Jehova ta gamene Jesus

Moshilongo shimwe shi li kuuzilo waIsraeli, omwa li aantu yi itaala kutya oonyothi otadhi vulu oku ya wilika. Ongulohi yimwe, aalumentu yamwe yokUuzilo oya mono oshinima sha fa onyothi tayi adhima tayi ende kegulu, noye yi landula. Onyothi ndjoka oye ya fala kuJerusalem. Aalumentu mboka oya pula aantu ya ti: ‘Omunona ngoka ta ka ninga omukwaniilwa gwAajuda oku li peni? Otwe ya oku mu inyongamena.’

Sho Herodes, omukwaniilwa gwaJerusalem, u uvu kombinga yomukwaniilwa omupe, okwa tila noonkondo. Okwa pula aayambi aakuluntu a ti: ‘Omukwaniilwa ngoka ota ka valelwa peni?’ Oye mu lombwele ya ti: ‘Aahunganeki oya ti kutya ota ka valelwa muBetlehem.’ Onkee ano, Herodes okwi ithana aalumentu yokUuzilo nokwe ya lombwele a ti: ‘Indeni kuBetlehem mu ka konge okanona hoka. Ngele mwe ka mono, ileni, mu lombwele ndje kutya oke li peni. Onda hala oku ke ki inyongamene wo.’ Ihe okwa li owala ta fundju.

Onyothi oya tameke okweenda ishewe. Aalumentu oye yi landula sigo okuBetlehem. Onyothi oya thikama kombanda yegumbo lyontumba, naalumentu oya yi mo. Oya adha mo Jesus nayina Maria. Oye mu inyongamene noye mu pe omagano: oshingoli, iitsinino nomagadhi ga nika nawa. Mbela Jehova oye shili a tuma aalumentu mboka ya konge Jesus? Hasho nando.

Uusiku mboka, Jehova okwa lombwele Josef mondjodhi a ti: ‘Herodes okwa hala okudhipaga Jesus. Kutha okanona nayina, wu ye kuEgipiti. Kala hoka, sigo tandi ku lombwele wu galuke ko.’ Mbalambala, Josef okwa yi nuukwanegumbo we kuEgipiti.

Jehova okwa li a lombwele aalumentu yokUuzilo kutya inaya shuna kuHerodes. Sho Herodes a mono kutya itaya galuka we, okwa geye noonkondo. Molwaashoka ka li a vulu okumona Jesus, okwa gandja elombwelo kutya uunona awuhe wuumati wepipi lyaJesus muBetlehem owu na okudhipagwa. Ihe Jesus okwa li a gamenwa, oshoka okwa li kokule kuEgipiti.

Konima yethimbo, Herodes okwa si. Jehova okwa lombwele Josef a ti: ‘Ngashingeyi oto vulu okushuna koshilongo sheni.’ Josef, Maria naJesus oya shuna kuIsraeli. Oya ka kala moshilando Nasaret.