“Ethimbo lyepangulo” olya thika

EMBO lyOmbimbeli lyahugunina, Ehololo, otali tu tseyithile kutya omuyengeli ngoka ta tuka pokati kegulu otu ‘uvitha evaangeli lyaaluhe ndyoka li na okuuvithwa.’ Okwa popi newi lyopombanda ta ti: “Tileni Kalunga, ne mu mu simaneke; oshoka ethimbo lyepangulo lye olye ya.” (Ehololo 14:6, 7) “Ethimbo lyepangulo” ndyoka olya kwatela mo okuuvithwa nokugwanithwa kwepangulo lyaKalunga. Egwanitho lyepangulo otali ya pehulilo ‘lyomasiku gahugunina,’ moka tu li ngashingeyi.—2 Timoteus 3:1.

“Ethimbo lyepangulo” oli li onkundana ombwanawa kwaamboka ye hole uuyuuki. Oko ethimbo sho Kalunga te ke eta epepelelo kaapiya ye, mboka taya monithwa iihuna konkalelo ndjika yiinima yu udha elongitho lyoonkondo nokwaahe na ohole.

Ngashingeyi, manga “ethimbo lyepangulo” inaali hula nehanagulo lyonkalelo yongashingeyi yiinima yuukolokoshi, otatu ladhipikwa taku ti: “Tileni Kalunga, ne mu mu simaneke.” Osho mbela to ningi? Shika inashi kwatela mo okupopya owala kutya: “Ondi itaala Kalunga.” (Mateus 7:21-23; Jakob 2:19, 20) Etilo lyu uka lyokutila Kalunga oli na oku tu ninga tu ulike etilosimaneko lyoku mu tila. Oli na oku tu pilamenitha uuwinayi. (Omayeletumbulo 8:13) Oli na oku tu kwatha tu hole shoka oshiwanawa notu tonde shoka oshiwinayi. (Amos 5:14, 15) Ngele otatu simaneke Kalunga, otatu ka pulakena kuye neitulomo. Itatu ka kala twi ipyakidhila unene niinima yilwe e tatu kala itaatu lesha Oohapu dhe, Ombimbeli aluhe. Otatu ke mu inekela, omathimbo agehe nomitima dhetu adhihe. (Epsalmi 62:9; Omayeletumbulo 3:5, 6) Mboka haye mu simaneke shili oya zimina kutya oye Omushiti gwegulu nevi, oye Omunamapangelo gweshito alihe nohaya vulika kuye pahole e li Omupangeli gwonkalamwenyo yawo. Ngele otwa zimina kutya otu na okugandja eitulomo olindji kiinima mbika, natu shi ningeni pwaahe na okukakadhala.

Ethimbo lyokugwanitha epangulo ndyoka lya popiwa komuyengeli olya tseyika wo li li ‘esiku lyaJehova.’ “Esiku” lya tya ngaaka olya adhele Jerusalem shonale mo 607 K.E.N. molwashoka aakalimo yasho inaya pulakena komalondodho gaJehova okupitila maaprofeti ye. Molwaashoka inaya kaleka esiku lyaJehova momadhiladhilo gawo, oya tsikile okutula oomwenyo dhawo moshiponga. Jehova okwa li e ya londodha a ti: “Eeno, opopepi li li, tali endelele okuthikana.” (Sefanja 1:14, yelekanitha NW.) “Esiku lyaJehova” lilwe olya adhele Babilon shonale mo 539 K.E.N. (Jesaja 13:1, 6, NW) Molwaashoka Aababilon oya li yi inekela megameno lyawo nomiikalunga yawo, oya li ya dhina omalondodho ngoka ga gandjwa kaaprofeti yaJehova. Ihe muusiku umwe, Babilon oshinene osha tewa po kAamedia nokAapersia.

Oshike she tu taalela nena? ‘Esiku lyaKalunga’ ekwawo ndyoka tali thiki apuhe. (2 Petrus 3:11-14) ‘Babilon Oshinene’ osha pangulwa nale kuKalunga. PaHololo 14:8, omuyengeli ota tseyitha ta ti: ‘Sha teka po, Babilon shika oshinene.’ Shoka osha ningwa nale. Itashi vulu we okukelela aalongeli yaJehova. Eyonuko lyasho nosho wo okwiidhopa miita kwasho oya tulwa pomutenya kehe pamwe. Ngashingeyi ehanagulo lyahugunina lyasho oli li popepi. Omolwetompelo ndyoka, Ombimbeli otayi ladhipike aantu kehe pamwe tayi ti: ‘Zeni mo musho [Babilon Oshinene] mwaa kwatathane noondjo dhasho, nomahepeko gasho gaaye mú kwate. Oshoka oondjo dhasho dha thiki sigo megulu, nuulunde washo Kalunga kwe u dhimbulukwa.’—Ehololo 18:4, 5.

