Aagalikani Taa Gongelwa

OMUYAPOSTOLI Johannes okwa li a mono emoniko lyiiningomwa iikumithi yuuyuni mbyoka ya ningwa ‘mesiku lyOmuwa.’ Okwa mono Omuwa gwomegulu Jesus Kristus, ta yi a ka hinge iita yopauyuki, ngoka ta thanekwa kokakambe okatokele—“omusindani, a ka sinde.” Oshinima shotango shoka a ningi osho okuumba mo omutondi omunene gwaKalunga megulu, Satana, noku mu umbila komudhingoloko gwevi ndika. Satana okwi inyengithwa kwaashika mokuhepeka aana yaantu nedhipago inaali monika nale, ondjala nomikithi, mbyoka tayi thanekwa kaalondi yuukambe yopathaneko nuukambe wawo—okakambe okatiligane, okaluudhe nokankwaya. (Ehololo 1:10; 6:1-8; 12:9-12) Ooyaye ndhino odhu uvika tango momumvo 1914 nodhi indjipala neendelelo okuza pethimbo ndyono. Masiku otadhi ka adha oshitsa shadho shopombanda mokupitila mwaashoka sha hokololwa kuJesus osho “uudhigu uunene, inaau kala oketameko lyuuyuni sigo ongashingeyi nongaashi itau ya we.”—Mateus 24:3-8, 21.

Otashi ke enda ngiini mbela kaagalikani yaJehova pethimbo ndyono? Ehololo ontopolwa 7, ovelise 1 sigo 10, otadhi popi omuyengeli omunankondo ngoka a “kwatelela” oombepo dhehanagulo sigo aagalikani mbaka taa pu okugongelwa. Okuza 1914, iilyo yahugunina kombanda yevi yaIsrael yopambepo, mbyoka ya thikama miilyo 144 000, oya tameke okugongelwa. Nopo nduno, “tala ihe, ongundu onene, ya nyenge okuyalulwa, oyomaapagani ayehe noyomiilongo ayihe noyomiigwana ayihe noyomomalaka agehe.” Ongundu onene ndjika oyi li nale omamiliyona. Oya thikama ya hokiwa komeho yoshipangelapundi shaKalunga molwashoka oya longitha eitaalo mekuliloyambo lyombinzi yaJesus, ngoka a li a dhipagwa a fa onzi yaa na oondjo. “Noyi igidha newi enene ya ti: Ehupitho olyaKalunga ketu, nguka a kuutumba koshipangelapundi nolyOnzigona.” Aagalikani mbano aaladhi otaa tsikile nokulombwela yalwe mboka taa gongelwa omolwehupitho okupitila ‘muudhigu uunene,’ mokutya “Ila!”—Ehololo 7:14-17, faathanitha NW; 22:17.

“Nevi Alihe”

Shi na ko nasha naagalikani mbaka yi igandja, otaku vulu ku tiwe: “Ewi lyawo lya kugagana nevi alihe noohapu dhawo sigo [okooha] dhuuyuni.” (Aaroma 10:18) Iilonga yawo iidhigu oya li ya lalekwa nuuyamba niiyimati inaayi monika nale. Pashiholelwa:

Meksiko oha lapota ngashingeyi kutya oku na aagalikani yaJehova 335 965 mboka yi ipyakidhila niilonga, eindjipalo konyala lyomayovi ethele meni owala lyoomvula ndatu! Omolwashike mbela pu na eindjipalo enene li thike mpono? Ehokololo tali landula otali vulu okukwathela oku shi yelitha. Omulumentu omugundjuka gwedhina Aurelio okwa li ha longo mongeleka yaKatoolika. Oshikando kehe ngele Oonzapo dhaJehova tadhi ya momukunda moka, ye okwa li ha tono oongendjo dhongeleka okuteya omukumo shaa ngoka a hala oku dhi pulakena. Konima yethimbo okwa landa oJerusalem Bible yaKatoolika nokwa tameke oku yi lesha, ihe kakwa li e yi uvite ko. Opo nduno esiku limwe okwa mono kuume ke a humbata okopi yoNew World Translation monkwapa. Aurelio okwa nyenyetele kuume ke, okwe mu lombwele kutya Ombimbeli ye oyiifundja, nokwe mu fala kaandjawo e ke mu ulukile Ombimbeli “yoshili.” Kuume ke okwa ti: “Lesha Eksodus 20,” nopo nduno okwe mu thigi po.

