Paulus ta tumwa kuRoma

Olweendo lwokuuvitha olutitatu lwaPaulus olwa li lwa hulile muJerusalem. Manga e li muJerusalem, okwa li a kwatwa po e ta tulwa mondholongo. Jesus okwe mu lombwele uusiku memoniko a ti: ‘Oto ka ya kuRoma, wu ku uvithile hoka.’ Okwa falwa kuKesarea, hoka a kala mondholongo uule womimvo mbali. Sho ta pangulwa komupangeli Festus, Paulus okwa ti: ‘Nandi ka pangulwe komupangeli Omuroma.’ Festus okwa ti: ‘Molwaashoka owa hala okupangulwa komupangeli Omuroma, okuye wu na okuya.’ Paulus okwa tulwa mosikepa tayi yi kuRoma a mangwa. Aamwatate yaali Aakriste, Lukas naAristarkus oya yi pamwe naye.

Oshikungulu oshinene osha tukuluka mefuta nosha kala mo uule womasiku ogendji. Kehe gumwe okwa li ta dhiladhila kutya ota ka sila mo. Paulus okwa ti: ‘Aalumentu ne, omuyengeli okwa lombwele ndje mondjodhi a ti: “Paulus, ino tila! Ngoye owu na oku ka thika kuRoma, naantu ayehe mboka ye li pamwe nangoye mosikepa, otaya ka hupa.” Ikoleleni! Kapu na nando ogumwe ta ka sa.’

Oshikungulu osha kala uule womasiku 14. Opo ye li po, oya mono okantuntu kedhina Malta. Osikepa oyi idhenge komamanya e tayi teka, ihe aantu ayehe 276 mboka ya li mo, oya thiki komunkulofuta inaaya mona oshiponga. Yamwe oya mbwindi, yo yalwe oyi ikwatelele kiipambu yosikepa mbyoka ya kaama kombanda yefuta sigo okomunkulofuta. Aantu mokantuntu Malta oye ya sile oshimpwiyu e taye ya temene omulilo ya huhulukwe.

Konima yoomwedhi ndatu, aakwiita oya fala Paulus kuRoma nosikepa yilwe. Sho a thiki ko, aamwatate oye ya oku mu tsakaneka. Sho e ya mono, Paulus okwa pandula Jehova nokwa kala e na omukumo. Nonando Paulus okwa li a kwatwa, okwa pitikwa a kale megumbo hali futilwa komwedhi, ta tonatelwa komukwiita. Okwa li a kala mo uule womimvo mbali. Aantu oye ya oku mu talela po, nokwa li e ya uvithile kombinga yUukwaniilwa waKalunga nokwe ya longo kombinga yaJesus. Paulus okwa li wo a nyolele omagongalo ngoka ge li muAsia eshona nomuJudea oontumwafo. Jehova okwa li a longitha lela Paulus a taandelithe onkundana ombwanawa kaantu yomiigwana oyindji.