Owu tonde ngaa shoka sha puka?
‘Ngoye Jesus owu tonde shoka sha puka.’—HEB. 1:9.
1. Jesus okwa li a longo aalanduli ye shike kombinga yohole?
OPO a tse omuthindo nkene sha simana okukala tu na ohole, Jesus Kristus okwa li a lombwele aalongwa ye a ti: “Oshipango oshipe otandi shi shu mú pe, mu holathane. Ngashika naanaa [nangame] nda kala ndi mú hole, osho nane wo omu na okuholathana. Ngele mu holathane, nena aantu ayehe otaa ka dhimbulula kutya one aalongwa yandje.” (Joh. 13:34, 35) Jesus okwa li a lombwele aalanduli ye kutya oye na okukala ye holathane nohole yokwaaihola mwene. Ohole ndjoka oyo ya li tayi ke ya ndhindhilikitha. Jesus okwa li wo e ya kumagidha a ti: “Holeni aatondi yeni, galikaneneni aahepeki yeni.”—Mat. 5:44.
2. Aalanduli yaKristus oye na okukala ye tonde shike?
2 Ihe kakele kokulonga aalongwa ye kombinga yohole, Jesus okwa li wo e ya longo shoka ye na okukala ye tonde. Kalunga okwa li a popi kombinga yaashoka shi na ko nasha naJesus a ti: “Ongoye ou hole shoka shu uka nou tonde shoka sha puka [uukolokoshi].” (Heb. 1:9; Eps. 45:7) Shika otashi ulike kutya katu na owala okukala tu hole okulonga shoka shu uka, ihe otu na wo okukala tu tonde uulunde nenge shoka sha puka. Oshindhindhilikwedhi osho kutya omuyapostoli Johannes okwa li unene tuu ta ti: “Kehe ngoka ta yono, oye oku na ondjo yokuyona ompango yaKalunga, oshoka uulunde owo okuyona ompango.”—1 Joh. 3:4.
3. Oshitopolwa shika otashi ka kundathana kombinga yoombinga ne dhini dhonkalamwenyo, yi na ko nasha nokutonda shoka sha puka?
3 Tu li Aakriste otatu ningi nawa ngele tatu ipula tatu ti: ‘Mbela ondi tonde ngaa shoka sha puka?’ Natu konakoneni nkene tatu vulu okuulika kutya otu tonde shoka sha puka moombinga ne tadhi landula dhonkalamwenyo: (1) iikala yetu yi na ko nasha nokulongitha nayi iikolitha, (2) etaloko lyetu li na ko nasha nokutala ko uumpulile, (3) einyengo lyetu kombinga yoluhondelo nosho wo (4) shi na ko nasha nankene twa tala ko mboka ye hole shoka sha puka.
Ino kala wa pikwa kiikolitha
4. Omolwashike Jesus a li ha popi a manguluka uuna ta londodha aantu kombinga yokulongitha iikolitha?
4 Jesus omathimbo gamwe okwa li ha nu omaviinu molwaashoka oku shi shi kutya oge li omagano ga za kuKalunga. (Eps. 104:14, 15) Ihe ke na nando esiku limwe a longithile nayi omagano ngaka mokunwa iikolitha sha pitilila. (Omayel. 23:29-33) Onkee ano, okwa li ha popi a manguluka uuna ta gandja omayele kombinga yoku yi longitha nayi. (Lesha Lukas 21:34.) Okulongitha nayi iikolitha otaku vulu okuningitha omuntu a longe uulunde wulwe wa kwata miiti. Osho molwaashono omuyapostoli Paulus a nyola a ti: “Inamu kolwa komaviinu, oshoka uunkolwi otau mú etele oshiponga, ihe udheni Ombepo Ondjapuki.” (Ef. 5:18) Okwa li wo a kumagidha oonekulu aakokele megongalo kaaya kale “oombwiyi dhiikolitha.”—Tit. 2:3.
