Mbela opu na omathimbo gamwe ho kala wu uvite uuza nenge wa tila?

Tala kokanona hoka ke li methano. Otaka monika ku uvite uuza noka tila, hasho? Mbela opu na omathimbo gamwe ho kala wu uvite ngaaka?—  Atuhe ohatu kala tu uvite ngaaka omathimbo gamwe. Ombiimbeli otayi popi kombinga yookuume kaJehova mboka nayo ya li yu uvite uuza noya tila. Gumwe gwomuyo oElia. Natu mu tseye nawa.

Elia okwa li ha kala muIsraeli nalenale manga Jesus inaa valwa. Omukwaniilwa gwaIsraeli, Ahab, ka li ha longele Kalunga kashili, Jehova. Ahab nomukulukadhi gwe, Isebel, oya li haya longele oshikalunga Baal. Onkee ano, oyendji yomaantu muIsraeli oya tameke okulongela Baal. Omukwaniilwakiintu Isebel, okwa li e na onyanya noonkondo nokwa li a hala okudhipaga aalongeli yaJehova ayehe, mwa kwatelwa Elia. Mbela owu shi kutya Elia okwa ningi ngiini?— 

Elia okwa fadhuka po. Okwa yi kombuga kokule e ta holama mekololo. Omolwashike a ningile ngaaka?—  Eeno, okwa li a tila. Ihe Elia ka li e na okukala a tila. Omolwashike? Omolwaashoka okwa li e shi kutya Jehova ota vulu oku mu kwathela. Elia okwa kwathelelwe nale kuJehova. Esiku limwe Jehova okwa li a tumu omulilo okuza megulu konima sho Elia e mu pula megalikano. Osha yela kutya Jehova ota vulu oku mu kwathela natango.

Manga Elia e li mekololo, Jehova okwa popi naye e te mu pula ta ti: ‘Oto ningi shike mpano?’ Elia okwa yamukula: ‘Ongame awike nda hupu po tandi ku longele, nonda tila okudhipagwa.’ Elia okwa li e shi aalongeli yaJehova ayehe oya dhipagwa po. Ihe Jehova okwa lombwele Elia a ti: ‘Aawe, hangoye awike. Opu na natango aantu 7 000 haya longele ndje. Kala wu na omukumo. Otandi ke ku pa ishewe iilonga oyindji.’ Mbela oto dhiladhila kutya Elia okwa li a nyanyukwa oku shi uva?— 

Owi ilonga mo shike mwaashoka sha ningilwa Elia?—  Ino pumbwa okukala wu uvite uuza nenge wa tila. Owu na ookuume mboka ye hole Jehova noye ku hole. Oshikwawo, Jehova oku na lela oonkondo nota vulu aluhe oku ku kwathela. Mbela owa nyanyukwa sho wu shi kutya ku li ongoye awike?—