Ontopolwa 22

Omolwashike kaatu na okupopya iifundja?

NATU tye nduno okakadhona oka lombwele yina taka ti: “Otandi ya kegumbo mbala ngele osikola ya piti mo.” Ihe okakadhona oka kala ko taka dhana owala nookuume kako nokonima yethimbo oka li ka lombwele yina taka ti: “Omulongi oye a ti nandi kale po sho osikola ya piti mo.” Mbela oshi li mondjila okupopya ngawo?—

Nenge tashi vulika okamati ka lombwele he taka ti: “Inandi dhanena etanga megumbo.” Ihe ongiini mbela ngele oke shi ninga? Mbela osha puka okupopya kutya inake shi ninga?—

Omulongi Omunene okwe tu ulukila iinima mbyoka yi li mondjila okuninga. Okwa ti: “Onkee oohapu dheni nadhi tye: ‘Eeno, eeno,’ nenge ‘aawe, aawe,’ oondhoka tadhi gwedhwa ko, otadhi zi muMwiinayi.” (Mateus 5:37) Mbela Jesus okwa li a hala okutya shike?— Okwa li a hala okutya otu na okuninga shono tatu popi.

MOmbiimbeli omu na ehokololo ndyoka tali ulike kutya osha simana okupopya oshili. Oli na ko nasha naantu yaali mboka ya li ya ti kutya yo aalongwa yaJesus. Natu tale shoka sha ningwapo.

Oomwedhi mbali lwaampono konima yeso lyaJesus, aantu oyendji yokiilongo yokokule oya li ye ya kuJerusalem omolwoshituthi sha simana shAajuda hashi ithanwa Pentekoste. Omuyapostoli Petrus okwa li a gandja oshipopiwa sha dhenga mbanda moka a li a lombwele aantu kombinga yaJesus, ngoka a yumudhwa kuusi kuJehova. Shika osho oshikando shotango oyendji yomaantu mboka ya li ye ya kuJerusalem yi ilongo kombinga yaJesus. Okuza mpoka aantu mboka oya li ya hala okutseya oshindji. Mbela oya li ya ningi po shike?

Oya li ya kala ethimbo ele muJerusalem. Ihe konima yethimbo, yamwe yomuyo iimaliwa yawo oya pu po, noya li ya pumbwa ekwatho opo ya vule oku ka landa iikulya. Aalongwa muJerusalem oya li ya hala okukwathela aayenda mbaka. Onkee ano, oyendji yomwaamboka ya li ye na sha oya landitha po iinima yawo noye e ta iimaliwa kaayapostoli yaJesus. Opo ihe aayapostoli oya gandja iimaliwa mbyoka kwaamboka ya li ye na ompumbwe.

Ananias nomukulukadhi gwe Safira, mboka ye li iilyo yegongalo lyopaKriste muJerusalem, oya li ya landitha po epya lyawo. Kapwa li pu na ngoka e ya lombwele ye li landithe po. Oya li ye shi ningi kuyo yene. Ihe shoka ya ningi, inaye shi ninga molwaashoka ye hole aalongwa aape yaJesus. Ananias naSafira oya li ya hala ya dhiladhilithe aantu kutya yo oye li aantu aawanawa unene. Onkee ano, oya tokola ya popye kutya otaya ka gandja iimaliwa ayihe opo ya kwathele aantu. Ihe oya gandja owala iimaliwa yimwe e taya ti kutya oye yi gandja ayihe. Mbela oto dhiladhila ngiini kwaashoka?—

Ananias okwe ya kaayapostoli e te ya pe iimaliwa. Ihe Kalunga, okwa li e shi shi kutya ine yi gandja ayihe. Onkee ano, Kalunga okwa hololele omuyapostoli Petrus kutya Ananias ina popya oshili moshinima shoka.

Opo nduno Petrus okwa ti: ‘Ananias, omolwashike we etha Satana e ku ningithe ngeyi? Epya ndyoka olya li lyoye. Kwa li wu na oku li landitha po. Nokuli naasho we li landitha po ongoye mwene wa li wu na okutokola kutya owu na okuninga shike niimaliwa mbyoka. Omolwashike to iningitha kutya owa gandja iimaliwa ayihe nonando owa gandja owala yimwe yomuyo? Sho wa ningi ngeyi hatse owala wa fundju ihe owa fundju wo Kalunga.’

Oshinima shika osha li sha kwata miiti noonkondo. Ananias okwa popi iifundja! Ka li a ningi shoka a popi kutya osho ta ka ninga. Ananias okwa li owala ti iningitha kutya osho a ninga. Ombiimbeli otayi tu lombwele shoka sha ka ningwa po. Otayi ti: ‘Ananias mokuuva oohapu dhaPetrus, okwi ihata pevi nokwa si. Kalunga okwa dhipaga Ananias. Konima yaashono, omudhimba gwe ogwa falwa pondje nogwa ka fumvikwa.

