Ontopolwa 10

Jesus oku na oonkondo e vule oompwidhuli

MBELA oto dhimbulukwa kutya omolwashike gumwe gwomaayengeli yaKalunga a ningi Satana Ondiaboli?— Okahalu ke kokukala a hala oye ta galikanwa oko ka li ke mu ningitha e ethe po okulongela Kalunga. Mbela opu na aayengeli yalwe mboka ya li ya ningi aalanduli yaSatana?— Eeno, osho ya li ya ningi. Ombiimbeli otayi yi ithana ‘aayengeli yaSatana’ nenge oompwidhuli.—Ehololo 12:9.

Mbela aayengeli mbaka aakolokoshi nenge oompwidhuli oyi itaala Kalunga?— Ombiimbeli otayi ti: ‘Oompwidhuli odhi itaala kutya oku na Kalunga.’ (Jakob 2:19) Ihe ngashingeyi odha tila. Omolwashike? Omolwaashoka odhi shi kutya Kalunga ote ke dhi geyela omolwiinima iiwinayi mbyoka dha ninga. Mbela odha ningi shike sha puka?—

Ombiimbeli otayi ti kutya aayengeli mboka oya thigi po ehala lyawo megulu e taye ya kombanda yevi ye li aantu. Shika oye shi ningi molwaashoka oya li ya hala okuya momilalo naakiintu aawanawa yokombanda yevi. (Genesis 6:1,2; Judas 6) Mbela owu shi shike kombinga yomilalo?—

Okuya momilalo ongele omulumentu nomukiintu taya lala pamwe momukalo gwi ikalekelwa. Konima yaashono, otashi vulika okanona ka tameke okukoka moshivalelo shayina. Ihe osha puka ngele aayengeli taya yi momilalo. Kalunga okwa hala owala omulumentu nomukiintu mboka ya hokanathana oyo ya ye momilalo. Komukalo ngoka, ngele omusamane nomukulukadhi gwe ya mono okanona, nena ohaye ka sile oshimpwiyu.

Sho aayengeli yi izaleke omalutu gopantu e taye ya ya lale naakiintu yokombanda yevi, aanona yawo oya li ya koko e taya ningi aalefule. Aanona mboka oya li ye na onyanya noonkondo noya li haya hepeke aantu. Onkee ano, Kalunga okwe etitha eyelu enene ndyoka lya li lya hanagula po aalefule mboka naakolokoshi ayehe. Ihe okwa li a lombwele Noowa a tunge onguluwato nenge ombautu onene, opo mu hupile aantu aashona mboka ya longa shoka shu uka. Omulongi Omunene okwa ti kutya shoka sha li sha ningwa pethimbo lyEyelu osha simana okudhimbulukiwa.—Genesis 6:3, 4, 13, 14; Lukas 17:26,27.

Sho Eyelu lye ya, mbela owu shi kutya aayengeli aawinayi oya ningi po shike?— Oyi ihula omalutu gopantu ngoka ya li yi izaleke e taya shuna megulu. Ihe kaya li we taya vulu okukala aayengeli yaKalunga, kungawo, oya ningi aayengeli yaSatana, nenge oompwidhuli. Mbela oshike sha ningilwa aanona yawo, mboka ye li aalefule?— Oya sile mEyelu. Shoka osho sha li sha ningilwa aantu ayehe mboka inaaya vulika kuKalunga.

Okuza pethimbo lyEyelu, Kalunga ine etha we oompwidhuli dhi zale omalutu gopantu. Ihe nonando oompwidhuli ihatu vulu oku dhi mona, otadhi kambadhala natango okuningitha aantu ya ninge iinima iiwinayi noonkondo. Otadhi etitha omaupyakadhi ogendji shi vulithe nale, molwaashoka odhu umbilwa kombanda yevi okuza megulu.

Mbela owu shi kutya omolwashike ihaatu vulu okumona oompwidhuli?— Omolwaashoka odhi li iishitwa ihaayi monika. Ihe otatu vulu okukala nuushili kutya oko dhi li. Ombiimbeli otayi ti kutya Satana oye ‘ta pukitha uuyuni auhe,’ noompwidhuli dhe otadhi mu kwathele.—Ehololo 12:9,12.

Mbela natse otatu vulu okupukithwa kOndiaboli noompwidhuli dhayo?— Eeno, otashi vulika ngele inatu kotoka. Ihe inatu pumbwa okukala twa tila. Omulongi Omunene okwa ti: ‘Ondiaboli kayi na oonkondo dhi vule dhandje.’ Ngele otwa kala popepi naKalunga, ote ke tu gamena kOndiaboli noompwidhuli dhayo.—Johannes 14:30.

