Rahab okwa li i itaala muJehova

Natu kale ando twa fa tu li moshilando shaJeriko. Oshilando shika oshi li mevi lyaKaanana moka aantu inaaya itaala muJehova. Omukiintu gwedhina Rahab omo ha kala moshilando muka.

Sho Rahab a li okakadhona, okwa li hu uvu omahokololo kombinga yankene Moses a li a topola Efuta Etiligane nokwa tembudha mo Aaisraeli muEgipiti. Okwa li wo u uvu nkene Jehova a li e ya kwathele ya sinde aatondi yawo. Ngashingeyi oku uvite anuwa Aaisraeli ya yunga ontanda popepi naJeriko.

Ongulohi yimwe, Aaisraeli yaali oya yi kuJeriko ya ka ndaadhe oshilando shoka. Oye ya pegumbo lyaRahab. Okwe ya taamba ya kale megumbo lye. Uusiku mboka omukwaniilwa gwaJeriko oku uvu kutya moshilando omu na oondaadhi dhi li megumbo lyaRahab. Omukwaniilwa okwa tumu aalumentu ye ke dhi ete mo. Rahab okwe dhi holeke kombanda yondunda e ta lombwele aalumentu yomukwaniilwa ta ti: ‘Oondaadhi opo dha li mpaka, ihe odha za mo nale moshilando. Ngele omwa yi ngashingeyi otamu dhi adha.’ Mbela owu shi kutya omolwashike Rahab ta gamene oondaadhi?—  Omolwaashoka i itaala muJehova noku shi kutya Jehova ota ka gandja evi lyaKaanana miikaha yAaisraeli.

Manga oondaadhi inaadhi za mo megumbo lyaRahab, odhe mu uvanekele kutya ye naanegumbo lye otaya ka hupa sho Jeriko tashi ka hanagulwa po. Owu shi kutya oye mu lombwele a ninge shike?—  Oya ti: ‘Kutha ongodhi ndjika ontiligane e to yi endjeleleke mekende. Ngele owe shi ningi, ayehe mboka ye li megumbo lyoye otaya ka hupa.’ Rahab osho naanaa a ningi ngaashi oondaadhi dhe mu lombwele. Owu shi kutya oshike sha ka ningwa po?— 

Konima yomasiku gontumba, Aaisraeli oya tameke okudhingoloka oshilando ya mwena thilu. Uule womasiku gahamano oya li ya dhingoloka oshilando lumwe mesiku. Ihe mesiku etiheyali oya dhingoloka oshilando luheyali. Nokonima ayehe oya li yi igidha mokule, Jehova e ta kumuna po omakuma goshilando. Ihe egumbo ndyoka li na ongodhi ontiligane ye endjelela pekende kalya li lya kumuka po. Owu li wete methano?—  Rahab noyaandjawo oya li ya hupithwa.

Oshike to vulu okwiilonga ko kuRahab?—  Rahab okwa li i itaala muJehova, omolwiinima iiwanawa mbyoka u uvu Jehova a ninga. Nangoye oto ilongo iinima oyindji iiwanawa kombinga yaJehova. Mbela owi itaala ngaa muye ngaashi Rahab?—  Otu shi shi kutya owi itaala.