Omolwashike tu na okupopya oshili?

SHO Manfred a li e na oomvula 18 okwa li ta dheulilwa iilonga yokulonga mombelewa.a Ehangano moka a li ha longo olya li lya ningi elongekidho opo ye naadheulwa yalwe ya ye ya ka dheulwe kokolindji yomaithanolongo omasiku gaali moshiwike. Esiku limwe ootundi odha li dha piti mo kuyele. Pamulandu gwehangano lyawo, aadheulwa oya li ye na okushuna kiilonga sigo ethimbo lyokuzimbuka lya adha. Pehala lyaashono, ayehe oya yi opo ye ki inyanyudhe, kakele kaManfred ngoka a li a galukile kiilonga. Ombaadhilila, omukuluntu gwehangano ngoka oye a li omutonateli gwaamboka taya dheulwa okwa li e ya po. Sho a mono Manfred, okwe mu pula a ti: “Omolwashike inoo ya kootundi nena? Yakweni oye li peni?” Mbela Manfred okwa li e na okuyamukula ngiini?

Manfred okwa li monkalo ondhigu lela. Mbela okwa li e na okupopya oshili, nenge okwa li e na okupopila aadheulwa ooyakwawo? Ngele okwa gandja eyamukulo lyoshili osha li tashi ka tula yakwawo muupyakadhi e taya kala kaaye mu hole. Mbela oshi li nawa okufundja ngele tu li monkalo ya tya ngaaka? Ando ongoye, mbela ando owa ningi ngiini? KuManfred otatu ka galukila ko nale, ihe tango natu tale shoka sha kwatelwa mo ngele tatu ningi etokolo kutya natu popye oshili nenge iifundja.

Oshili niifundja otayi kondjithathana

Petameko lyondjokonona yaantu, kehe shimwe osha li sha kankamena koshili. Kapwa li nando okupengitha oshili. Jehova, Omushiti oye Kalunga kashili. Oohapu dhe odho oshili; iha fundju noku tonde iifundja naamboka haya fundju.—Johannes 17:17; Titus 1:2.

Ngele osho shi li ngawo, iifundja oye ya po ngiini ano? Jesus Kristus okwa li a gandja eyamukulo li shi okwiinekelwa sho a li a lombwele aapataneki ye yopalongelokalunga mboka ya li ya hala oku mu dhipaga a ti: “One omu na ho omuhindadhi, one nomwa hala okulandula uuhalu waho. Oye omudhipagi okuza ketameko ye ke na nando oompoka a li moshili, oshoka muye kamu na nando oshili. Ngele ta popi iifundja, ota popi shoka shomuukwatya we mwene, oshoka oye omufundja nahe yiifundja ayihe.” (Johannes 8:44) Odhoshili kutya Jesus okwa li ta popi oshiningwanima shomoshikunino shaEden sho Satana a li a pukitha aaihokani yotango kaaya vulike kuKalunga nokungawo oya li ya ningi iihakanwa yuulunde neso.—Genesis 3:1-5; Aaroma 5:12.

Oohapu dhaJesus otadhi popi sha yela kutya Satana oye ‘he yiifundja’ nomutoti gwayo. Odhoshili kutya Satana ota tsikile e li omuyambidhidhi omunene gwiifundja nota “pukitha uuyuni auhe.” Oye e na ondjo onene omolwiifundja mbyoka ya kala nokweehameka aantu apuhe nena.—Ehololo 12:9.

Ekondjithathano pokati koshili niifundja, ndyoka lye etithwa kuSatana Ondiaboli, onkene ngaa tali tsikile natango nena. Olyi ihanene moonkalo adhihe dhaantu nolya nwetha mo kehe gumwe. Omukalo moka omuntu hi ihumbata otagu ulike kutya okwa gama kombinga yiifundja nenge okombinga yoshili. Mboka ya gama kombinga yaKalunga oya kankamekela onkalamwenyo yawo koshili yOohapu dhaKalunga, Ombiimbeli. Kehe ngoka itaa landula ondjila yoshili ota gwile miikaha yaSatana e shi shi nenge kee shi shi, molwaashoka “uuyuni auhe ou li mepangelo lyomuhindadhi.”—1 Johannes 5:19; Mateus 7:13, 14.

Omolwashike tu na egamo lyokufundja?

Oshili kutya “uuyuni auhe” ou li mepangelo lyaSatana otayi tu lombwele kutya omolwashike aantu oyendji haya fundju. Ihe otashi vulika tu pule tatu ti: ‘Omolwashike Satana “he yiifundja ayihe” e shi ningi?’ Satana oku shi kutya Jehova oye awike a gwana okukala Omupangeli gwiinima ayihe mbyoka a shita, mwa kwatelwa aaihokani yotango. Ihe nando ongaaka, Satana okwa li i ihalela ondondo ndjika yopombanda noyi ikalekelwa, oshinima shoka a li inaa gwana oku shi mona. Molwaashoka okwa li e na olwiho nokwi ihole, okwa li a hala okukutha po ondondo yaJehova. Opo Satana e shi pondole, okwa li a fundju nokwa kengelele.—1 Timoteus 3:6.