5. Omapulo geni mboka ya hogolola okunwa iikolitha ye na okwiipula?
5 Ngele to hogolola okunwa iikolitha, oshi li wo nawa okwiipula to ti: ‘Mbela ondi na ngaa iikala ya fa yaJesus shi na ko nasha niikolitha? Ngele tandi gandja omayele kaantu yalwe shi na ko nasha nayo, mbela ohandi popi nda manguluka? Mbela ohandi nu iikolitha opo ndi yande omaipulo? Mbela ohandi yi nu shi thike peni moshiwike kehe? Ohandi inyenge ngiini uuna gumwe ta lombwele ndje kutya ohandi nu sha pitilila? Mbela ohandi ipopile nenge ndi mu kwatele nokuli onkone?’ Ngele otwe etha tu ninge aapika yiikolitha, otashi vulika shi ke tu ningithe tu kale ihaatu tompathana we pandunge noihaatu ningi omatokolo ga dhiladhilwa nawa. Aalanduli yaKristus oye na okukambadhala okugamena okudhiladhila kwawo.—Omayel. 3:21, 22.
Yanda uumpulile
6, 7. (a) Ongiini Jesus a li u ungaunga naSatan noompwidhuli? (b) Omolwashike uumpulile wu li apuhe kunena?
6 Sho Jesus a li kombanda yevi okwa li a kondjitha Satana noompwidhuli dhe a mana mo. Okwa li a kondjitha Satana sho a li e mu ponokele shu ukilila opo ando a yone po uudhiginini we. (Luk. 4:1-13) Okwa li wo a ndhindhilike mo oonkambadhala dhe dhiineya dhokunwetha mo okudhiladhila kwe nosho wo iilonga ye nokwe dhi kondjitha. (Mat. 16:21-23) Jesus okwa li a kwathele mboka ya gwana sho a tidha muyo oompwidhuli ndhoka dha li hadhi ya monitha iihuna.—Mark. 5:2, 8, 12-15; 9:20, 25-27.
7 Konima sho Jesus a langekwa po e li Omukwaniilwa mo 1914, okwa li o opaleke megulu kokunyatekwa kenwethomo lyaSatana noompwidhuli dhe. Oshilanduliko, ngashingeyi Satana ota “pukitha uuyuni auhe” shi vulithe nale. (Eh. 12:9, 10) Ano kashi na oku tu kumitha sho uumpulile wu li kehe pamwe notawu indjipala. Mbela oshike tu na okuninga opo tu igamene?
8. Eikonakono lini kehe gumwe gwomutse e na okuninga shi na ko nasha nokuhogolola omainyanyudho?
8 Ombiimbeli otayi londodha aantu sha yela kombinga yiiponga yi na ko nasha nuumpulile. (Lesha Deuteronomium 18:10-12.) Kunena Satana noompwidhuli dhe otaya nwetha mo okudhiladhila kwaantu okupitila moomuvi, momambo nosho wo miinima yopaelektronika mbyoka tayi humitha komeho uumpulile. Onkee ano, uuna tatu hogolola omainyanyudho, kehe gumwe gwomutse oku na okwiipula ngeyi: ‘Mbela oomwedhi dha piti onda li nda hogolola ndi inyanyudhe noofilima, noopolohalama dhoko-TV, nomambo nenge niiyolitha tayi tsu omuthindo uumpulile? Mbela ondu uvite ko kutya osha simana okweekelahi enwethomo li na ko nasha nuumpulile nenge ohandi ipwililikile iiponga mbyoka tawu eta? Mbela ohandi ipula ngaa nkene Jehova ta ka kala u uvite kombinga yehogololo lyandje shi na ko nasha nomainyanyudho? Ngele onde etha ndi nwethwe mo kuSatana, mbela ohole yandje yokuhola Jehova nomithikampango dhe dhuuyuuki otayi ki inyengitha ndje ngaa ndi katuke onkantu yopandunge nondi ekelehi omanwethomo ngoka?’—Iil. 19:19, 20.
