Kalunga oku na ko nasha nangoye shili
OSHI li lela paunshitwe okupula ekwatho kuKalunga uuna tu li monkalo ya nika oshiponga. Dhoshili, ye “omunene noku na oonkondo odhindji, omayele ge gaa shi kuyelekwa.” (Epsalmi 147:5) Oku li pondondo yi li dhingi oku tu kwathela tu ungaunge nomaupyakadhi getu. Kakele kaashono, Ombimbeli otayi tu hiya tu ‘pukumuneni oomwenyo dhetu’ koshipala she. (Epsalmi 62:9) Omolwashike ano aantu oyendji noonkondo haya dhiladhila kutya Kalunga iha yamukula omagalikano gawo? Mbela shika otashi ti kutya ke na ko nasha nayo?
Pehala lyokukala ho gandja uusama nziya kuKalunga molwaashoka ta monika a fa itaa katuka onkatu, dhiladhila kethimbo sho wa li okanona. Sho aavali yoye ya li inaaya zimina nziya kehe shimwe shoka wa pula, owa li mbela we ya pe uusama kutya kaye ku hole? Aanona oyendji osho haya ningi. Ihe sho wa koko, owe shi uvu ko kutya ohole ohayi ulukilwa momikalo odhindji nonokutya okutya eewa keindilo kehe lyokanona hako lela oshinima shopahole okuninga.
Sha faathana, ngele Jehova iha yamukula aluhe omagalikano getu ngaashi twa hala, itashi ti kutya ke na ko nasha natse. Oshili oyo kutya Kalunga ohu ulike kutya oku na ko nasha natse atuheni momikalo odhindji.
“Muye tse otu na omwenyo”
Tango, omolwaKalunga “otu na omwenyo, tatu inyenge notu li po.” (Iilonga 17:28, OB-1986) Molwaashoka oye e tu pa omwenyo, itashi ulike tuu shili pahole kutya oku na ko nasha natse!
Natango, Jehova ohe tu pe shoka twa pumbwa opo tu kale tu na omwenyo. Otatu lesha taku ti: “Ho menithile iimuna omwiidhi niigwanga yokukwatha aantu. Osho to menitha mo mevi oshikwiila.” (Epsalmi 104:14) Dhoshili, Omushiti gwetu oha ningi oshindji kaashi shi owala okugandja iipumbiwa yonkalamwenyo. Oha lokitha nehalo ‘omvula megulu nohe tu pe eloolo nohu udhitha oomwenyo dhetu iipalutha nenyanyu.’—Iilonga 14:17.
Nonando ongaaka, yamwe otashi vulika tayi ipula taya ti: ‘Ngele Kalunga oku tu hole noonkondo, omolwashike nee he etha tu mone iihuna?’ Mbela ou shi eyamukulo kepulo ndika?
Mbela Kalunga oye e na okupewa uusama?
Okumona iihuna okundji kwaantu ohaku etithwa kiilonga yawo yene. Pashiholelwa, iiponga mbyoka hayi etithwa kiilonga yontumba mbyoka ya nika oshiponga oya tseyika nawa. Nonando ongaaka, aantu ohaya kutha ombinga moluhondelo, ohaya longitha nayi oalkoholi niingangamithi yilwe, ohaya longitha omakaya, ohaya kutha ombinga momaudhano ga nika oshiponga, ohaya hingi ye endelela unene nosho tuu. Ngele eihumbato lya nika oshiponga lya tya ngaaka tali eta okumona iihuna, mbela olye e na okupewa uusama? Mbela oKalunga nenge omuntu ngoka ta katuka paugoya? Oohapu dhaKalunga dha nwethwa mo otadhi ti: “Inamu ifundjaleka, Kalunga iha nyekelwa; oshoka shono omuntu te shi kunu, osho tuu te shi teya wo.”—Aagalati 6:7.
