Otempeli yaJehova

Konima sho Salomo a ningi omukwaniilwa gwaIsraeli, Jehova okwe mu pula a ti: ‘Owa hala, ndi ku pe shike?’ Salomo okwa yamukula a ti: ‘Ngame omunona, nokandi shi kutya nandi ninge shike. Pe ndje owino tandi wu pumbwa mokulela aantu yoye.’ Jehova okwe mu yamukula a ti: ‘Molwaashoka owa pula owino, otandi ku ningi omulumentu omunandunge e vule ayehe kombanda yevi. Otandi ku ningi wo omuyamba a shiga ko, nongele oto vulika kungame, otandi ku pe omwenyo omule.’

Salomo okwa li a tameke okutunga otempeli. Okwa longitha oshingoli sho sheneshene, iisiliveli, iipilangi nomamanya. Aalumentu naakiintu oyendji ye na owino, oya li ya kwathele mokutunga otempeli. Konima yomimvo heyali, otempeli oya li ya yapulilwa Jehova. Oya li yi na oshiyambelo hoka kwa li haku tulwa omayambo. Salomo okwa tsu oongolo komeho goshiyambelo e ta galikana ta ti: ‘Jehova! Otempeli ndjika kayi shi onene ye ku gwanena nokayi shi ombwanawa wu vule okukala mo. Taamba omaindilo getu nowu pulakene komagalikano getu.’ Mbela Jehova okwa li u uvitile ngiini otempeli ndjoka nosho wo egalikano lyaSalomo? Sho Salomo a mana okugalikana, nziyanziya omulilo ogwa kuluka megulu nogwa fike po omayambo ngoka ga li koshiyambelo. Shoka oshu ulike kutya Jehova okwa hokwa otempeli ndjoka. Sho Aaisraeli ye shi mono, oya li ya nyanyukwa.

Omukwaniilwa Salomo okwa li a tseyikila nawa uunongo we muIsraeli ashihe nokomahala nokuli gokokule. Aantu oya li ye ya kuSalomo e ya kwathele nomaupyakadhi gawo. Omukwaniilwa omukiintu gwaSheba naye okwa li e ya kuSalomo a tale ngele shoka tashi popiwa oshoshili ngaa moku mu pula omapulo omadhigu. Sho omukwaniilwa gwokuSheba u uvu nkene Salomo ta yamukula, okwa ti: ‘Kanda li te vulu okwiitaala shoka aantu ya lombwele ndje kombinga yoye, ihe ngashingeyi ondi wete kutya uunongo woye uunene nani wu vule shoka nda lombwelwa. Kalunga koye, Jehova, ne ku yambeke.’ Onkalamwenyo oya li ombwanawa koshigwana shaIsraeli, naantu oya li ya nyanyukwa. Ihe iinima oya li yi li pokulunduluka.