Ontopolwa 36
Oolye taya ka yumudhwa nopeni taya ka kala?
MOONTOPOLWA mbali dha tetekele, otwa li twa lesha kombinga yaantu yangapi mboka ya li ya yumudhwa? Yatano. Yangapi ya li aanona?— Yatatu. Nomutine okwa li omulumentu omugundjuka. Mbela sho to dhiladhila shika otashi ulike shike?—
Otashi ulike kutya Jehova oku hole aagundjuka. Ihe ota ka yumudha wo yalwe oyendji. Mbela Kalunga ota ka yumudha owala mboka ya longo shoka oshiwanawa?— Otashi vulika tu dhiladhile ngaaka. Ihe nando ongaaka, aantu oyendji inayi ilonga nando oshili kombinga yaJehova Kalunga nOmwana. Onkee ano, oya longo uuwinayi molwaashoka oya li ya longwa shoka sha puka. Mbela oto dhiladhila kutya Jehova ota ka yumudha aantu ya tya ngaaka?—
Ombiimbeli otayi ti: “Kalunga ota ka yumudha aantu ayehe kuusi, naawanawa naawinayi.” (Iilonga 24:15) Omolwashike mboka ya li kaaye shi aayuuki nenge mboka ya li ihaaya longo shoka shi li mondjila taya ka yumudhwa?— Omolwaashoka inaya mona nando ompito yokwiilonga kombinga yaJehova naashoka a hala aantu ya longe.
Mbela sho to dhiladhila uunake aantu taya ka yumudhwa?— Dhiladhila kombinga yaasho Lasarus a li a sa naasho Jesus u uvanekele omumwayina gwaLasarus Marta a ti: “Omumwanyoko ota ka yumuka.” Marta okwa yamukula a ti: “Ondi shi shi kutya ota ka yumuka mesiku lyahugunina.” (Johannes 11:23, 24) Mbela Marta okwa li a hala okutya shike sho a ti kutya Lasarus ota ka yumuka “mesiku lyahugunina”?—
Marta okwa li u uvu kombinga yeuvaneko lyaJesus ndyoka tali ti: ‘Oonakusa ayehe mboka ye li moombila otaa ka za mo.’ (Johannes 5:28, 29) Onkee ano, “esiku lyahugunina” otali ulike kethimbo sho aantu ayehe mboka ye li medhimbuluko lyaKalunga taya ka yumudhwa. Esiku ndika lyahugunina ka li shi owala uule woowili 24. Otali ka kala uule woomvula eyovi. Ombiimbeli otayi ti: ‘Kalunga ota ka pangula aantu yokombanda yevi’ mesiku ndika. Mwaamboka ta ka pangula otamu ka kwatelwa wo mboka ya yumudhwa.—Iilonga 17:31; 2 Petrus 3:8.
Esiku ndika itali ka kala tuu linyanyudha! Aantu omamiliyona ogendji mboka ya sa otaya ka yumudhwa pethimbo ndika lyuule woomvula eyovi. Ehala mpoka taya ka kala ngele ya yumudhwa, Jesus ohe li ithana Oparadisa. Natu tale kutya Oparadisa otayi ka kala peni notayi ka kala ya fa peni.
Oowili ndatu lwaampoka manga Jesus inaa sila komuti gwomahepeko, okwa li a popi kombinga yOparadisa nomulumentu ngoka a li a alelwa komuti popepi naye. Omulumentu nguka okwa li ta dhipagwa omolwuukolokoshi mboka a longo. Ihe omukolokoshi nguka sho a li a tala Jesus nokupulakena shoka aantu ya li taya popi kombinga Ye, oshe mu ningitha i itaale Jesus. Onkee ano, omukolokoshi nguka okwa popi a ti: “Jesus, dhimbulukwa ndje, ngele wa thiki mOshilongo shoye.” Jesus okwe mu yamukula a ti: “Ongame otandi ku lombwele, nena tuu ndjika oto ka kala pamwe nangame mOparadisa.”—Lukas 23:42,43.
Mbela Jesus okwa li a hala okutya shike sho a popi oohapu ndhoka? Mbela Oparadisa oyi li peni?— Dhiladhila kombinga yaashoka. Mbela Oparadisa oya li ya tamekele peni?— Dhimbulukwa kutya Kalunga okwa li a pe omuntu gwotango, Adam nomukulukadhi gwe oparadisa okukala mo huka kombanda yevi. Oya li hayi ithanwa oshikunino shaEden. Moshikunino shoka omwa li mu na iinamwenyo, ihe kaya li ye ye etela oshiponga. Omwa li wo omiti dhi na iiyimati oyindji iitoye nosho wo omulonga omunene. Olya li ehala ewanawa okukala.—Genesis 2:8-10.