Kakele kaashono, aantu olundji ohaye ehamekathana. Uuna oshigwana tashi hingi iita, osha yela kutya Kalunga haye e na okupewa uusama molwokumona iihuna hoka iita tayi eta. Uuna kalyamupombo ta ponokele omukwashigwana omukwawo, Kalunga mbela oye e na okupewa uusama ngele gumwe e ehamekwa nenge a si? Hasho nando! Uuna omupangeli kayamukulwa ta thininike, ta hepeke nokudhipaga mboka ye li mepangelo lye, Kalunga mbela oye tu na okupa uusama? Shoka otashi ka kala shaa li pandunge.—Omuuvithi 8:9.
Ihe ongiini kombinga yaantu omamiliyona mboka ye li moluhepo lululila nenge mboka taya si ondjala? Kalunga mbela oye e na okupewa uusama? Aawe. Evi lyetu ohali gandja iikulya ya gwana okupalutha kehe gumwe. (Epsalmi 10:2, 3; 145:16) Okwaahatopola shi thike pamwe iikulya ya gwana mbyoka Kalunga ha gandja oko haku etitha ondjala noluhepo ndoka lu li apuhe. Olwiho lwaantu ohalu imbi uupyakadhi mboka u kandulwe po.
Oshietithi oshinene shomaupyakadhi
Ihe olye e na okupewa uusama ngele gumwe te ehama nenge ta si molwuukulupe? Mbela otashi ke ku kumitha ngele to tseya kutya Kalunga haye e na okupewa uusama nokuli nomoshinima shika? Kalunga ina shita omuntu a kale ta kulupa nokusa.
Sho aantu yotango yaali, Adam naEva, ya tulwa moshikunino shaEden, Jehova okwe ya pe etegameno lyomwenyo gwaaluhe meviparadisa. Ihe osha yela kutya okwa li a hala evi li kaliwe kaantu mboka taya ka kala ya pandula uuthiga wawo. Onkee ano, okwa ti kutya okukala kwawo kwomonakuyiwa okwi ikolelela kokugwanitha po kwawo iitegelelwa yontumba. Adam naEva oya li taya ka kala owala mOparadisa ngele taya kala taya vulika kOmushiti gwawo omunahole.—Genesis 2:17; 3:2, 3, 17-23.
Mupya munene, Adam naEva oya tukulutha oshipotha. Eva okwa tokola okupulakena kuSatana Ondiaboli. Muushili wo wene, okwe mu fundju a ti kutya Kalunga okwe mu indika sha oshiwanawa. Kungawo Eva okwa tameke okulandula ondjila yemanguluko nokwa kambadhala okukala a “[fa] Kalunga, okudhimbulula—okutseya—uuwanawa nuuwinayi.” Adam naye wo okwa tukulutha oshipotha pamwe naye.—Genesis 3:5, 6.
Sho Adam naEva ya yono komukalo ngoka, oyu ulike kutya yo inaya gwana okukala nomwenyo sigo aluhe. Oya mono iihuna kiilanduliko yuulunde ya nika oshiponga. Oonkondo dhawo odha shonopala, nolwahugunina oya si. (Genesis 5:5) Ihe uunashipotha wawo owe eta iilanduliko ya kwata miiti noonkondo. Otatu mono natango iihuna kiilanduliko yuulunde waAdam naEva. Omuyapostoli Paulus okwa nyola a ti: “Ngashika uulunde wa etwa muuyuni komuntu gumwe [Adam], neso okuulunde, nosho eso lyi ikuna naantu ayehe, oshoka ayehe ya yono.” (Aaroma 5:12) Eeno, molwuunashipotha waAdam naEva, uulunde neso oya taandele maantu ayehe ngaashi omukithi omudhipagi.
