Iilonga yuutumwa oshike?

Mbela oto ka kala ngaa wu na ehalo lyokuthiga po aantu yaandjeni nosho wo oshilongo sheni wu ku uvithe onkundana ombwanawa koshilongo shilwe? Oonzapo omayuvi osho dha ninga ngaaka, shoka shu ulika kutya odhi na ombepo ngaashi ndjoka yaJesaya yokutya, “Otandi yi! Tuma ndje!” (Jesaja 6:8) Momukalo gwa tya ngawo, ohadhi holele Omutumwa a shiga ko, Jesus Kristus.—Johannes 7:29.

Mboka haya longo iilonga yuutumwa otaya ende moonkatu dhaJesus. Jesus okwa li a tumwa kuKalunga okuza megulu e ye a kale mokati kaantu aalunde kombanda yevi. Nonando okwa li a mono aantu taya ningilwa okwaanuuyuuki okundji, ina kambadhala oku ku kandula po. Okwa li a gandja eitulomo ‘kokuuvitha onkundana ombwanawa yuukwaniilwa waKalunga’ mboka owo owala tawu ka vula okukandula po omaupyakadhi gaantu. (Lukas 4:43, NW) Aatumwa yashili Aakriste ohaya landula oshiholelwa she.

Opo omuntu a longe iilonga yuutumwa oku na okukala e na ombepo yeiyambo. Omutumwa oku na okukala i ilongekidha okutaamba ko onkalo, omuthigululwakalo, onkalo yombepo, nosho wo iikulya mbyoka tashi vulika yi kale ya yooloka ko thiluthilu kwaambyoka i igilila. Olundji aatumwa oye na okwiilonga elaka epe opo ya vule okupopya naantu yomoshitopolwa moka taya ka kala. Otashi vulika ye na wo okulongitha iiyenditho mbyoka hayi ende kashona opo ya ka thike komahala ngoka ge li kokule niitopolwa iikwawo. Opo ya vule okuninga omaiyambo ga tya ngawo, aatumwa oye na okukala ye hole shili aantu yomomahala moka taya ka longela.

Opo omuntu a vule okulonga iilonga yuutumwa oku na okudheulwa nawa. Oonzapo odhindji ndhoka dhi li miilonga yuutumwa odhe enda mOsikola yOmbiimbeli yoWatchtower yaGilead yoomwedhi ntano. Shoka hashi longwa ko ohashi nkondopaleke einekelo lyawo muJehova, mOohapu dhe, nomehangano lye. (Omayeletumbulo 3:5, 6) Ohashi ya kwathele ya kokeke uukwatya wopambepo mboka omutumwa a pumbwa okukala e na nohashi ya kwathele wo ya kale oonkulungu mokulonga Ombiimbeli. Ohaya ka kala ya pyokoka okuuvithila ‘miilongo ayihe yokombanda yevi.’—Iilonga 1:8.

• Iitegelelwa yini omutumwa e na okugwanitha po?

• Aatumwa ohaya pewa elongo lini li ikalekelwa?