Omolwashike tu na okudhimbulula mo antikristus?

Omuyapostoli a nwethwa mo kombepo ondjapuki okwa nyola nale a ti: “One mu uvile, antikristus te ya.” (1 Johannes 2:18, OB-1954) Oohapu ndhoka itadhi pendutha tuu ohokwe yetu! Aantu oya kala uule womathelemimvo nokwiipula kutya otadhi ti ngiini. Antikristus oye lye? Uunake te ke ya? Oshike ta ka ninga uuna te ya?

OMUSHOLONDONDO gwaamboka ya lundilwa kutya oyo ooantikristus omule. Nale mboka ya li ya lundilwa kutya oyo ‘ooantikristus’ oya li ya kwatela mo Aajuda, aapapa yaKatoolika naakeesali Aaroma. Pashiholelwa, sho omukeesali Frederick omuti-2 (mo 1194-1250) a li a tokola kaa ye miita yongeleka hayi ithanwa ondjendamushigakano, omupapa Gregory omuti-9 okwa li e mu luku antikristus nokwa li e mu kondo mo mongeleka. Omulanduli gwaGregory, Innocent omuti-4, okwa li a tseyitha ishewe kutya omukeesali Frederick omuti-2 okwa kondwa mo. Shika osha ningitha Frederick a tye kutya Innocent oye antikristus.

Omuyapostoli Johannes oye awike omunyoli gwOmbiimbeli a longitha oshitya “antikristus.” Moontumwafo mbali ndhoka a nyola, oshitya shoka otashi holoka mo lwiikando itano, paushimwe nopauwindji. Oovelise moka oshitya shoka tashi holoka odhi li moshimpungu shoka shi li pepandja tali landula. Moovelise ndhika, otatu vulu okumona kutya antikristus oye omufundja nomuhongololi ngoka e na elalakano okuteya po ekwatathano lyomuntu naKristus nosho wo naKalunga. Onkee ano, omuyapostoli okwa ladhipike Aakriste ooyakwawo a ti: “Ookuume kandje aaholike, inamu itaala ayehe mboka taa ti kutya oye na Ombepo yaKalunga, ihe ya konakoneni, mu tale kutya ombepo ndjoka ye yi na ngele oyaKalunga tuu. Oshoka aahunganeki aafundja oyendji oya ya nuuyuni auhe.”—1 Johannes 4:1.

Jesus okwa li wo a londodha shi na ko nasha nokwaangala aahongololi nenge aapolofeti aafundja a ti: “[Otaye] ya kune molupe lwoonzi, ihe meni lyawo omambungu haga lyana. Otamu ya dhimbulula kiiyimati yawo [nenge kiilonga yawo].” (Mateus 7:15, 16) Mbela Jesus okwa li wo a londodha aalanduli ye ya angale antikristus? Natu tale nkene tatu vulu okudhimbulula mo omuhongololi nguka omukwanyanya.