Omapulo okuza kaaleshi

Mbela ngele okanona oka sile mela lyayina, otaka ka yumuka ngaa?

Mboka inaaya silwa nando onale okanona momukalo ngoka, oshi li oshidhigu okuuva ko mboka ye shi ningilwa. Aavali yamwe ohaya kala ya nika oluhodhi noonkondo ngele ye shi ningilwa. Omala gomukulukadhi gumwe ge li gatano oga li ga gu mo. Konima yaashoka, okwa li a vala aamati ye li yaali ye na uukolele. Ihe oha dhimbulukwa omala ngoka ga gwa mo. Manga e na omwenyo oha kala e shi kutya ela ndyoka lya gwa mo nokanona hoka ka pitilila po andola oka li ke na omwenyo, ando oke na oomvula ngapi. Mbela Aakriste mboka oye na etegameno lyoku ka mona shoka ya kanitha?

Eyamukulo kepulo ndyoka olyo owala kutya katu shi wo. Ombiimbeli inayi popya nando kondandalunde kombinga yeyumuko lyaanona mboka ya pitilila po nenge shi na ko nasha nokugwa mo kwela. Nonando ongaaka, Oohapu dhaKalunga odhi na omakotampango ngoka ga pambathana nepulo ndyoka notadhi gandja ehekeleko.

Natu tale omapulo gaali ga faathana. Lyotango, uunake Jehova ha tala ko omuntu omunamwenyo, opesimbapalo nenge opokuvalwa kwe? Etiyali, mbela okanona hoka inaaka valwa Jehova ohe ka tala ko ke li omuntu nenge oke li owala ehwata lyoosele moshivalelo shayina. Omakotampango gOmbiimbeli otaga gandja omayamukulo ga yela komapulo ngoka.

Ompango yaMoses oye shi popya sha yela kutya omwenyo ohagu tameke pesimbapalo, ihe hangele okanona ka valwa. Oye shi popi ngiini? Oyu ulike kutya omuntu ota vulu okudhipagwa ngele okwa dhipaga okanona hoka ke li mela, sho ya ti kutya ‘omwenyo nagu futwe nomwenyo.’a (Eks. 21:22, 23) Onkee ano, okanona hoka ke li moshivalelo oke li okanamwenyo. Okuuva ko uushili kutya okanona ohaka tameke okukala nomwenyo manga ke li moshivalelo okwa kwathela Aakriste omamiliyona kaayi ikuthe omala, molwaashoka oye shi shi kutya oshi li eyono lya kwata miiti koshipala shaKalunga.

Ngaashi sha popiwa metetekelo okanona hoka inaaka valwa oke na omwenyo, ihe mbela omwenyo ngoka ogu na ngaa ongushu kuJehova? Ompango ndjoka ya popiwa metetekelo otayi ti kutya omuntu ngele okwe etitha eso lyokanona hoka inaaka valwa, oku na okudhipagwa. Ano osha yela kutya omwenyo gwokanona inaaka valwa ogu na ongushu onene koshipala shaKalunga. Natango Omanyolo ogendji otagu ulike kutya Jehova okwa tala ko okanona hoka inaaka valwa ke li omuntu. Pashiholelwa, omukwaniilwa David okwa li a nwethwa mo a popye kombinga yaJehova ta ti: “Owa tungile ndje mela lyameme. . . . Owa mono ndje, manga inaandi valwa. Omasiku nde ga uthilwa, agehe oga nyolelwa membo lyoye.”—Eps. 139:13-16; Job 31:14, 15.

Jehova oha mono wo kutya okanona hoka inaaka valwa oke na omaukwatya omawanawa notashi vulika ke ke shi endithe nawa monakuyiwa. Manga Rebekka omukulukadhi gwaIsak a li metegelelo lyaakwana, Jehova okwa li a hunganeke kombinga yaamati yaali taya kondjo moshivalelo she, nokwa popi kutya okwa mona nale omaukwatya ngoka ye na taga ka nwetha mo aantu oyendji monakuyiwa.—Gen. 25:22, 23; Rom. 9:10-13.

Oshiholelwa shaJohannes Omuninginithi oshihokitha wo. Ehokololo lyEvaangeli otali ti: “Elisabet sho u uvu epopitho lyaMaria, okanona oka nyulukuta mela lye. Opo Elisabet oku udha Ombepo Ondjapuki.” (Luk. 1:41) Mokuhokolola oshiningwanima shika, ndohotola Lukas okwa li a longitha oshitya shOshigreka shoka tashi vulu okuulika kokanona inaaka valwa nenge kwaahoka opo ka valwa. Okwa li a longitha uutumbulilo wa faathana sho a popi okanona Jesus hoka ka li ka lala metemba lyokulila iimuna.—Luk. 2:12, 16; 18:15.