Babilon Oshinene oshike? Osho onkalo yomalongelokalunga muuyuni auhe ndyoka yi na omaukwatya ga faathana nogaBabilon shonale. (Ehololo, ontopolwa onti-17 nonti-18) Tala komafaathano gamwe:

• Aapristeli yaBabilon shonale oya li ye na ombinga onene miinima yopapolotika yopashigwana. Shoka osha faathana naashoka hashi ningwa momalongelokalunga ogendji nena.

• Aapristeli yaBabilon olundji oya hwahwameke iita mbyoka ya li tayi luwa koshigwana shawo. Omalongelokalunga gonena olundji oga kala taga kwatele komeho mokulaleka nuuyamba aakwiita ngele iigwana tayi yi kiita.

• Omalongo nomikalo dhaBabilon shonale oya fala oshigwana moluhondelo olunene. Molwaashoka aawiliki yomalongelokalunga nena oya dhina omithikampango dhOmbimbeli dhi na ko nasha nuuyogoki, oluhondelo otalu monika apuhe mokati kaawiliki yopambepo nosho wo maakwanegongalo. Shoka oshindhindhilikwedhi osho wo uushili kutya molwaashoka Babilon Oshinene otashi hondele nuuyuni nosho wo noopolotika dhawo, Ehololo otali shi thaneke shi li ohonda.

• Ombimbeli otayi ti wo kutya Babilon Oshinene oshi li ‘puukengeli.’ (OB-1986) MuBabilon shonale, ehangano lyotempeli olya li lyi ilikolela omavi ogendji, naapristeli oya li ya tumbala momalandithilo. Kakele komahala gelongelokalunga, nena Babilon Oshinene oshi na oongeshefa odhindji. Omalongo gasho nomasiku gasho gomafudho otage shi etele uuyamba uunene nosho wo yalwe moongeshefa dhuuyuni.

• Elongitho lyiihongwathano, uumpulile nuulodhi oya li apuhe muBabilon shonale, ngaashi yi li momahala ogendji nena. Eso olya li lya talika ko li li omukalo gwokulundulukila monkalamwenyo yilwe yi ili. Babilon osha li shu udha ootempeli noongeleka moka hamu simanekelwa iikalunga yasho, ihe Aababilon oya li ya pataneke aalongeli yaJehova. Omalongo nomikalo odho tuu ndhono otadhi ndhindhilikitha Babilon Oshinene.

Methimbo lyonale, Jehova okwa longithile iigwana iinankondo moopolotika nomuukwiita yi geyele mboka yu ulike ondhino tayi tsikile yoku mu dhina nosho wo ehalo lye. Onkee ano, Samaria osha hanagulwa po kAassiria mo 740 K.E.N. Jerusalem osha li sha hanagulwa po kAababilon mo 607 K.E.N. nokAaroma omo 70 E.N. Natango Babilon osha li sha sindwa kAamedia nokAapersia mo 539 K.E.N. Shi na ko nasha nethimbo lyetu, Ombimbeli otayi hunganeke kutya omapangelo gopapolotika, ngaashi oshilikama, otaga ka pilukila “ohonda” e tage yi hula, tayi kala olutu lwowala, sha hala okutya, taga ka tula pomutenya uukwatya wayo woshili. Otage ke yi hanagula po thiluthilu.—Ehololo 17:16.

Mbela omapangelo guuyuni otaga ka ninga ngaa shili oshinima sha tya ngaaka? Ombimbeli otayi ti kutya “Kalunga okwe ya tsa oondunge momitima dhawo.” (Ehololo 17:17) Otashi ka ningwa ombadhilila, tashi kumitha, tashi halukitha, itashi ka tseyika komeho gethimbo noitashi ke endela ko.

