Ohatu kwathele ngiini okukaleka oshinyanga shetu shuukwaniilwa monkalo ombwanawa?

Oshinyanga shUukwaniilwa kehe shOonzapo dhaJehova osha tseyikila edhina lyaKalunga eyapuki. Onkee ano, ohatu kala tu uvite kutya okukutha ombinga moku shi kaleka sha yela, shi shi okutalwa noshi li monkalo ombwanawa oshi li uuthembahenda noshi li oshitopolwa sha simana shelongelokalunga lyetu. Kehe gumwe oha vulu okukutha ombinga miilonga mbika.

Kala ho iyamba wu opaleke konima yokugongala. Konima yokugongala kehe ooitaali ooyakwetu ohayi iyamba nehalo ewanawa ya thige Oshinyanga shUukwaniilwa sho opala. Oshiwike kehe ohaku opalekwa kehe shimwe shoka shi li mo. Omukuluntugongalo nenge omuyakuligongalo oye ha kwatele komeho eyopaleko ndyoka, ta landula mombapila moka mu na omusholondondo gwaashoka shi na okuningwa. Yamwe ohayi iyamba ya kombe Oshinyanga shUukwaniilwa ya yoge pofulula, ya pupule mo ontsi, yu ukililithe iipundi, yo opaleke muundjugo, ya yoge omakende nomasipili, ye ekelehi iiyagaya nenge yo opaleke molugumbo. Omanga lumwe momumvo nenge shi vulithe po, hamu opalekwa pokakololo kehe. Ngele ohatu kutha ombinga meyopaleko ndika naanona yetu, otashi ke ya longa ya kale ya simaneka ehala lyetu moka hatu longelele Kalunga.—Omuuvithi 5:1.

Kala ho iyamba ngele opu na sha sha pumbwa okupangelwa. Momumvo kehe, Oshinyanga shUukwaniilwa ohashi konakonwa nawa meni nokombanda. Shi ikolelela kekonakono ndyoka, ohashi opalekwa shi kale shi li monkalo ombwanawa opo ku yandwe oofuto ndhoka tadhi vulu okuholoka po ngele inashi ningwa. (2 Ondjalulo 24:13; 34:10) Oshinyanga shUukwaniilwa shoka sha yela nohashi kalekwa monkalo ombwanawa osho opalela okulongelelwa Kalunga. Ngele ohatu kutha ombinga miilonga mbika, otatu ulike kutya otu hole Jehova notu hole ehala lyetu lyoku mu longelela. (Episalomi 122:1) Shika ohashi ningitha wo aantu moshitopolwa ya kale ye tu tala ko nawa.—2 Aakorinto 6:3.

• Omolwashike tu na okusila oshimpwiyu ehala lyetu lyokulongelela Jehova?

• Opu na omalongekidho geni gokukaleka Oshinyanga shUukwaniilwa sha yela?