OSHITOPOLWA OSHI-5
Kaleni mu na ombili naakwanezimo
Aakolossa 3:12 otayi ti: “Kaleni . . . mu na olukeno, ohenda, eifupipiko, ombili neidhidhimiko.”
Suwala naye ezimo. Ihe uuna mwa hokana omukulukadhi nenge omusamane gwoye oye e na okukala pondondo yotango. Aavali yamwe otashi vulika ya kale inaaya panda oshinima shoka. Ihe okutula omuholike gwoye pondondo yotango, itashi ti kutya ito ka simaneka we aavali yoye. Ombiimbeli otayi vulu oku mu kwathela mu kale mu na ondjele moshinima shika. Otayi ke mu kwathela mu kaleke po ombili pokati keni naakwanezimo nosho wo noosuwala yeni sho tamu ningi oonkambadhala dha mana mo mu tunge nokukaleka po ekwatathano lyeni epe.
OSHINIMA SHO-1 KALA WU NA ETALOKO LYU UKA NAAVALI
OMBIIMBELI OTAYI TI: “Simaneka ho nanyoko.” (Aaefeso 6:2) Shika owu na oku shi ninga kutya nduno owu na omimvo dhi thike peni. Owu na aluhe okukala wa lenga aavali yoye nowe ya simaneka. Shimwe ishewe, kala wu shi kutya omukulukadhi nenge omusamane gwoye naye okwa valwa. Onkee ano, okwa pumbwa okukala e na ko nasha naavali ye. Ombiimbeli otayi ti: “Ohole ihayi si efupa.” Ino kala to tsile meni ngele kuume koye oku na ekwatathano ewanawa naavali ye. — 1 Aakorinto 13:4; Aagalati 5:26.
SHOKA WU NA OKUNINGA:
Yanda okupopya to ti: “Aakwanezimo yoye ohaya haula ndje aluhe” nenge “kehe shimwe te ningi nyoko ine shi panda nando”
Ngele tashi ya piinima mbyoka kuume koye e hole, kala ho itula moongaku dhe
OSHINIMA OSHI-2 MPOKA SHA PUMBIWA KALA PETOKOLO LYOYE
OMBIIMBELI OTAYI TI: “Omulumentu oku na okuthiga po he nayina e ta kwatathana nomukadhi, oyo notaa ningi onyama yimwe.” (Genesis 2:24) Aavali ohashi vulika ya kale ye wete kutya oye na natango oshinakugwanithwa shoku mu ningila omatokolo. Otashi vulika ya kale ya hala okuya olunyala mukehe okanima tamu ningi mondjokana yeni.
Ihe kashi na okukala ngaaka. One mu na okutulila po aavali yeni ongamba. Uuna mwa adha etsokumwe moshinima, ya lombweleni ya kale ye shi mpoka ye na okuhulila. Oto vulu oku ya lombwela shu ukilila. Ihe ku na okupopya nayo nondhino. (Omayeletumbulo 15:1) Eifupipiko, uunambili nontalanteni otayi ke mu kwathela mu kale mu na ekwatathano ewanawa naavali yeni nosho wo naakwanezimo. “Ohole yeni mokuyakulathana” nayo nayi tsikile. — Aaefeso 4:2.
SHOKA WU NA OKUNINGA:
Ngele owu wete aakwanezimo taya yi unene olunyala mukehe kamwe hoka ka pamba onkalamwenyo yeni, kundathaneni nomuholike gwoye uuna amuhe mwa lotela nawa
Amuhe yaali tokoleni kutya otamu ku ungaunga ngiini noshinima shoka