Okutala kwaayihe mbyoka ya popiwa, mbela Ombiimbeli oya popya kutya opu na eyooloko enene pokati kokanona hoka ke li moshivalelo naahoka opo ka valwa? Hasho. Naashoka otashi tsu kumwe nuunongononi wokunena. Pashiholelwa, aakonakoni oye shi mona mo kutya okanona hoka ke li moshivalelo ohaka vulu okuuva omainyengo kondje yoshivalelo. Onkee ano, itashi kumitha sho omukulukadhi ngoka e li metegelelelo ha kala e na ekwatathano lyopothingo nokanona hoka ke li mepunda lye.

Ethimbo ndyoka aanona haya kala moshivalelo manga inaaya valwa, olya yoolokathana. Tala koshiholelwa shika: Omukulukadhi gumwe okwa vala okanona ethimbo inaali thika e taka si konima yomasiku omashona. Omuvali gulwe okwa li i ihumbata uule woomwedhi omugoyi, ihe okanona ke oka si sho ka li ke li pokuvalwa. Mbela omuvali gwotango oku na etegameno kutya okanona ke otaka ka yumudhwa molwaashoka ka valwa ethimbo inaali thika omanga ngoka omutiyali kee na etegameno ndyoka?

Oku shi popya paufupi, Ombiimbeli otayi longo sha yela kutya omwenyo ohagu tameke pesimbapalo nosho wo kutya Jehova okwa tala ko okanona hoka inaaka valwa ke li omuntu nokwe ka yalula. Omolwuushili mboka, yamwe otashi vulika ya kale ye wete kutya itashi tsu kumwe nOmbiimbeli okwiitaala kutya kaku na eyumuko lyaanona mboka ya sila mela. Dhoshili, otashi vulika ya kale yu uvite kutya okwaatsa kumwe hoka otaku etitha omalimbililo shi na ko nasha netaloko lyetu lyopamanyolo lyokwaaikutha ela ndyoka lya kankamena kooshili ndhoka.

Moshifo shika omwa holokele omapulo ge na oshilonga ngoka ga li ge etitha omalimbililo kombinga yaanona mboka ya sila mela ngele otaya ka yumudhwa ngaa. Pashiholelwa, mbela Kalunga ota ka tula okanona hoka moshivalelo shayina mOparadisa? Onkee ano, mokutsikila okukonakona, okutedhathedha nokugalikana, Olutuwiliki olwa thiki pehulithodhiladhilo kutya omadhiladhilo ga tya ngaaka itaga ti kutya kapu na etegameno lyeyumuko. Jesus okwa ti: “Kalunga iha nyengwa kusha.” (Mark. 10:27) Oshiholelwa shaJesus mwene osha li shu ulike oshili yoohapu ndhoka, molwaashoka omwenyo gwe ogwa li gwa tulwa moshivalelo shokakadhona Maria okuza megulu, oshinima shoka tashi monika sha fa itaashi vulu okuningwa pataloko lyopantu.

Mbela ashihe shika twa lesha mpaka osha hala okutya Ombiimbeli otayi longo kutya aanona mboka ya sila mela otaya ka yumudhwa? Otu na okutsa omuthindo kutya Ombiimbeli inayi yamukula epulo ndyoka shu ukilila, onkee ano, aantu itaya vulu naanaa okutya otashi ka ningwa. Oshinima shika otashi vulika tashi pendutha omapulo gi ili nogi ili kaage na ehulilo. Ihe nando ongawo, oshi li pandunge tu yande okufekela. Shoka tu shi osho owala kutya, oshinima shoka oshi li momake gaJehova Kalunga, ngoka omunahole nomunesilohenda. (Eps. 86:15) Kapu na omalimbililo kutya okwa halelela okukutha po eso okupitila meyumuko. (Job 14:14, 15) Otatu vulu okukala nuushili kutya oha ningi aluhe shoka shi li mondjila. Ota ka aludha iilalo oyindji mbyoka twa ningwa konkalamwenyo ndjika yonkalelo yuukolokoshi sho ta ka lombwela Omwana “a hanagule po iilonga yomuhindadhi.”—1 Joh. 3:8.

[Enyolo lyopevi]

[Ethano pepandja 23]

Jehova ota ka aludha uuwehame auhe mboka tu na