Euliko lya kolelela kutya Kalunga oku na ko nasha natse
Mbela shoka otashi ti kutya eshito lyaKalunga lyaantu olya li lya yonuka sigo aluhe? Aawe, naampaka opu na euliko lya kolelela kutya Kalunga oku na ko nasha natse. Nonando oshe mu pula oshindji, Kalunga okwa gandja oshikwathitho shokukulila aantu muulunde neso. Ofuto yiikulila oya li omwenyo gwaJesus gwa gwanenena, gwa gandjwa nehalo molwetu. (Aaroma 3:24) Onkee ano, omuyapostoli Johannes okwa nyola a ti: “Osho Kalunga kwa li e hole uuyuni, oye a gandja Epona lye, opo shaa ngoka e mu itaale, kaa kane, ihe a mone omwenyo gwaaluhe.” (Johannes 3:16) Molwoshilanduliko shiilonga yohole mbika ya tongomana, otu na ishewe etegameno lyokukala nomwenyo sigo aluhe. Paulus okwa nyolele Aaroma a ti: “Oshilonga shuuyuuki shagumwe otashi etele aantu ayehe eyuukipalitho lyomwenyo.”—Aaroma 5:18.
Otatu vulu okukala nuushili kutya pethimbo lyaKalunga lyo opala, kopulanete yEvi itaku ka kala we nando okumona iihuna nenge eso. Pehala lyaashono, oonkalo ndhoka dha hunganekwa membo lyEhololo otadhi ka kala odho tadhi pangele, taku tiwa: “Tala ko, egumbo lyaKalunga li li paantu, noye ta kala nayo, oyo notaa kala oshigwana she, Kalunga mwene ota kala pamwe nayo, Kalunga kawo; nota theta po omahodhi momeho gawo, neso kali kala we nenge oluhodhi nenge elilagano, nenge uuwehame kau kala mo we, oshoka shiyaka shotango osha hulu po.” (Ehololo 21:3, 4) Otashi vulika to ti: ‘Ethimbo ndyoka itandi ka kala nando ndi na omwenyo opo ndi shi mone.’ Ihe oshili oyo kutya otashi vulika u shi mone. Nongele nokuli ou se, Kalunga ota vulu oku ku yumudha kuusi. (Johannes 5:28, 29) Ndyoka olyo elalakano lyaKalunga kutse, naashoka osho tashi ka ningwa. Kashi li tuu iifundja yo yene okutya kutya Kalunga ke na ko nasha naantu!
“Hedheni kuKalunga”
Otashi hekeleke okutseya kutya Kalunga okwa ninga po ekandulopo ndyoka tali kalelele okukandula po uupyakadhi wokumona iihuna kwaantu sigo aluhe. Ihe ongiini kombinga yethimbo lyongashingeyi? Mbela oshike tatu vulu okuninga ngele tatu silwa omuholike gwetu nenge okanona ketu take ehama? Kali shi natango ethimbo lyaKalunga okukutha po omikithi neso. Ombimbeli otayi ulike kutya otu na okutegelela uule wokathimbo natango opo yi kandulwe po. Ihe Kalunga ine tu thiga po twaahe na ekwatho. Omulongwa Jakob okwa ti: “Hedheni kuKalunga, oye nota hedha kune.” (Jakob 4:8) Eeno, Omushiti gwetu ote tu hiya tu kale tu na ekwatathano lyopothingo lyopaumwene naye, naamboka ye li na ote ke ya yambidhidha aluhe nokuli nomoonkalo oondhigu noonkondo.
Ongiini mbela tatu vulu okuhedha popepi naKalunga? Omukwaniilwa David okwa pula epulo lya faathana omayuvimumvo gatatu ga piti, ta ti: ‘Omuwa, olye ta pitikilwa okukala kondundu yoye ondjapuki?’ (Epsalmi 15:1) David okwa yamukula mwene epulo lye sho a tsikile ta ti: “Oongoka omunamikalo naangoka ta ningi shoka shu uka noha popi dhoshili okomwenyo gwe; oongoka ita lundilitha elaka lye, ngoka ita ningile omukwawo onyanya.” (Epsalmi 15:2, 3) Noohapu dhilwe, Jehova oha taamba ko mboka taya landula ondjila ndjoka ye ekelwahi kuAdam naEva. Oha hedha popepi naamboka haya longo ehalo lye.—Deuteronomium 6:24, 25; 1 Johannes 5:3.