Pulakena kelondodho lyaJesus kombinga yoluhondelo
9. Ongiini tashi vulika omuntu a kokeke ohole yokuhola shoka sha puka?
9 Jesus okwa li a dhiginine omithikampango dhaJehova dhuuyogoki wopamilalo. Okwa ti: “Inamu lesha nani kutya petameko Omushiti okwe ya shiti omulumentu nomukiintu? ‘Onkee ano omulumentu e na okuthiga po he nayina e ti ihanganitha nomukiintu gwe, ayehe yaali e taa ningi omuntu gumwe.’ Kaye li we yaali, aawe, oyo omuntu gumwe. Ano shono Kalunga e shi tula kumwe, inashi kuthwa kumwe komuntu.” (Mat. 19:4-6) Jesus okwa li a tseya kutya shoka hatu tala otashi vulu okunwetha mo omitima dhetu. Onkee ano, okwa popi mEuvitho lye lyOkondundu a ti: “One omu uvu kwa tiwa: ‘Ino hondela.’ Ihe ngame otandi mú lombwele: Okehe tuu ngoka ta tala omukiintu e mu haluka, oye okwe mu hondele momwenyo gwe.” (Mat. 5:27, 28) Mboka tayi ipwililikile elondodho lyaJesus, muushili wo wene, otaya humitha komeho ohole yokuhola shoka sha puka.
10. Hokolola oshimoniwa shoka tashi ulike kutya omuntu ota vulu okweetha po okutala omathano giiipala.
10 Satana oha humitha komeho ohole yokuhola oluhondelo okupitila momathano giipala. Muuyuni kunena omu udha ohole yokuhola oluhondelo. Mboka haya tala omathano giipala ohaya mono oshidhigu okudhima mo omathano ngoka momadhiladhilo gawo. Otaya vulu nokuli okupikwa kugo. Natu tale shoka sha li sha ningilwa Omukriste gumwe. Okwa ti: “Onda li handi tala omathano giiipala meholamo. Onda li nda tameke okukutha ombinga momainyanyudho ngoka nda li ndi wete kutya ogi imba ndje okulongela Jehova. Onda li ndi shi shi kutya iilonga mbyoka oya puka, ihe onda li ndi ifundjaleke kutya okulongela kwandje Kalunga otaku taambiwa ko natango.” Mbela oshike sha li sha lundulula okudhiladhila kwomumwatate nguka? Okwa popi a ti: “Nonando osha li oshinima oshidhigu noonkondo shoka inaandi ninga nando onale, onda li nda tokola okutseyithila aakuluntugongalo uupyakadhi wandje.” Lwahugunina omumwatate nguka okweetha po omukalondjigilile nguka omwiinayi. Okwa li e shi zimine a ti: “Sho nda li ndo opaleke onkalamwenyo yandje, lwahugunina onda li ndi wete kutya ondi na lela eiyuvo lya yela.” Mboka ye tonde shoka sha puka oye na okwiilonga okutonda omathano giipala.
11, 12. Ongiini tatu vulu okuulika kutya otu tonde shoka sha puka ngele tashi ya pokuhogolola oomusika?
11 Oomusika noongowela dhadho otadhi vulu okunwetha mo noonkondo omaiyuvo getu, sha hala okutya, omutima gwetu gwopathaneko. Omusika oyi li omagano ga za kuKalunga noya kala hayi longithwa okuza nale melongelongelokalunga lyashili. (Eks. 15:20, 21; Ef. 5:19) Ihe uuyuni waSatana ohawu humitha komeho oomusika ndhoka tadhi tanga oluhondelo. (1 Joh. 5:19) Ongiini to vulu okutseya kutya oomusika ndhoka ho pulakene otadhi ku nyateke nenge hasho?
12 Otashi vulika wu tameke okwiipula to ti: ‘Mbela omaimbilo ngoka handi pulakene ohaga tanga edhipago, eyonondjokana, oluhondelo nosho wo okusheka Kalunga? Mbela ando ondi leshele omuntu gwontumba oohapu ndhoka, mbela omuntu ngoka ota ka dhiladhila kutya ondi tonde shoka sha puka nenge oohapu ndhoka otadhi ku ulika kutya omutima gwandje ogwa nyatekwa kudho?’ Itatu vulu okutya otu tonde shoka sha puka omanga tatu hogolola okupulakena oomusika ndhoka tadhi tanga shoka sha puka. Jesus okwa ti: “Shoka tashi piti mokana, otashi zi momwenyo. Osho shoka tashi nyateke omuntu. Oshoka momwenyo ohamu zi omadhiladhilo omawinayi, omadhipago, uuholume, oluhondelo, uufuthi, omalundilathano nokusheka.”—Mat. 15:18, 19, yelekanitha Jakob 3:10, 11.
