Jesus okwa li a hunganeke kombinga yiiningwanima mbyoka ya li tayi ka guma aantu muuyuni auhe

AALONGWA yaJesus yane oya li ye mu pula sho ye li po oyo ayeke kombinga yiinima mbyoka a li a popi metetekelo sho ya li ye li kOndundu yOomono hoka ngele wu li kuyo to vulu okumona nawa Jerusalem notempeli yasho. Jesus okwa adhika owala opo a popi kutya otempeli muJerusalem oya li tayi ka hanagulwa po. Petameko, okwa li e ya lombwele kombinga ‘yehulilo lyuuyuni.’ (Mateus 13:40, 49) Aayapostoli oya li ye mu pula ya ti: “Uunake ano tashi ka ningwa, nendhindhiliko olini tali holola, uuna to ya nehulilo lyuuyuni?”—Mateus 24:3.

Mokuyamukula epulo ndyoka, Jesus okwa popi shoka sha li tashi ka ningwa po manga Jerusalem inaashi hanagulwa po. Ihe eyamukulo lye olya li lya kwatela mo omahunganeko ge na ko nasha niiningwanima yomonakuyiwa mbyoka ya li tayi ka guma uuyuni auhe. Jesus okwa li a hunganeka iiningwanima nosho wo oonkalo ndhoka dha li tadhi ka kala oshitopolwa shendhindhiliko ndyoka lya li tali ku ulukila aantu kombanda yevi kutya okukala po kwe e li Omukwaniilwa megulu okwa tameka. Oku shi popya niitya yimwe, endhindhiliko olya li tali ku ulika kutya Jehova Kalunga okwa langeka po Jesus a ninge Omukwaniilwa gwUukwaniilwa wopaMesiasa mboka wa kala wu uvanekwa nale. Endhindhiliko otali ku ulika kutya Uukwaniilwa owu li pokukutha po uukolokoshi auhe nokweetela aantu ombili yashili. Iinima mbyoka Jesus a hunganeka oya li tayi ku ulika kutya otu li momasiku gahugunina gonkalelo ndjika yiinima, sha hala okutya, omalongelokalunga, oopolotika nosho wo uulikumwe waantu mboka wu li ko ngashingeyi otawu ka pingenwa po kwaamboka uupe.

Jesus okwa li a yelitha kutya oshike sha li tashi ka ningwa kombanda yevi pethimbo lyokukala po kwe e li Omukwaniilwa megulu, sho a popi kutya otapu ka kala iita koombinga adhihe dhuuyuni, ondjala, omakakamo gevi omadhigu nomikithi dhomikwawu. Okwaanompango okwa li taku ki indjipala. Aalongwa yashili yaJesus oya li taye ku uvitha onkundana ombwanawa yUukwaniilwa waKalunga muuyuni auhe. Iinima ayihe mbika otayi ka landulwa ‘kuudhigu uunene’ mboka inaawu kala ko nando onale.—Mateus 24:21.

Aalongwa yaJesus oya li taya ka mona ngiini kutya uudhigu uunene owu li popepi? Jesus okwe ya lombwele a ti: “Ilongeni omayele komukwiyu.” (Mateus 24:32) Ngele omukwiyu tagu hapuka, ohashi kala shi iwetikile kutya okwenye oku li popepi. Sha faathana, okuningwa kwiiningwanima mbyoka Jesus a hunganeka otaku ku ulika kutya ehulilo oli li popepi. Kapu na ngoka e shi kutya uudhigu uunene otawu ya uunake nopongapi, ihe He oye owala e shi shi. Onkee ano, Jesus okwa londodha aalongwa ye a ti: “Kotokeni ano, ne mu tonate, oshoka inamu tseya kutya ethimbo otali thiki uunake.”—Markus 13:33.

—Uuyelele moshitopolwa shika owa kankamena kuMateus ontopolwa 24 no 25; Markus ontopolwa 13; Lukas ontopolwa 21.