Oshili yOmbiimbeli oya li ya monika ishewe ngiini?

Ombiimbeli oya hunganeke kutya konima yeso lyaKristus, aalongi aafundja oya li taya ka holoka okuza mAakriste yopetameko noya li taya ka shundula oshili yOmbiimbeli. (Iilonga 20:29, 30) Shika osho naanaa sha li sha ningwa po konima yethimbo. Oya li ya vundakanitha omalongo gaJesus nomalongo gomalongelokalunga goshipagani, nomomukalo gwa tya ngeyi oya toto po Uukriste wiifundja. (2 Timoteus 4:3, 4) Ongiini tatu vulu okukala nuushili kutya kunena otu na euvoko lyomondjila kombinga yaashoka Ombiimbeli tayi longo shili?

Ethimbo lyaJehova lyokuholola oshili osho lya thikana. Jehova okwa li a hunganeke kutya ‘pethimbo lyopehulilo ontseyo yashili otayi ka indjipala.’ (Daniel 12:4, yelekanitha NW.) Mo-1870, okangundu okashona kaakongi yoshili oka li ka mono kutya nani omalongo ogendji haga longwa moongeleka kage li paMbiimbeli. Nomolwaashono oka tameke okukonakona Ombiimbeli opo ku uve ko shoka tayi longo shili, naJehova okwa li e ka kwathele ke yi uve ko.

Aalumentu ye na omitima dhu uka oya li ya konakona Ombiimbeli nuukeka. Aakonakoni yOmbiimbeli mboka yonale oya li ya konakona Ombiimbeli neitulomo momukalo ngoka hatu longitha wo kunena. Oya li haya kundathana iikundathanwa yOmbiimbeli kooshimwe nooshimwe. Ngele oye ya povelise yontumba yOmbiimbeli ndjoka kaaya uvite ko, oya li haya tala koovelise oonkwawo opo ya yelithe ovelise ndjoka. Uuna ye ya pehulithodhiladhilo ndyoka ta li tsu kumwe noovelise oonkwawo mOmbiimbeli, oya li haya nyola ehulithodhiladhilo ndyoka. Molwaashoka oye etha Ombiimbeli yi ifatulule yo yene, shika oshe ya kwathele ya tseye oshili kombinga yedhina lyaKalunga nUukwaniilwa we, elalakano lye li na ko nasha naantu nosho wo nevi, onkalo yoonakusa, netegameno lyeyumuko. Sho ya konakona oya mono oshili ndjoka ye ya mangulula ko komalongo ogendji giifundja nokiilonga inaayi yogoka.—Johannes 8:31, 32.

Momumvo 1879 aakonakoni yOmbiimbeli oya li ya mono kutya ethimbo lyokutseyithila aantu ayehe oshili olya thika. Onkee ano momumvo ogo tuu ngoka, oya tameke okunyanyangidha oshifo, Oshungolangelo tayi tseyitha Uukwaniilwa waJehova, shoka hatu nyanyangidha sigo okunena. Ngashingeyi ohatu uvithile aantu oshili yOmbiimbeli miilongo yi vulithe po-230 nomomalaka ge vulithe po-600. Kapu na nando ethimbo lyontumba mondjokonona ontseyo yashili ya li yi ihanena apuhe ngaashi kunena.

• Konima yeso lyaKristus, oshike sha li sha ningwa po shi na ko nasha noshili yOmbiimbeli?

• Oshike she tu kwathela tu tseye ishewe oshili ndjoka yi li mOohapu dhaKalunga?