Kala ho tala ko mboka ye hole shoka shu uka ngaashi Jesus
13. Jesus okwa li a tala ko ngiini mboka omitima dhawo dha li dha kukutila muulunde?
13 Jesus okwa ti kutya okwa li e ya muuyuni okwiithana aalunde nenge mboka haya longo shoka sha puka opo yi itedhulule. (Luk. 5:30-32) Ihe okwa li a tala ko ngiini mboka omitima dhawo dha kukutikwa kuulunde? Jesus okwa li a gandja elondodho lya kwata miiti kombinga yokunwethwa mo kaantu ya tya ngaaka. (Mat. 23:15, 23-26) Okwa popi wo sha yela a ti: “Hakehe ngoka ti ithana ndje ‘Omuwa, Omuwa’, ta yi mOshilongo shegulu, aawe, oye tuu ngoka ta gwanitha ehalo lyaTate yomegulu. Mesiku ndyoka oyendji otaa ka lombwela ndje taa ti: ‘Omuwa, Omuwa! Hatse tuu mboka tu uvitha medhina lyoye notwa tidha mo oompwidhuli medhina lyoye notwa longo iilongankondo oyindji medhina lyoye?’ Nena ongame tandi ya lombwele: ‘Kandi mú shi noshitonale. Zii po pungame, one aakolokoshi!’” (Mat. 7:21-23) Omolwashike te ke ya pangula? Omolwaashoka ihaya simaneke Kalunga nohaya ningile yalwe uuwinayi mokulonga shoka sha puka.
14. Omolwashike aayoni inaayi iyela ombedhi ye na okukondwa mo megongalo?
14 Oohapu dhaKalunga otadhi popi kutya aayoni inaayi iyela ombedhi naya kondwe mo megongalo. (Lesha 1 Aakorinto 5:9-13.) Aayoni oya pumbwa okukondwa mo megongalo omolwomatompelo gatatu: (1) opo kaaya shekithe edhina lyaJehova, (2) opo kaaya nyateke egongalo nosho wo (3) opo shi ya kwathele yi iyele ombedhi ngele tashi vulika.
15. Ngele otwa hala okukala aadhiginini kuJehova, omapulo geni ga kwata miiti tu na okwiipula?
15 Mbela ohatu tala ko mboka haya longo shoka sha puka ngaashi Jesus he ya tala ko? Otwa pumbwa okwiipula omapulo ngaka: ‘Mbela ondi na omukalondjigilile gwokweendathana naangoka a kondwa nenge ngoka i iteta ko kegongalo lyopaKriste? Ongiini ngele omuntu ngoka a kondwa omupambele, ihe ihatu kala megumbo limwe naye?’ Onkalo ya tya ngaaka otayi vulu lela okumakela ohole yetu yokuhola shoka shu uka nosho wo uudhiginini wetu kuKalunga.a
16, 17. Omukriste gumwe omuvali okwa li e na uudhigu washike, noshike sha li she mu kwathele a kale a simaneka elongekidho lyokukonda omuyoni ini iyela ombedhi?
16 Tala koshimoniwa shomumwameme ngoka omwanamati omukuluntu a li e hole Jehova. Ihe konima yethimbo, okwa li a longo shoka sha puka noini iyela ombedhi. Onkee ano, okwa li a kondwa mo megongalo. Omumwameme nguka okwa li e hole Jehova, ihe okwa li wo e hole omwanamati nokwa li a mono oshidhigu noonkondo okutula miilonga elombwelo lyopamanyolo kutya oku na okuyanda okweendathana naye.
17 Mbela omayele geni ando wa pe omumwameme nguka? Omukuluntugongalo gumwe okwa li e mu kwathele a mone kutya Jehova oku uvite ko uuwehame mboka e na. Omumwatate okwa li e mu pula a dhiladhile kombinga yuuwehame mboka Jehova a li e na sho yamwe yomoyanamati yopambepo ya li ye mu tukululile oshipotha. Omukuluntugongalo okwa li a tompathana nomumwameme nguka kutya nokuli nonando ongaaka Jehova oku shi kutya onkalo ya tya ngaaka oyiehameka shi thike peni, okwa tegelela aayoni mboka inaayi iyela ombedhi ya kondwe mo megongalo. Omumwameme okwa li a taamba ko omayele ngoka nokwa li a simaneke elongekidho li na ko nasha nokukonda.b Uudhiginini wa tya ngaaka ohawu nyanyudha omutima gwaJehova.—Omayel. 27:11.