Mbela ongiini tatu vulu okulonga ehalo lyaKalunga? Otwa pumbwa okwiilonga shoka “oshiwanawa nosho opalela Kalunga, Omukulili gwetu,” nopo nduno tatu katuka metsokumwe nasho. (1 Timoteus 2:3) Shoka osha kwatela mo okumona ontseyo yashili yokutseya Oohapu dhaKalunga, Ombimbeli. (Johannes 17:3; 2 Timoteus 3:16, 17) Okulesha owala ngeya Ombimbeli inaku gwana. Otwa pumbwa okuholela Aajuda yokuBerea yomethelemumvo lyotango mboka ya pulakene euvitho lyaPaulus. Otatu lesha kombinga yawo taku ti: “Oya taamba oohapu noku dhi hokwa noya konakona mooraamata omasiku agehe, ya tale, mbyoka ye yi lombwelwa, ngele oyo tuu.”—Iilonga 17:11.
Sha faathana, nena ekonakono lyOmbimbeli lyuukeka otali koleke eitaalo lyetu muKalunga notali tu kwathele tu tunge ekwatathano lyopothingo naye. (Aaheberi 11:6) Otali tu kwathele wo tu uve ko lelalela nkene Jehova hu ungaunga naantu—hanomauwanawa owala gethimbo efupi ihe unene tuu onuuwanawa wethimbo ele kwaayehe mboka ye na iikala iiwanawa.
Konakona shoka sha popiwa kAakriste yamwe mboka ye na ekwatathano lyopothingo naKalunga. Danielle gwoomvula 16 ota ti: “Ondi hole noonkondo Jehova notandi mu pandulile oshindji noonkondo. Okwa pe ndje aavali aanahole mboka ye hole ndje shili noya longa ndje metsokumwe nOohapu dhe.” Omukriste gumwe muUruguay ota nyola ta ti: “Omutima gwandje ogu udha olupandu, nolwi inyengitha ndje ndi pandule Jehova omolwesilohenda lye inaali longelwa nomolwuukuume we.” Kalunga oha taamba ko nokuli naanona aashona. Gabriela gwoomvula heyali ota ti: “Ondi hole Kalunga shi vulithe kehe shimwe shi li muuyuni auhe. Ondi na Ombimbeli yandje mwene. Ondi hole okwiilonga kombinga yaKalunga nOmwana.”
Nena, aantu omamiliyona muuyuni auhe nomutima aguhe otaya zimine pamwe nomupsalmi ngoka a ti: “Ondi uvite uutoye wokukala popepi naKalunga.” (Epsalmi 73:28) Oya kwathelwa yu ungaunge nomaupyakadhi ngoka ge ya taalela ngashingeyi, noye na etegameno li na einekelo okukala nomwenyo sigo aluhe mOparadisa kombanda yevi. (1 Timoteus 4:8) Mbela omolwashike itoo shi ningi elalakano lyoye u ‘hedhe kuKalunga’? Dhoshili, otatu shilipalekwa taku ti: “Oye ina kala kokule natse, nando ogumwe.” (Iilonga 17:27) Eeno, Kalunga oku na ko nasha nangoye shili!
[Omathano pepandja 5]
Oshi iwetikile momikalo odhindji kutya Jehova oku na ko nasha natse
[Ethano pepandja 7]
Nokuli naanona aashona otaya vulu okuhedha popepi naKalunga
[Omathano pepandja 7]
Nena, Jehova ohe tu kwatha tu idhidhimike. Konima yethimbo, ota ka kutha po omikithi neso