na okukala ka fa okanona okashona?— Okanona okashona kake shi oshindji ngaashi omukuluntu nohaka kala ke na ehalo okwiilonga. Ano Jesus okwa li a hala okutya kutya aalongwa ye oye na okukala yi ishonopeka, ngaashi aanona aashona. Eeno, atuheni otatu vulu okwiilonga iinima oyindji kuyalwe. Atuheni otu na okuzimina kutya omalongo gaJesus oga simana noonkondo ge vule omadhiladhilo getu.—Mateus 18:1-5.

Etompelo lilwe molwaashoka Jesus a li Omulongi Omunene olyo kutya okwa li a tseya nkene e na okuninga iinima yi kale tayi hokitha kaantu. Okwa li a yelitha iinima momukalo omupu nogwa yela. Okwa li a popi kombinga yuudhila noongala nosho wo yiinima yilwe mbyoka ya tseyika nawa kaantu opo e ya kwathele yu uve ko iinima kombinga yaKalunga.

Esiku limwe sho Jesus a li pekota lyondundu, aantu oyendji oya li ye ya kuye. Okwa li a kuutumba e te ya pe oshipopiwa, ngaashi wu shi wete mpaka. Oshipopiwa shika osha li shi ithanwa Euvitho lyokOndundu. Jesus okwa li a ti: ‘Taleni oondhila dhokegulu. Ihadhi kunu. Ihadhi pungula miigandhi. Ihe Ho yeni gwomegulu ohe dhi palutha. Ano hane mboka mu dhi vule?’

Jesus okwa li wo a ti: ‘Taleni nokundhindhilika oongala dhokelundu. Ohadhi koko noihadhi longo. Nokuli nomukwaniilwa Salomo ina zala a fe yimwe yomudho. Ano Kalunga ngele ta sile oshimpwiyu oongala, ne one kee shi mu ningile ando?’—Mateus 6:25-33.

Mbela owu uvite ko oshiilongomwa shoka Jesus a li a longo aantu?— Ka li a hala tu kale tatu ipula kutya otatu li shike nenge otatu zala shike. Kalunga oku shi shi kutya iinima ayihe mbyoka otwe yi pumbwa. Jesus ina tya kutya katu na okulonga opo tu kale tu na iikulya nomizalo. Ihe okwa ti kutya Kalunga oye tu na okupititha komeho. Ngele tatu shi ningi, Kalunga ota ka sa oshimpwiyu opo tu kale tu na iikulya nomizalo. Mbela owe shi itaala?—

Sho Jesus a mana okugandja oshipopiwa, aantu oya li taya dhiladhila ngiini?— Ombiimbeli otayi ti kutya oya li ya kuminwa omukalo gwe gwokulonga aantu. Osha li shihokitha noonkondo okupulakena kuye. Shoka a li a popi, osha li sha kwathele aantu ya longe shoka shi li mondjila.—Mateus 7:28.

Ano osha simana noonkondo twi ilonge kuJesus. Mbela owu shi kutya ongiini tatu vulu oku shi ninga?— Oohapu dhe otu dhi na dha nyolwa membo. Mbela owa tseya kutya embo ndyoka olini?— Olyo Ombiimbeli Ondjapuki. Shika otashi ti kutya otatu vulu okupulakena kuJesus mokugandja eitulomo kiinima mbyoka tatu lesha muyo. Odhoshili kutya mOmbiimbeli omu na ehokololo lituntula tali popi kombinga yankene Kalunga e tu lombwela tu pulakene kuJesus. Natu taleni shoka sha li sha ningwa po.

Esiku limwe Jesus okwa li a fala ookuume ke yatatu kondundu. Omadhina gawo ogo Jakob, Johannes naPetrus. Otatu ki ilonga nale oshindji kombinga yaantu mbaka, molwaashoka ayehe yatatu oya li ookuume ke kopothingo. Ihe pompito ndjika yi ikalekelwa, oshipala shaJesus osha li sha adhima ngetango. Oonguwo dhe odha li dha yele dha fa uuyelele, ngaashi wu shi wete mpaka.

Konima yaashono, Jesus nookuume ke oya li yu uvu ewi okuza megulu. Olya li lya ti: “Nguka Omumwandje omuholike nde mu hokwa, mu uveni!” (Mateus 17:1-5) Owu shi mbela kutya ewi olya li lyalye?— Olya li lyaKalunga! Eeno, Kalunga oye a li a ti kutya oye na okupulakena kOmwana.

Ongiini kombinga yetu kunena? Mbela ohatu vulika nohatu pulakene kOmwana ngoka e li Omulongi Omunene?— Shika osho atuheni twa pumbwa okuninga. Mbela oto dhimbulukwa nkene tatu vulu oku shi ninga?—

Eeno, otatu vulu okupulakena kOmwana gwaKalunga mokulesha omahokololo gOmbiimbeli gonkalamwenyo ye. Opu na iinima oyindji ya dhenga mbanda mbyoka Omulongi Omunene te tu lombwele. Oto ka nyanyukilwa okwiilonga iinima mbika ya nyolwa mOmbiimbeli. Otashi ke ku nyanyudha wo ngele to lombwele ookuume koye iinima iiwanawa mbyoka wi ilonga.

Opo wu mone uuyelele owundji kombinga yiinima iiwanawa mbyoka hayi zi mokupulakena kuJesus, yanuna Ombiimbeli yoye e to lesha Johannes 3:16; 8:28-3 nosho wo Iilonga 4:12.

[Ethano pepandja 11]

Omolwashike aanona ya li ye hole okukala puJesus?

[Ethano pepandja 12]

Oshiilongomwa shini aanona mboka aakuluntu nosho wo aakuluntu taya vulu okwiilonga kaanona aashona?

[Ethano pepandja 13]

Oshiilongomwa shini Jesus a li a longo aantu sho a popi kombinga yuudhila noongala?

[Ethano pepandja 14]

“Nguka Omumwandje . . . , mu uveni”