Osha simana okutseya kutya iinima yini iiwinayi mbyoka oompwidhuli tadhi ka kambadhala oku tu ningitha. Onkee ano, dhiladhila kwaashino. Iinima iiwinayi yini oompwidhuli dha li dha ningi sho dhe ya kombanda yevi?— Manga Eyelu inaali ya, odha li dha yi momilalo naakiintu, oshinima shoka sha li inaashi uka okuningwa kaayengeli. Kunena oompwidhuli ohadhi kala dhe shi hokwa ngele aantu itaya vulika koompango dhaKalunga kombinga yomilalo. Nandi ku pule: Mbela oolye owala ye na okuya momilalo?— Owu li mondjila, aaihokani owala.

Kunena aanona yaamati naakadhona yamwe ohaya yi momilalo, ihe shika osha puka. Ombiimbeli otayi popi shi na ko nasha ‘nuulumentu,’ nenge iilyo yoluvalo yaalumentu. (Levitikus 15:1-3) Iilyo yuukiintu yaakiintu ohayi ithanwa uukiintu. Jehova okwa shita iilyo mbika yolutu nelalakano lyi ikalekelwa ndyoka li na owala okunyanyukilwa kaaihokani. Ohashi nyanyudha oompwidhuli ngele aantu taya ningi iinima mbyoka yi indikwa kuJehova. Pashiholelwa, oompwidhuli ohadhi kala dhe shi hokwa ngele okamati nokakadhona taya dhanathana kuulumentu nenge kuukiintu wawo. Mbela otwa hala okunyanyudha oompwidhuli?—

Opu na oshinima shimwe natango shoka oompwidhuli dhi hole, ihe Jehova oku shi tonde. Mbela owu shi kutya osho shike?— Osho elongitho lyoonkondo. (Episalomi 11:5, NW) Elongitho lyoonkondo ongele aantu taya ningi yalwe onyanya notaye ya hepeke. Dhimbulukwa kutya shoka osho sha li sha ningwa kaalefule, oyanamati yoompwidhuli.

Oompwidhuli odhi hole wo okutilitha aantu. Omathimbo gamwe ohadhi ifethitha aantu mboka ya sa nale. Ohashi vulika nokuli dhi holele omawi gaamboka ya sa nale. Komukalo nguka oompwidhuli ohadhi pukitha aantu oyendji yi itaale kutya oonakusa oye na omwenyo nohaya vulu okupopya naanamwenyo. Eeno, oompwidhuli ohadhi ningitha aantu oyendji yi itaale kutya oku na iiluli.

Onkee ano, otu na okukala twa kotokela Satana noompwidhuli dhe opo kaaye tu pukithe. Ombiimbeli otayi tu londodha tayi ti: ‘Satana oha kambadhala okwiimonikitha a fa omuyengeli omwaanawa, naapiya ye osho haya ningi.’ (2 Aakorinto 11:14, 15) Ihe muushili wo wene, oompwidhuli oombwinayi. Natu tale nkene hashi vulika dhi kambadhale oku tu ningitha tu kale twe dhifa.

Mbela openi aantu hayi ilongo oshindji kombinga yelongitho lyoonkondo, yomilalo inaadhi uka, yiishitwa yopambepo nosho wo yiiluli?— Omokutala oopolohalama dhimwe ndhoka hadhi ulikwa ko-TV noofilima nomokupitila maantu mboka haye endathana nayo kosikola. Mbela okuninga iinima mbika otaku tu hedhitha popepi naKalunga nenge opopepi nOndiaboli noompwidhuli dhayo? Oto dhiladhila ngiini?—

Mbela oto dhiladhila kutya olye a hala tu pulakene notu tale iinima iiwinayi?— Eeno, oSatana noompwidhuli dhe. Ano tse nangoye otwa pumbwa okuninga shike?— Otwa pumbwa okulesha, okupulakena nokutala iinima mbyoka iiwanawa notayi tu kwathele tu longele Jehova. Mbela iinima yimwe iiwanawa oyini mbyoka tatu vulu okuninga?—

Ngele tatu ningi shoka oshiwanawa, itatu kala twa tila oompwidhuli. Jesus oku na oonkondo e dhi vule nohadhi mu tila. Esiku limwe oompwidhuli odha pulile Jesus tadhi ti: “Owe ya u tu yone po?” (Markus 1:24) Mbela itatu ka kala twa nyanyukwa ngele ethimbo lyaJesus lyokuhanagula po Satana noompwidhuli dhe lya thiki?— Ngashingeyi otatu vulu okukala nuushili kutya Jesus ote ke tu gamena koompwidhuli ngele otwa kala popepi naye nosho wo naHe gwomegulu.

Natu leshe kombinga yaashoka twa pumbwa okuninga muPetrus gwotango 5:8, 9 nomuJakob 4:7, 8.

[Ethano pepandja 57]

Aayengeli mbaka oya li ya ningi shike oshiwinayi?

[Ethano pepandja 58]

Omolwashike kombanda yevi ku na omaupyakadhi ogendji ngashingeyi shi vulithe nale?

[Omathano pepandja 60]

Oshike tashi vulu okuningwa po ngele otwa kala hatu tala elongitho lyoonkondo?

[Ethano pepandja 61]

Mbela oshike tashi ka kala oshiwanawa kutse okuninga?