Shoka Johannes a mono momamoniko

Sho omuyapostoli Johannes a li mondholongo kontuntu yaPatmos, Jesus kwe mu ulukile omamoniko 16 nenge omathano gaashoka tashi ka ningwa monakuyiwa. Johannes okwa li u ulukilwa nkene edhina lyaJehova tali ka yapulwa. Oku ulukilwa nkene Uukwaniilwa waKalunga tawu ke ya nosho wo nkene ehalo lye tali ka gwanithwa kombanda yevi ngaashi megulu.

Memoniko limwe, Johannes okwa mono Jehova a kuutumba koshipangelapundi she megulu tashi adhima. Okwa li a kundukidhwa kaakuluntu 24 ya zala oonguwo oontokele niishani yoshingoli komitse. Moshipangelapundi omwa li tamu zi oombadhi, omawi nomindundumo. Aakuluntu 24 oya tsile Jehova oongolo noku mu galikana. Memoniko ekwawo, Johannes okwa mono ongundu onene yaantu ya za miigwana ayihe, maantu ayehe nosho wo momalaka agehe taya galikana Jehova. Onzigona ndjoka yi li Jesus, otayi ya litha noku ya fala koothithiya dhomeya omanamwenyo. Konima Johannes okwa mono memoniko lilwe, Jesus ta tameke okupangela e li Omukwaniilwa megulu, pamwe naakuluntu 24. Memoniko lya landula ko, Johannes okwa mono Jesus ta kondjitha oshikoko, shoka shi li Satana naayengeli ye mboka hayi ithanwa oompwidhuli. Jesus oku umbile Satana noompwidhuli dhe adhihe kombanda yevi.

Johannes okwa li a mono ethano ewanawa lyOnzigona naahogololwa 144 000 ya thikama kondundu Sion. Okwa mono wo omuyengeli ta tuka kongonga yevi, ta lombwele aantu ya tile Kalunga noye Mu simaneke.

Johannes okwa mono ishewe iita yaArmagedon memoniko lilwe. Miita mbyoka, Jesus netangakwiita lye oya sindi uuyuni waSatana wuukolokoshi. Memoniko lyahugunina, Johannes okwa mono ombili yi li megulu nokombanda yevi. Satana naalanduli ye oya hanagulwa po thiluthilu. Kehe gumwe megulu nokombanda yevi ota simaneke edhina lyaJehova eyapuki noku mu longela oye awike.