18, 19. (a) Ngele tatu kala ihaatu endathana naangoka a longa shoka sha puka otatu ka gandja uunzapo kutya otu tonde shike? (b) Oshike tashi vulu okuningwa po ngele otwa kala aadhiginini kuKalunga nokelongekidho lye?
18 Uuna wu li monkalo ya faathana, dhimbulukwa kutya Jehova oha kala e ku uvitile olukeno. Ngele to kala ihoo endathana naangoka a kondwa, nena oto ulike kutya owu tonde iikala ye nosho wo iilonga mbyoka ye mu konditha. Ihe oto ulike wo kutya owu hole omuyoni ngoka nomolwaashoka wa hala a galukile kuJehova.
19 Omuntu gumwe ngoka a li a kondwa nokonima yethimbo okwa galuka okwa nyola a ti: “Onda nyanyukwa sho Jehova e hole oshigwana she noha shilipaleke opo ehangano lye li kale lya yela. Oshike tashi vulika shi monike kaashi li nawa kaantu yopondje, ihe osha pumbiwa noshi li lela oshinima oshiwanawa okuninga.” Mbela ando iilyo yegongalo nosho wo yuukwanegumbo womuntu ngoka oya li hayi endathana naye pandjigilile pethimbo ndyoka a li a kondwa, mbela ando oto dhiladhila kutya omuntu ngoka okwa ka thika ngaa pehulithodhiladhilo lya tya ngaaka? Okuyambidhidha kwetu elongekidho lyopamanyolo li na ko nasha nokukonda otaku gandja uunzapo kutya otu hole shoka shu uka notu shi shi kutya Jehova oye e na uuthemba wokutula po omithikambango dhopamikalo.
‘Kala wu tonde uuwinayi’
20, 21. Omolwashike sha simana okwiilonga okutonda shoka sha puka?
20 Omuyapostoli Petrus ota londodha Aakriste ta ti: “Kotokeni ne mu tonate!” Omolwashike? Omolwaashoka “Omutondi gweni Satana ohe mú kundukidha, ta ndunduma a fa onime, ta kongo omuntu gwontumba, e mu ketsule po.” (1 Pet. 5:8) Omuntu gwontumba ngoka mbela ongoye? Oshindji oshi ikolelela kokwiilonga kwoye nawa okutonda shoka sha puka.
21 Kashi shi oshipu okutonda shoka oshiwinayi. Otwa valwa muulunde notu li muuyuni mboka tawu tu ladhipike tu landule omahalo gonyama yetu. (1 Joh. 2:15-17) Ihe ngele tatu holele Jesus Kristus notatu kala tu na ohole yomuule yokuhola Jehova Kalunga, otatu vulu okupondola mokukala tu tonde shoka sha puka. Natu kale twa tokola toko ‘okutonda uuwinayi’ tu na einekelo kutya Jehova “ota gamene aantu ye note ya hupitha miikaha yaakolokoshi.”—Eps. 97:10.
[Omanyolo gopevi]
a Opo wu mone uuyelele wa gwedhwa po wu na ko nasha naashika, tala Oshungolangelo yOshiingilisa yo 25 Septemba 1981, epandja 26-31.
b Tala wo Oshungolangelo yOshiingilisa ye 1 Januali 2007, epandja 17-20.
Oto yamukula ngiini?
• Oshike tashi ke tu kwathela tu konakone iikala yetu yi na ko nasha niikolitha?
• Oshike tatu vulu okuninga opo tu igamene kuumpulile?
• Omolwashike okutala omathano giipala kwa nika oshiponga?
• Ongiini tatu vulu okuulika kutya otu tonde shoka sha puka uuna gumwe ngoka tu hole a kondwa?
[Ethano pepandja 29]
Ngele owa hogolola okunwa iikolitha, oshike wu na okukonakona?
[Ethano pepandja 30]
Kala wa kotokela omanwethomo gaSatana ngoka haga zi momainyanyudho
[Ethano pepandja 31]
Ngoka ha tala omathano giipala oha kokeke ohole yashike?