Nakulonga mongeleka okwa tameke okulesha Eksodus ontopolwa 1 sigo te ya pontopolwa 20, ovelise 4 no 5. Okwa li a kuminwa shoka Ombimbeli ye yaKatoolika tayi ti shi na ko nasha niimenka. Osoondaha ya ka landula konima yOmisa, okwa yi komupristeli e te mu ulukile omishangwa dhi na ko nasha niimenka. Tango omupristeli okwa ti kutya ye oha simaneke owala iimenka; ihe yi galikana. Omupristeli sho a mono kutya Aurelio ina mbilipalelwa kwaashino, okwe mu pe uusama kutya oha konakona ngiika Ombimbeli nOonzapo dhaJehova. Aurelio okwe shi ikala ihe okwa gwedha ko: “Ngashingeyi otandi ke shi ninga!”

Oshikando sha ka landula ko sho Oonzapo dhe ya momukunda, Aurelio okwa kwatathana nadho nokwa tameke okukonakona Ombimbeli nadho. Okwe etha okulonga mongeleka nomeni lyoomwedhi ndatu okwa gwanitha po iinakugwanithwa yokukutha ombinga muukalele womontaneho pamwe nOonzapo dhaJehova. Egumbo lyotango ndyoka a yi olya li lyomupristeli ngwiyaka, ngoka a li a kumwa noonkondo sho a mono ngoka a li nale ha longo mongeleka e li omuuvithi gUukwaniilwa. Omupristeli okwe mu tilitha nekondo, ihe Aurelio okwe mu lombwele kutya inashi pumbiwa molwashoka ye okwa thiga po nale ongeleka. Ondjila ye yomukumo oya ladhipike oyendji yomaakalimo yomomukunda mboka ya konakona nale nOonzapo dhaJehova. Aurelio nayalwe 21 yomomukunda ngoka oya ninginithwa koshigongi shopaikandjo sha ka landula ko. Okukoka momudhingoloko nguka okwa li taku endelele unene nomwa li owala omukuluntugongalo gumwe awike ngoka e endulula omapulo nongundu ndjika omolwokuninginithwa.

“Ewi Lyawo Lya Kugagana”

Kapu na ngoka ta vulu okuhenuka euvitho lyUukwaniilwa. Omuitalia Omukatoolika okwa li ha kala a geya oshikando kehe ngele Oonzapo dhaJehova tadhi ya kuye. Ano sho iilonga ye ye mu lundululile koSingapore, okwa li a dhiladhila kutya lwahugunina dho itadhi ke mu piyaganeka we. Ihe okwa li e shi kuminwa sho Oonzapo naahoka oko wo dhi li. Omolwashoka i ikolele oombwa mbali oohahu okuponokela Oonzapo ndhoka tadhi ke ya mo oshikando tashi landula. Sho Oonzapo mbali dhe ya pegumbo lye, oombwa ndhoka odha nuka mo. Aakiintu mbano oya li ya tila nokutililila, noya fadhuka po opo ya hupithe oomwenyo dhawo, nopuutsakaneno woondjila oyi ihana shaa gumwe okwiiyukila. Sho yimwe yomoombwa ya kwata gumwe gwomOonzapo nokee na nkene a ninga, okwa pweya mo uubroshure uyali mondjato nokwe wu thininike mokana kombwa hoka kwe ekama. Opo nduno oye etha oku mu tidha, oya piluka e tayi shuna megumbo tayi nyanya.

Oshiwike sha ka landula ko, Oonzapo odho tuu ndhoka mbali odha li tadhi ningi omaishunoko pegumbo li li handiyaka yepandaanda. Mwene gwoombwa okwa li e li moshikunino she, ihe shikumithi ye okwa popitha aakiintu nokwe yi ithana megumbo lye. Okwe ya lombwele kutya ye ina popya nale nOonzapo dhaJehova nenge a lesha nale shimwe shomiileshomwa yadho. Ihe ye okwa li a kumwa noonkondo okumona uubroshure mboka wa li mokana kayimwe yomoombwa dhe. Ongulohi oyo tuu ndjoka ye okwa li a lesha uubroshure nowa li we mu kumitha shili. Nonando ye monkalamwenyo ye ayihe okwa li Omukatoolika, ye okwa popi mo ehalo lye lyokukonakona Ombimbeli nOonzapo dhaJehova.

Molwashoka omulumentu okwa li a shunithwa kuItalia, opwa li pwa ningwa omalongekidho opo Oonzapo dhaJehova dhi vule okukonakona naye hoka. Sho ye nomukiintu gwe ya tameke okukala pomakugongala, omupristeli gwopuyo okwe ya kuyo a geya nokwe ya mbandameke. Sho gumwe a tomeke omulilo moshikunino shawo, aahokanathani mbaka oya teya po ekwatathano lyawo alihe nongeleka. Ngashingeyi omulumentu nguka ota ti: “Ngame onda gandja nale uunzapo koyendji yomezimo lyandje oshoka onda hala ya tseye kutya Jehova oye awike Kalunga kashili.”