Ongiini kunena? Ito shi zimine mbela kutya olwiho nehalo lyokukala aantu ya simana oyi li natango unene oyo tayi ningitha aantu oyendji ya fundje? Aanangeshefa aanalwiho, aanapolotika ya yonuka nosho wo omalongelokalunga giifundja oyu udha omapukitho, iifundja, omathiminiko nekengelelo. Omolwashike? Mbela kashi shi molwaashoka aantu olundji ya nwethwa mo kolwiho nokehalo lyokukala ya simana opo ya ninge aayamba, ya mone oonkondopangelo nenge oondondo ndhoka inaaya gwana oku dhi mona? Omupangeli omunandunge, omukwaniilwa Salomo gwaIsraeli shonale okwa londodha aantu a ti: “Ngoka a pya ompiya okuninga omuyamba, ita kala inaa geelwa.” (Omayeletumbulo 28:20) Nomuyapostoli Paulus okwa nyola a ti: “Mohole yeliko omo tamu zi uukolokoshi auhe.” (1 Timoteus 6:10) Sha faathana otashi vulu okupopiwa kombinga yaantu mboka ya hala unene oonkondopangelo nenge oondondo.

Oshinima shilwe shoka hashi ningitha aantu ya fundje osho uumbanda wokukala ya tila iilanduliko nenge shoka yalwe taya dhiladhila ngele oya popi oshili. Paunshitwe aantu oya hala okukala ye holike nenge ya taambwa ko kuyalwe. Ihe ehalo ndika otali vulu oku yi inyengitha ya goyokithe oshili nokuli nando okashona owala, opo ya siikile omapuko gawo, ya holeke uuyelele mboka kaau shi uuwanawa u na ko nasha nayo nenge yi imonikithe kuyalwe ye li nawa. Oshe eleka sho Salomo a nyola a ti: “Okutila omuntu okulukila omwigo, ihe ngoka ti inekele OMUWA, ota gamenwa.”—Omayeletumbulo 29:25.

Okukala aadhiginini kuKalunga kashili

Manfred okwa ti shike sho omuwiliki gwehangano lyawo e mu pula kutya omolwashike kee li kootundi nonokutya yakwawo oye li peni? Manfred okwa li a popi oshili. Okwa ti: “Omulongi okwe tu zimbula kuyele nena, onkee ano onde ya kiilonga. Ihe yalwe itandi vulu oku ya popila ko. Pamwe oto vulu oku ya pula paumwene.”

Manfred okwa li ta vulu okugandja eyamukulo lyomakoto tali pukitha, opo a kale e holike kaadheulwa ooyakwawo. Ihe okwa li e na omatompelo omawanawa gokupopya oshili. Manfred oku li gumwe gwomOonzapo dhaJehova. Okukala omunashili kwe okwa li kwe mu kwathele okukala neiyuvo lya yela. Okwe mu ningitha wo a kale i inekelwa komugandji gwe gwiilonga. Shi li oshitopolwa shokudheulwa kwe, Manfred okwa li a pewa iilonga yokulonga koshikondo shuulyenge, uulinga noowili dhondilo, hoka ihaaku pitikilwa shito okulongwa kwaamboka taya dheulwa. Konima yoomvula 15 lwaampono sho Manfred a li a yelwa mokupewa ondondo yoshinakugwanithwa sha simana mehangano moka, omukuluntu oye tuu ngoka okwa li e mu dhengele ongodhi opo e mu halele omayambeko noku mu hokololele esiku ndyoka sho a li a popi oshili.

Molwaashoka Jehova oKalunga kashili, kehe ngoka a hala okukala nekwatathano lyopothingo naye oku na ‘okweetha iifundja’ nonokutya oku na ‘okulombwela mukwawo oshili.’ Omupiya gwaKalunga oku na okukala e hole oshili. Omulumentu omunandunge Salomo okwa nyola a ti: “Ombangi omwiinekelwa iha fundju.” Ihe iifundja ano oshike?—Aaefeso 4:25; Omayeletumbulo 14:5.

Iifundja oshike?

Epopyo kehe kaali shi lyoshili olyo iifundja, ihe hakehe shimwe omuntu ta popi kaashi li mondjila shi li iifundja. Omolwashike mbela? Embwiitya otali fatulula iifundja kutya oyo “okupopya shoka u shi nenge sha shoka wa tseya kutya kashi shi shoshili to shi popi nelalakano lyokupukitha gumwe.” Oshoshili kutya iifundja ohayi popiwa nelalakano lyokupukitha gumwe. Onkee ano, okupopya iifundja inaashi tegelelwa, ngaashi okupa gumwe papuko uuyelele kaau li mondjila nenge omwaalu gwa puka, inashi faathana nokupopya iifundja.