Onkee ano, ngele tatu lesha kombinga yomukolokoshi ngoka ta ka kala mOparadisa, natu kale twa fa tu wete momadhiladhilo getu evi ndika lya ningwa ehala ewanawa okukala. Mbela Jesus ota ka kala huka kombanda yevi pamwe naangoka a li nale omukolokoshi mOparadisa?— Aawe. Mbela owu shi kutya omolwashike Jesus itaa ka kala huka kombanda yevi?—
Osho molwaashoka Jesus ota ka pangela eviparadisa e li Omukwaniilwa megulu. Onkee ano, Jesus ota ka kala pamwe nomulumentu nguka meityo ndika kutya ote ke mu yumudha kuusi note ke mu sila oshimpwiyu. Omolwashike Jesus te ke etha ngoka a li omukolokoshi a kale mOparadisa?— Natu tale ngele otatu vulu okumona eyamukulo.
Manga omukolokoshi nguka inaa popya naJesus, mbela okwa li e shi kombinga yelalakano lyaKalunga?— Aawe, ka li e li shi. Okwa li ha longo iinima iiwinayi molwaashoka ka li e shi oshili kombinga yaKalunga. Omukolokoshi nguka ota ka longwa mOparadisa kombinga yelalakano lyaKalunga. Ota ka kala e na ompito yokuulika kutya oku hole lela Kalunga mokulonga ehalo lye.
Mbela aantu ayehe mboka taya ka yumudhwa otaya ka kala mOparadisa kombanda yevi?— Aawe, haayehe. Mbela owu shi kutya omolwashike?— Omolwaashoka yamwe otaya ka yumudhwa ya ka kale pamwe naJesus megulu. Otaya ka pangela pamwe naye ombanda yevi ye li aakwaniilwa. Natu tale kutya otwe shi tseya ngiini.
Uusiku wumwe manga Jesus inaa sa, okwa li a lombwele aayapostoli ye a ti: ‘Megumbo lyaTate megulu, omu na omahala gokukala ogendji, notandi yi ndi ke mu longekidhile omahala.’ Opo nduno Jesus okwe yu uvanekele a ti: “Otandi ka galuka ishewe, ndi mú ile, opo mu ka kale wo nkoka ndi li.”—Johannes 14:2,3.
Mbela Jesus okwa yi peni konima sho a yumudhwa?— Eeno, okwa shuna megulu a ka kale pamwe naHe. (Johannes 17:4,5) Onkee ano, Jesus okwa li u uvanekele aayapostoli ye nosho wo aalanduli ye yalwe kutya ote ke ya yumudha opo ya ka kale pamwe naye megulu. Mbela otaya ka ninga shike pamwe naJesus?— Ombiimbeli oya popya kutya aalongwa ye mboka ye na oshitopolwa “meyumuko ndika lyotango” otaya ka kala megulu nokupangela ombanda yevi “notaa ka pangela pamwe naKristus uule woomvula eyuvi limwe.”—Ehololo 5:10; 20:6; 2Timoteus 2:12.
Aantu yangapi taya ka yumuka “meyumuko lyotango” noku ka pangela pamwe naJesus ye li aakwaniilwa?— Jesus okwa li a lombwele aalongwa ye a ti: ‘Inamu tila, ne oshigunda oshishona! Oshoka Ho okwa hala oku mú pa Oshilongo.’ (Lukas 12:32) “Oshigunda oshishona” shika, sha hala okutya, mboka taya ka yumudhwa ya ka kale pamwe naJesus mUukwaniilwa we wo megulu, oye li omwaalu gwokondandalunde. Ombiimbeli otayi ulike kutya mboka taya ka yumudhilwa omwenyo gwomegulu oye li “144 000.”—Ehololo 14:1,3.
Aantu yangapi taya ka kala mOparadisa kombanda yevi?— Ombiimbeli inayi shi popya. Ihe Kalunga okwa li a lombwele Adam naEva manga ya li moshikunino shaEden ya mone aanona nokuudhitha evi. Dhoshili, oya li ya ndopa okuninga ngaaka. Ihe Kalunga ota ka shilipaleka kutya elalakano lye opo evi lyu udhithwe naantu aawanawa olya gwanithwa po.—Genesis 1:28; Jesaja 45:18; 55:11.
Itashi ka kala tuu shi nyanyudha okukala mOparadisa! Evi alihe otali ka kala lya fa oparka. Otamu ka kala mu udha uudhila, iinamwenyo notamu ka kala omiti omiwanawa nosho wo oongala dhomaludhi agehe. Kapu na ngoka te ke ehama nenge ta ka sa. Kehe gumwe ota ka kala kuume kakehe omuntu. Ngele otwa hala okukala nomwenyo sigo aluhe mOparadisa, otu na okukatuka oonkatu ngashingeyi.
Lesha oshindji kombinga yelalakano lyaKalunga mOmayeletumbulo 2:21, 22; Omuuvithi 1:4; Jesaja 2:4; 11:6-9; 35:5,6 nosho wo 65:21-24.
[Ethano pepandja 187]
Omolwashike Kalunga ta ka yumudha yamwe mboka inaaya longa shoka oshiwanawa?
[Ethano pepandja 188]
Oparadisa ndjoka Jesus ta lombwele omulumentu nguka otayi ka kala peni?
[Ethano pepandja 189]
Ngele tatu lesha kombinga yOparadisa, otu na okukala twa fa tu wete shike momadhiladhilo getu?
[Omathano pepandja 190]
Mboka taya ka yumudhwa otaya ka kala peni notaya ka longa shike?