Ongeyo oye mu ningitha a dhipage

Konima sho Adam naEva ya tidhwa moshikunino shaEden, oya ka mona aanona oyendji. Omwanamati gwawo gwosheeli, Kain, okwa li omulongi gwepya, nomutiyali, Abel, okwa li omusita gwiimuna.

Esiku limwe Kain naAbel oya li taya ningile Jehova omayambo. Mbela owu shi kutya eyambo oshike? Olyo omagano gi ikalekelwa. Jehova okwa li a hokwa eyambo lyaAbel, ihe lyaKain ka li e li hokwa. Shoka osha geyitha Kain noonkondo. Jehova okwa li a londodha Kain kutya ondjahi ye otayi vulu oku mu ningitha a longe uuwinayi. Ihe Kain ina pupa ko.

Pehala lyaashono, Kain okwa lombwele Abel a ti: ‘Itu ye kelundu.’ Manga ye li oyo ayeke melundu, Kain okwa ponokele omumwayina e te mu dhipaga. Mbela Jehova okwa li ta ka ninga po shike? Jehova okwa geyele Kain nokwe mu tidhile kokule noyaandjawo. Kain ka li we ta ka pitikwa a galukile kegumbo.

Mbela oshike tatu ilongo mwaashika? Otashi vulika tu geye, ngele iinima itayi ende ngaashi twa hala. Ngele otu wete ongeyo tayi koko mutse, nenge yalwe taye tu londodha molwaashoka ya ndhindhilika kutya otwa geya, otu na okuninga omalunduluko nziya e tatu pangele omaiyuvo getu, manga inaage tu pangela.

Molwaashoka Abel okwa li e hole Jehova nokwa longo shoka shu uka, Jehova ote ke mu dhimbulukwa. Kalunga ota ka yumudha Abel, ngele evi e li ningi oparadisa..