Jesus te ende kombanda yomeya

Jesus ka li owala a aludha aavu nokuyumudha aasi, ihe okwa li wo a mweneke ombepo nomvula. Sho a mana okugalikana kondundu, okwa tala kEfuta lyaGalilea, e ta mono oshikungulu. Aayapostoli ye oya li mowato, taya dhugu nuudhigu, omolwombepo. Jesus okwa zi ko kondundu, e te ende kombanda yomeya u uka kuyo. Sho ya mono omuntu te ende kombanda yomeya, oya haluka. Jesus okwe ya lombwele a ti: “Inamu tila, ongame.”

Petrus okwa ti: ‘Omuwa, ngele ongoye shili, lombwela ndje, ndi ye kungoye.’ Jesus okwa lombwele Petrus a ti: ‘Ila kungame.’ Petrus okwa zi mo mowato. Okwe ende mokati koshikungulu kombanda yomeya u uka kuJesus. Sho Petrus e li pokuthika puJesus, okwa tala koshikungulu, e ta tila. Okwa haluka nokwa tameke okuningina. Petrus okwi igidha ta ti: “Omuwa, hupitha ndje!” Jesus okwa kwata oshikaha she, e ta ti: ‘Omolwashike wa limbililwa? Eitaalo lyoye oli li peni?’

Jesus naPetrus oya londo mowato, noshikungulu osha mwena mbala. Mbela owu shi kutya aayapostoli oya li yu uvite ngiini? Oya ti: “Oshili ngoye Omuna gwaKalunga.”

Shika hasho sha li oshikando shotango shaJesus ta mweneke oshikungulu. Pompito yimwe, sho Jesus naayapostoli ye ya yi mowato handiyaka yefuta, Jesus okwa li kosindo yowato a kotha. Manga a kotha, oshikungulu oshidhigu osha tukuluka mefuta. Omakuthikuthi ogi iyundulile mowato, sigo tayi hala okuudha omeya. Aayapostoli oya pendula Jesus, tayi igidha taya ti: ‘Muhongi, otu li pokusa! Tu kwathela!’ Jesus okwa penduka e ta lombwele efuta ta ti: “Mwena!” Mbalambala ombepo nefuta oya mwena. Jesus okwa pula aayapostoli ye a ti: ‘Eitaalo lyeni oli li peni?’ Oya lombwelathana ya ti: ‘Ombepo nomakuthikuthi nayo otayi vulika kuye.’ Aayapostoli oya li yi ilongo kutya ngele oyi inekela Jesus thiluthilu, inaya pumbwa okutila.