‘Sigo Okooha dhUuyuni’

Oshimoniwa shilwe okuza mooha nooha dhuuyuni otashi ulike nkene etumwalaka lyUukwaniilwa tali pandulwa notali kwathele okulundulula onkalamwenyo. MuAustralia manga Onzapo ya li mootundi dhi na ko nasha naamboka ye li momategelelo, oya tsakanene nomukiintu ngoka a li e na omikalo odhindji omiwinayi, nokwa li a tindi nokuli okweetha po okuhila omakaya manga a li metegelelo. Iikala ye oya li ya yemateke Onzapo noonkondo. Ohaluka oya monene aanona oshita noya li mondjugo yimwe, noya li ya mono ompito okupopya. Osha yela kutya omukiintu ngoka okwa li e na omaupyakadhi ogendji pethimbo lyokuunona we, nongashingeyi ondjokana ye oya li yi li pokuteka po. Ano konima sho Onzapo ya lalekwa mo moshipangelo, oya yi komukiintu, noya tameke okukonakona naye Ombimbeli, tayi longitha embo Making Your Family Life Happy.

Omusamane gwomukiintu okwa kala ha galikana Kalunga opo a mone elongelokalunga lyashili, ihe okwa gwedha po kutya: “Shampa owala kaali shi lyOonzapo dhaJehova!” Nonando ongaaka, sho a mono kutya omukiintu gwe ota konakona nOonzapo, okwa tameke okupula omapulo nokwa li a hiwa opo a konakone pamwe naye. Shika osho a ningi, nokwa tameke mbala okukala pomakugongala gopagongalo. Ngashingeyi ayehe yaali omusamane nomukiintu gwe oya ninginithwa, nosha yela kutya onkalo yawo yopandjokana oyi li nawa noonkondo.

Omakonakono gOmbimbeli gopegumbo miileshomwa ya tya ngaaka otaga ningitha opo aagalikani oyendji aape ya gongelwe. Miilongo moka Oonzapo dhaJehova dha li dhi na okwiidhidhimikila iipotha, iita yopashigwana, nenge omangambeko gopapangelo, omakonakono gOmbimbeli gopegumbo oga li gi indjipala. Iita yopashigwana oya kala uule woomvula odhindji ya hanya moAngola, nOonzapo odha li dha piti momahepeko ogendji nuudhigu oundji. Petameko lyomvula ya piti, oolapota odhu ulike kutya omuuvithi kehe okwa li e na konyala uupokati womakonakono gOmbimbeli gopegumbo gatatu, ihe aauvithi oya li ye na iileshomwa yOmbimbeli iishona. Aatonatelishikandjo aaendi oya li ya talele po uungundu uushona esiku kehe, ya longekidha iilonga yomomapya omutenya nomakugongala ongulohi kehe. Enyanyu olya li li thike peni sho uutondwe wa hulu po nootona 42 dhiileshomwa yOmbimbeli mbyoka ya pumbiwa noonkondo ya thiki hoka okuza koSouth Africa! Dhoshili, ohole yaamwatate mboka otayi ‘koko moondunge nomomayele agehe,’ sho yo taa vulu ngashingeyi “okuyoolola iinima mbyoka yi na oshilonga.” (Aafilippi 1:9, 10, NW) Eladhipiko oli thike peni kwaamboka ye na iikwathi oyindji yokukonakonitha Ombimbeli okulongitha nawa esiloshimpwiyu ndyoka lya tulwa po nohokwe kuJehova!—1 Timoteus 4:15, 16.

Enyanyu lyaagalikani mbaka aainekelwa otali tu dhimbulukitha oohapu dhaJesus mEuvitho lyokOndundu: “Aanelago oomboka ya tseya ompumbwe yawo yopambepo, oshoka uukwaniilwa wegulu owawo. . . . Aanelago oomboka taa hepekelwa uuyuki, oshoka uukwaniilwa wegulu owawo. . . . Nyanyukweni ne mu nuke pombanda molwenyanyu, oshoka ondjambi yeni onene megulu.” (Mateus 5:3-12, NW) Eteyo enene oli thike nee peni lya teywa moAngola!

Miitopolwa yilwe yuuyuni, omathininiko ge na ko nasha niilonga yOonzapo dhaJehova oga teka wo omayego nenge ga kuthwa po. Jesus methimbo lye okwa tile: “Iilya oyi li po oyindji, ihe aalongi oyo aashona.” (Mateus 9:37) Kashi li tuu shoshili nena! Opu na aluhe ompumbwe yaalongi oyendji. Tse otwa nyanyukwa sho egalikano lyetu lya kwatela mo eteyo. Kombanda yevi itaku monika nena enyanyu enene li vule lyiilonga yetu yomeiyapulo lyokulongela Jehova Kalunga tayi imike iiyimati.

Ihe oshike mbela tashi inyengitha aagalikani yaJehova okuulika enyanyu nuuladhi ya tya ngaaka? Otatu ke shi mona nale.