Ontopolwa 11

Nkene aayengeli yaKalunga haye tu kwathele

AANTU yamwe ohaya ti kutya ohayi itaale owala mwaashoka taya vulu okumona. Ihe shoka kashi li pandunge. Opu na iinima yolela oyindji mbyoka inaatu mona nando onale nomeho getu. Mbela oto vulu okutumbula po shimwe?—

Ongiini kombinga yombepo ndjono hatu fudhile mo naandjono hatu fudha mo? Mbela ohatu vulu oku yi guma?— Fudhila peke lyoye. Mbela owu uva po sha?— Eeno, owu uva po sha, ihe mbela oto vulu oku yi mona?—

Otwa kundathana nale kombinga yaantu yopambepo mboka ihaatu vulu okumona. Otwi ilonga kutya yamwe aawanawa, ihe yalwe aawinayi. Tumbula po aantu yamwe aawanawa yopambepo mboka ihaatu vulu okumona.— Eeno, opu na Jehova Kalunga, opu na Jesus nosho wo aayengeli aawanawa. Mbela opu na wo aayengeli aawinayi?— Ombimbeli otayi ti kutya opo ye li. Lombwela ndje shoka wi ilonga kombinga yawo.—

Shoka tu shi osho owala kutya aayengeli ayehe aawanawa naawinayi oye na oonkondo ye tu vule. Omulongi Omunene okwa kala nale e shi oshindji kombinga yaayengeli. Shoka oku shi shi molwaashoka okwa li nale omuyengeli manga inaa valwa kombanda yevi e li omuntu. Okwa li a kala pamwe naayengeli yalwe megulu. Omamiliyona yomuyo okwa li e ya shi. Mbela ayengeli ayehe mbaka oye na omadhina?—

Otwi ilonga nale kutya Kalunga okwa luka oonyothi omadhina. Onkee ano, otatu vulu okukala nuushili kutya aayengeli ayehe nayo oye na omadhina. Otu shi kutya ohaya popi naayengeli ooyakwawo molwaashoka Ombiimbeli oya popya kombinga ‘yelaka lyaayengeli.’ (1Aakorinto 13:1) Mbela oto dhiladhila kutya aayengeli ohaya popi kombinga yashike? Mbela ohaya popi kombinga yetu?—

Otu shi kutya aayengeli yaSatana, sha hala okutya, oompwidhuli ohadhi kambadhala oku tu ningitha kaatu vulike kuJehova. Onkee ano, otashi vulika haya popi kombinga yankene taya vulu oku shi ninga. Oya hala tu kale twe ya fa opo natse Jehova kaa kale e tu hole. Ihe mbela ongiini kombinga yaayengeli yaKalunga aadhiginini? Mbela oto dhiladhila kutya nayo ohaya popi kombinga yetu?— Eeno, ohaye shi ningi. Oya hala oku tu kwathela. Nandi ku lombwele nkene yamwe yomaayengeli yaKalunga ya li ya kwathele aantu mboka ya li ye hole Jehova nahaye mu longele.

Pashiholelwa, opwa li pu na omulumentu gwedhina Daniel ngoka a li a kala muBabilonia. Aantu oyendji yaamoka kaya li ye hole Jehova. Aantu oya li ya ningi po nokuli ompango opo mboka taya galikana kuJehova ya geelwe. Ihe Daniel ka li e etha po okugalikana kuJehova. Mbela owu shi shoka ya li ya ningile Daniel?—

Eeno, aantu mboka aawinayi oyu umbilitha Daniel melambo lyoonime, moka Daniel a li mo oye awike noonime dha sa ondjala. Mbela owu shi shoka sha ningwa po?— Daniel okwa ti: “Kalunga okwa tumu omuyengeli gwe, a mutike omakana goonime.” Ka li a monithwa oshiponga shasha. Aayengeli otaya vulu okuningila uuwanawa aantu mboka haya longele Jehova.—Daniel 6:18-22.

Oshiholelwa shimwe natango ooshoka shaPetrus sho a li mondholongo. Oto dhimbulukwa kutya Petrus okwa li kuume kOmulongi Omunene, Jesus Kristus. Aantu yamwe kaya li haya kala ya nyanyukwa uuna Petrus te ya lombwele kutya Jesus Omwana gwaKalunga. Onkee ano, oya tula Petrus mondholongo. Opwa li aakwiita ya langela Petrus opo kaa fadhuke po. Mbela opwa li pu na ngoka ta vulu oku mu kwathela?—

Petrus okwa li a lala pokati kaalangeli yaali nokwa li a mangwa nomalyenge kiikaha. Ihe Ombiimbeli oya ti: ‘Omuyengeli gwaJehova okwe ya, nuuyelele we owa yelele mokandjugo hoka. Okwa kwata Petrus kepepe e te mu pendutha ta ti: “Thikama, endelela!”’