Kakele kaashono, otwa pumbwa okutala ngele omuntu ngoka ta pula uuyelele okwe eleka ngaa okupewa eyamukulo lya gwana po. Pashiholelwa, natu tye ando Manfred okwa li a pulwa omapulo ga faathana komukuluntu gwehangano lilwe. Mbela Manfred okwa li a tegelelwa oku mu lombwela kehe shimwe? Hasho nando. Molwaashoka omukuluntu ngoka ka li e na uuthemba okutseya uuyelele mboka, Manfred ka li a tegelelwa oku wu mu pa. Odhoshili kutya nokuli moshinima shika, osha li tashi ka kala sha puka kuye opo a popye iifundja.

Oshiholelwa shini Jesus Kristus a tula po moshinima shika? Pompito yimwe, Jesus okwa li a kundathana nayamwe mboka kaaye shi aalongwa ye mboka ya li ya hala okutseya mpoka ta ka ninga omalweendo. Oya li ye mu pe omayele ya ti: “Za po mpaka, u ye kuJudea.” Jesus okwa li e ya yamukula ngiini? “Ne indeni mpeyaka koshituthi [kuJerusalem]. Ngame itandi yi [manga, KB] koshituthi shika, oshoka ethimbo lyandje inali thika natango.” Mbala konima yaashoka Jesus okwa li a yi kuJerusalem omolwoshituthi shoka. Omolwashike a li a yamukula ngawo? Kaya li ye na uuthemba okutseya uuyelele wolela kombinga yaampoka Jesus ta yi. Ano nonando Jesus ka li a popi iifundja, okwa li e ya pe eyamukulo inaali ihwa po opo a yande okweehamekwa hoka tashi vulika ye mu ningile nenge aalanduli ye. Shika kasha li iifundja, molwaashoka omuyapostoli Petrus okwa li a nyola kombinga yaKristus a ti: “Oye ina yona nando; kaku na omuntu gumwe u uvu iifundja yasha tayi zi mokana ke.”—Johannes 7:1-13; 1 Petrus 2:22.

Ongiini shi na ko nasha naPetrus? Uusiku mboka Jesus a kwatwa po, mbela Petrus ka li a fundja lwiikando itatu e te mu idhimbike? Eeno, Petrus okwa li a kwatwa kuumbanda wokutila aantu e ta fundju. Ihe nziyanziya okwa li a “lili nokulililila” e ti iyele ombedhi, nomayonagulo ge oga li ga dhimwa po. Kakele kaashono, okwa li i ilongo sha mepuko lye. Konima yomasiku gontumba, okwa li a popi montaneho kombinga yaJesus nokwa li a tokola toko okwaahaetha okuuvitha sho a li a mbandamekwa kaakwanepangelo Aajuda muJerusalem. Odhoshili kutya uumbanda waPetrus mboka wa li owala wopokathimbo ou li etsomukumo kutseni atuheni mboka hatu vulu okukwatwa kuumbanda nuupu omolwokwaagwanenena e tatu puka moohapu nenge miilonga yetu.—Mateus 26:69-75; Iilonga 4:18-20; 5:27-32; Jakob 3:2.

Oshili otayi ka kala ya kola sigo aluhe

Omayeletumbulo 12:19 otaga yelitha taga ti: “Omilungu dhoshili otadhi kala dha kola sigo aluhe, ihe elaka lyiifundja olyokathimbo.” Okupopya oshili oko oshinima shaaluhe notashi kalelele. Omakwatathano gopantu ohaga kala ga kola lela noga nyanyudha ngele aantu taya kala taya popi oshili notaya katuka metsokumwe nayo. Muushili wo wene, okupopya oshili ohaku eta ondjambi pethimbo opo tuu mpoka. Oya kwatela mo eiyuvo lya yela, okukala nedhina ewanawa nekwatathano lya kola mondjokana, muukwanegumbo, pokati kookuume nokuli nomokungeshefa.

Mepingathano naashono, iifundja ihayi holama nando. Omuntu ngoka ha popi iifundja ota vulu okupukitha aantu okathimbo kowala, ihe iifundja itayi kalelele nando. Niishewe Jehova Kalunga kashili oti idhidhimikile owala iifundja naamboka taye yi humitha komeho uule wethimbo lyu uthwa. Ombiimbeli otayi uvaneke kutya Jehova ota ka hulitha po enwethomo lyaSatana Ondiaboli, he yiifundja ngoka ta pukitha uuyuni auhe. Jehova ota ka hulitha po masiku iifundja ayihe naamboka haya fundju.—Ehololo 21:8.

Itashi ka kala tuu epepelelo ngele hugunina “omilungu dhoshili” tadhi ka kala dha kola sigo aluhe!

[Enyolo lyopevi]

[Oohapu dha simana pepandja 4]

Olwiiho nehalo lyokukala aantu ya simana oyo hayi ningitha aantu oyendji ya fundje

[Ethano pepandja 5]

Epopyo kehe kaali shi lyoshili olyo iifundja, ihe hakehe shimwe omuntu ta popi kaashi li mondjila shi li iifundja