Konima yoowili ndatu lwaampono, Safira okwe ya mo. Ka li e shi shoka sha ningilwa omusamane gwe. Onkee ano, Petrus okwe mu pula a ti: ‘Lombwela ndje, iimaliwa mbika mwe tu pe oyo ayike mwa pewa sho mwa landitha po epya lyeni?’

Safira okwe mu yamukula a ti: ‘Eeno, epya otwe li landitha po owala kiimaliwa mbyoka.’ Ihe shoka osha li iifundja, oshoka oya li yi ithigila po iimaliwa yimwe yomwaambyoka ya landitha po epya. Onkee ano, Kalunga okwa dhipaga wo Safira.—Iilonga 5:1-11.

Mbela oshike tu na okwiilonga mwaashoka sha ningilwa Ananias naSafira?— Otashi tu longo kutya Kalunga ke hole aaniifundja. Kalunga okwa hala tu kale aluhe hatu popi oshili. Ihe aantu oyendji ohaya ti kutya oshi li mondjila okupopya iifundja. Mbela oto dhiladhila kutya aantu mboka oye li mondjila?— Mbela owu shi ngaa kutya iifundja oyo ye etitha po omikithi, uuwehame neso?—

Dhimbulukwa kutya Ondiaboli oya li ya fundju omukiintu gwotango Eva. Oye mu lombwele kutya ita ka sa ngele ina vulika kuKalunga e ta li komuti ngoka Kalunga e yi indike kaaya lye ko. Eva okwa li i itaala shoka a lombwelwa kOndiaboli e ta li oshiyimati. Eva okwa li wo a pe Adam a lye oshiyimati shoka. Okuza mpoka, oya ningi aalunde naanona yawo ayehe oya li taya ka valwa aalunde. Molwaashoka aanona yawo oya li aalunde, oya li taya ka mona iihuna nokusa. Okumona iihuna okwa li kwe etithwa koshike?— Okwa li kwe etithwa kiifundja.

Itashi kumitha sho Jesus a ti kutya Ondiaboli oyo “omufundja nahe yiifundja ayihe.” Oyo ya li ya popi iifundja tango. Uuna gumwe ta popi iifundja, nena ota ningi shoka Ondiaboli ya ningi. Otu na okudhiladhila kombinga yaashika ngele tatu makelwa tu popye iifundja.—Johannes 8:44.

Uunake hashi kala oshipu wu kwatwe kegamo lyokupopya iifundja?— Mbela hauna wa ninga oshinima shontumba sha puka?— Otashi vulika wu tatule oshinima nonando inoshi tatulila owina. Ngele owa pulwa kutya olye e shi tatula, mbela owu na okutya ogumwe gwomaamwanyoko? Nenge mbela owu na okwiiningitha kutya ku shi kutya olye e shi tatula?—

Ongiini ngele owa li wu na okuninga iithigilwalonga yoye yosikola, ihe owa ningi po owala yimwe? Mbela owu na okutya owe yi ninga ayihe, nokuli nonando hasho?— Otu na okudhimbulukwa Ananias naSafira. Kaya li ya popi oshili. Kalunga okwa li u ulike kutya oshinima shoka ya ninga oshiwinayi sho e ya dhipaga.

Onkee ano, kutya nduno oshike tatu ningi otashi ka nayipaleka owala oshinima ngele otwa popi iifundja nenge uuyelele inaawu ihwa po. Ombiimbeli otayi ti: ‘Popyeni oshili.’ Otayi ti wo: ‘Inamu lombwelathana iifundja.’ Jehova oha popi aluhe oshili, nokwa tegelela natse tu kale hatu popi oshili.—Aaefeso 4:25; Aakolossa 3:9.

Otu na okukala aluhe hatu popi oshili. Omanyolo taga landula mpaka ogo tage shi popi. Eksodus 20:16; Omayeletumbulo 6:16-19; 12:19; 14:5; 16:6 nAahebeli 4:13.

[Ethano pepandja 117]

Mbela okamati haka oka ningi shike sha puka?

[Ethano pepandja 118]

Mbela Ananias ota lombwele Petrus iifundja yashike?

[Ethano pepandja 119]

Oshike sha ningilwa Ananias molwaashono a popi iifundja?

[Ethano pepandja 120]

Jesus okwa ti kutya olye a li a popi iifundja tango, noshizemo osha li shike?

[Ethano pepandja 121]

Uunake shi li oshipu okukala wa hala okufundja?