Onkatu dhini wa pumbwa okukatuka? Ipula ngeyi: ‘Mbela onda kakatela natango kehangano lyopalongelokalunga ndyoka lya nyatekwa komalongo nokomikalo ndhoka tadhi li ndhindhilikitha li li oshitopolwa shaBabilon Oshinene?’ Nokuli nonando ku shi oshilyo shalyo, oto vulu okwiipula ngeyi: ‘Mbela onde etha ombepo yalyo yi nwethe ndje mo?’ Ombepo yoludhi luni? Ombepo yokwiidhidhimikila omikalo omiwinayi, ohole yokuhola omaliko nomainyanyudho pehala lyokuhola Kalunga, nenge okudhina owina Oohapu dhaJehova (nokuli nomiinima mbyoka tayi monika ya fa iishona). Dhiladhila nawa kombinga yeyamukulo lyoye.

Opo tu kale twa hokiwa kuJehova, oshi li sha simanenena tu ulike okupitila moonkatu dhetu nosho wo momahalo gomitima dhetu kutya katu li shili oshitopolwa shaBabilon Oshinene. Kapu na ethimbo lyokukakadhala. Ombimbeli otayi tu londodha kutya ehulilo otali ke ya ombaadhilila, tayi ti: “Osho ngeyi edhadhigo limwe Babilon, oshilando shino oshinene otashi ekelwahi noitashi monika we nando.”—Ehololo 18:21.

Ihe opu na oshindji natango. Oshinima shimwe shi na ko nasha ‘nethimbo lyepangulo’ ndyoka, osho kutya Jehova Kalunga ota ka pangula onkalelo yoopolotika muuyuni auhe, aapangeli yadho naayehe mboka taya dhini uuthemba we wokukala omupangeli okupitila mUukwaniilwa we womegulu miikaha yaJesus Kristus. (Ehololo 13:1, 2; 19:19-21) Emoniko lyopahunganeko ndyoka lya nyolwa muDaniel 2:20-45 otali thaneke okupangela kwopapolotika okuza kethimbo lyaBabilon shonale sigo ongashingeyi ku li oshiyelekela oshinenenene sha ningwa moshingoli, moshisilveri, moshiyela shoshikushu, moshiyela oshiluudhe nomenono. Shi na ko nasha nethimbo lyetu, ehunganeko olya hunganeke tali ti: “Kalunga nguka komegulu ota ka dhika uukwaniilwa itaau ka teka po sigo aluhe.” Natango shi na ko nasha naashoka Uukwaniilwa mboka tau ya okuninga ‘pethimbo lyepangulo’ lyaJehova, Ombimbeli otayi ti: “Otau ka nyanyagula [po] notau ka teyagula [po] omaukwaniilwa agehe [ga ningwa kaantu] noku ga hulitha po, ihe wo wene tau ka kala sigo aluhe.”—Daniel 2:44, KB.

Ombimbeli otayi londodha aalongelikalunga yashili kaaya kale ye hole “uuyuni noshaa shoka sha kala mo,” sha hala okutya, omukalo gwonkalamwenyo ndjoka tayi humithwa komeho kuuyuni mbuka wi iteka Kalunga kashili. (1 Johannes 2:15-17) Mbela omatokolo goye noonkatu dhoye otayi ulike kutya ou li thiluthilu kombinga yUukwaniilwa waKalunga? Oho u pititha tuu komeho monkalamwenyo yoye?—Mateus 6:33; Johannes 17:16, 17.

[Oshimpungu pepandja 14]

Ehulilo otali ke ya uunake?

“Omuna gwOmuntu te ya ethimbo tuu ndyoka inaamu mu tegelela.”—Mateus 24:44.

“Kaleni . . . mwa tonata, oshoka inamu tseya esiku nethimbo.”—Mateus 25:13.

“Itali ka tokelwa.”—Habakuk 2:3, NW.

[Oshimpungu pepandja 14]

Mbela ando opwa kala ngaa pu na eyooloko ando owa li u shi shi?

Ando owa li u shi shili kutya egwanitho lyepangulo lyaKalunga ndyoka li li pokuningwa itali ke ya muule woomvula oonshona, mbela ando shoka osha lundulula nkene to longitha onkalamwenyo yoye? Sho wa mono kutya ehulilo lyonkalelo ndjika ya kulupa inali ya nziya ngaashi wa li wa tegelela, mbela owe etha shi shonopeke iilonga yoye yokulongela Jehova?—Aaheberi 10:36-38.

