Oshimaliwa shoka hatu longitha miilonga yetu yomuuyuni auhe ohashi zi peni?

Omumvo kehe ehangano lyetu ohali nyanyangidha nokwaandjaganeka Oombiimbeli omamiliyona nosho wo iileshomwa yilwe nopwaahe na okupula ofuto yasha. Ohatu tungu Iinyanga yUukwaniilwa niitayimbelewa noku yi kaleka monkalo ombwanawa. Ohatu ambidhidha Aabetel naatumwa, nohatu gandja omakwatho kwaamboka ya dhengwa kiiponga. Onkee ano, otashi vulika wu ipule to ti: ‘Iilonga ayihe mbika ohayi longwa noshimaliwa tashi zi peni?

Ihatu pula aantu ya gandje oshitimulongo, yu umbe ongalo nenge ya fute omolwiilonga mbyoka twe ya longela. Nonando iilonga yetu yokuuvitha ohayi pula tu longithe oshimaliwa oshindji, ihatu hehela. Uule woomvula omathele dha ka pita, oshifo shOshungolangelo osha li sha popi kutya otwi itaala kutya Jehova oye he tu ambidhidha nosho wo kutya katu na nando esiku tu ka “indile nenge tu hehele aantu ye tu ambidhidhe,” tse katu na tuu shili esiku twe shi ningile.—Mateus 10:8.

Iilonga yetu ohayi ambidhidhwa nomayambidhidho gehalo ewanawa. Aantu oyendji ohaya gandja omayambidhidho molwaashoka ohaya kala ya nyanyukilwa iilonga yetu yokulonga aantu Ombiimbeli. Oonzapo dhodhene nadho ohadhi longitha ethimbo lyadho, oonkondo, iimaliwa nosho wo iinima yilwe opo dhi longe ehalo lyaKalunga kombanda yevi alihe. (1 Ondjalulo 29:9) POshinyanga shUukwaniilwa opu na uuketha womayambidhidho moka hamu tulwa kukehe ngoka a hala okugandja. Iimaliwa mbyoka hayi tulwa mo olundji ohayi zi kaantu mboka kaaye shi aayamba, ya fa owala omuselekadhi ohepele ngoka Jesus a li a popile muuwanawa sho a tula uupeni uyali moshiketha shotempeli. (Lukas 21:1-4) Ano kehe gumwe ota vulu okukala aluhe hi ‘iyoololele iimaliwa yontumba’ “ngaashi eiyuvo lye tali mu lombwele” opo e yi gandje.—1 Aakorinto 16:2; 2 Aakorinto 9:7.

Otwi itaala kutya Jehova ota ka tsikila okwiinyengitha omitima dhaamboka ya hala ‘oku mu simaneka niinima yawo’ sho taya ambidhidha iilonga yUukwaniilwa opo ehalo lye li gwanithwe.—Omayeletumbulo 3:9.

• Oshike sha ningitha ehangano lyetu li kale lya yooloka ko komalongelokalunga galwe?

• Omayambidhidho gehalo ewanawa ohaga longithwa ngiini?