Omalyenge oga gu ko kiikaha yaPetrus. Omuyengeli okwe mu lombwele a ti: ‘Pameka epaya lyoye, ngoye wu izaleke oongaku dhoye e to landula ndje.’ Aalangeli kaya li taya vulu oku ya keelela molwaashoka omuyengeli okwa li ta kwathele Petrus. Oye ya pomweelo gwiitenda nopwa li pwa ningwa oshinima oshikumithi. Omweelo ogwi iyegulula. Omuyengeli ngoka okwe egulula mo Petrus opo a tsikile nokuuvitha.—Iilonga 12:3-11.

Mbela aayengeli yaKalunga otaya vulu wo oku tu kwathela?— Eeno, otaya vulu. Mbela shika osha hala okutya itaye ke tu etha nando tu ningilwe sha oshiwinayi?— Aawe, aayengeli itaye ke tu gamena ngele otatu ningi shoka kaashi li pandunge. Ihe nokuli nonando otu kale tatu ningi iinima yopandunge, otashi vulika natango tu ningilwe sha oshiwinayi. Aayengeli inaya lombwelwa ya keelele shika kaashi ningwe. Pehala lyaashono, Kalunga okwe ya pa iilonga yi ikalekelwa.

Ombiimbeli otayi popi kombinga yomuyengeli ngoka ta lombwele aantu kehe pamwe ya longele Kalunga. (Ehololo 14:6,7) Omuyengeli ohe shi ya lombwele ngiini? Mbela ohi igidha e li megulu opo kehe gumwe e mu uve?— Aawe, pehala lyaashono, aalanduli yaJesus kombanda yevi ohaya lombwele yalwe kombinga yaKalunga, naayengeli ohaye ya wilike miilonga yawo mbyoka. Ohaya shilipaleke kutya mboka ya hala lela okutseya kombinga yaKalunga oya mona ompito yokuuva etumwalaka. Otatu vulu okukutha ombinga miilonga mbyoka yokuuvitha, naayengeli otaye ke tu kwathela.

Ihe mbela ongiini ngele aantu mboka kaaye hole Kalunga oye tu ningile uuwinayi? Ongiini ngele oye tu tula mondholongo? Mbela aayengeli otaye ke tu mangulula mo?— Otaya vulu. Ihe shoka hasho haya ningi aluhe.

Paulus omulanduli gwaJesus naye okwa kwatelwe po. Ihe manga ya li mosikepa ta falwa kompangu, mefuta omwa li mwa tukuluka oshikungulu shombepo onene. Ihe aayengeli kaya li ye mu mangulula, molwaashoka opwa li pu na aantu yamwe mboka ya li ya pumbwa okuuva kombinga yaKalunga. Omuyengeli okwa li e mu lombwele a ti: “Paulus, ino tila! Ongoye owu na oku ka thikama koshipala shomupangeli.” Eeno, Paulus okwa li e na okuya kOmukesari opo e ke mu uvithile. Aayengeli oya li aluhe ye shi kutya Paulus oku li peni, noya li haye mu kwathele. Natse otaye ke tu kwathela wo ngele otwa kala hatu longele Kalunga shili.—Iilonga 27:23-25.

Opu na natango oshilonga sha simana shoka shi na okulongwa kaayengeli, notaye ke shi longa masiku. Ethimbo lyaKalunga lyokuhanagula po aakoloshi oli li popepi lela. Ayehe mboka ihaaya longele Kalunga kashili otaya ka hanagulwa po. Mboka haya ti kutya inayi itaala kutya aayengeli oko ye li molwaashoka ihaa ye ya mono, otaya ka mona kutya oya puka thiluthilu.—2Aatessalonika 1:6-8.

Shoka otashi ka tya shike kutse?— Ngele ohatu longele kumwe naayengeli yaKalunga, otaye ke tu kwathela. Ihe mbela ohatu longele ngaa kumwe nayo?— Ohatu longele kumwe nayo ngele ohatu longele Jehova. Ngele ohatu longele Jehova, otatu ka kala tatu lombwele yalwe nayo ye mu longele.

Opo wu ilonge oshindji kombinga yankene aayengeli haya nwetha mo onkalamwenyo yaantu, lesha Episalomi 34:7; Mateus 4:11; 18:10; Lukas 22:43 nosho wo Iilonga 8:26-31.

[Ethano pepandja 63]

Kalunga okwa li a ningi po shike opo a hupithe Daniel?

[Ethano pepandja 64]

Ongiini omuyengeli a li a kwathele Petrus opo a ze mo mondholongo?

[Ethano pepandja 66]

Omuyengeli nguka ota lombwele Paulus shike?