Okwaatseya kwetu ethimbo kondandalunde otaku tu pe ompito okuulika kutya otatu longele Kalunga nomainyengotompelo ga yela. Mboka ye shi Jehova oya tseya kutya okuulika uulaadhi komunute gwahugunina itashi ka hokiwa kuYe, ngoka ha tala momutima.—Jeremia 17:10; Aaheberi 4:13.

Mboka ye hole shili Jehova, ohaye mu pititha aluhe komeho. Ngaashi aantu ooyakwawo, Aakriste yashili otaya vulu okulonga iilonga yokwiikongela omboloto. Ihe elalakano lyawo kali shi okuyambapala ihe okukala ye na iipumbiwa yopalutu ya gwana nopo ya vule okutopola nayalwe. (Aaefeso 4:28; 1 Timoteus 6:7-12) Ohaya nyanyukilwa wo omainyanyudho omawanawa nokufudha po kiilonga yawo, ihe ehalo lyawo olyo okukala ya thuwa po, hakuninga owala shaashoka tashi ningwa kukehe gumwe. (Markus 6:31; Aaroma 12:2) Ngaashi Jesus Kristus, oya nyanyukilwa okulonga ehalo lyaKalunga.—Epsalmi 37:4; 40:9.

Aakriste yashili oya hala okukala nomwenyo nokulongela Jehova sigo aluhe. Etegameno ndyoka kali shi osima yowala molwaashoka oye na okutegelela omalaleko nuuyamba gontumba uule wethimbo shi vulithe pwaashoka yamwe ya tegelela.

[oshimpungu/Ethano pepandja 15]

Ompata yi na ko nasha nuunamapangelo

Opo tu uve ko kutya molwashike Kalunga e etha okumona iihuna okundji ku kale po, otwa pumbwa okuuva ko ompata yi na ko nasha nuunamapangelo. Uunamapangelo oshike? Owo oonkondopangelo dha shiga ko.

Molwaashoka Jehova oye Omushiti, oku na uuthemba okupangela evi naashihe shoka shi li ko. Ihe Ombimbeli otayi yelitha kutya petameko lyondjokonona yaantu, uunamapangelo waJehova owa li wa tulwa momalimbililo. Satana Ondiaboli okwa ti kutya Jehova okwa li unene ta ngambeke aantu, nonokutya okwa fundju aakuluntu yetu yotango kombinga yaashoka sha li tashi ka ningwa po ngele oya dhini ompango yaKalunga e taya ningi iinima ngaashi ya hala nokwa ti wo kutya otashi ka kala lela shi li nawa ngele oya kala ya manguluka ko kepangelo lyaKalunga.—Genesis, ontopolwa onti-2 nonti-3.

Ando Kalunga okwa hanagulile po aanashipotha mboka nziya, shoka ando oshu ulike oonkondo dhe, ihe ando inashi kandula po oompata ndhoka dha holoka po. Pehala lyokuhanagula po aanashipotha nziya, Jehova okwe etha iishitwa ayihe iinandunge yi mone iilanduliko yuunashipotha. Nonando shoka osha li sha kwatela mo okumona iihuna, osha gandja wo ompito opo tu valwe.

Niishewe, nonando oshe mu kotha oshindji, Jehova okwa ningi omalongekidho gopahole opo aantu mboka taya vulika kuye noye na eitaalo tali longo mekuliloyambo lyOmwana, ya vule okumangululwa muulunde nosho wo kiilanduliko yawo nokukala mOparadisa. Ngele osha pumbiwa, shoka otashi vulu okuningwa okupitila mokuyumudhwa kuusi.

Molwokweetha pu pite ethimbo manga ompata inaayi kandulwa po, osha gandja wo ompito kaapiya yaKalunga opo yu ulike kutya otaya vulu okwiinyengithwa kohole yaKalunga nokuulika uudhiginini wawo kuye moonkalo adhihe. Okukandula po ompata yi na ko nasha nuunamapangelo waKalunga pamwe nompata ye yi pamba yi na ko nasha nuudhiginini waantu, osha simanenena opo pu kale esimaneko lyu uka lyokusimaneka oompango meshito alihe. Ngele kapu na esimaneko lya tya ngaaka, itashi ka kala nando tashi wapa pu kale ombili yashili.a

[Enyolo lyopevi]

[Ethano]

Onkalelo yomapangelo gopapolotika muuyuni auhe otayi ka hulithwa po