Aantu otaya kongo omayamukulo
“Konyala omuntu kehe oku na edhiladhilo lya yooloka kombinga yaJesus. Kutya nduno eitaalo lyetu oli thike peni, ohatu iyadha tatu pula tatu ti: ‘Omulumentu nguka olye?’”—OMUNYOLI STAN GUTHRIE.
AANTU oya hala okutseya lela kutya Jesus olye. Omambo noomuvi ndhoka tadhi popi kombinga ye ohadhi landwa nodhi holike kaantu oyendji. Ihe nonando ongaaka, aantu onkee ngaa natango ye na omapulo kombinga yaJesus. Oye na omaetopo ga yoolokathana kutya Jesus okwa li lye naanaa.
Oomvula dhontumba opo dha piti, aatoolinkundana yaali oya li ya pula aantu ya yamukule epulo kOintaneta ta li ti: “Jesus okwa li lye naanaa?” Gamwe gomomayamukulo oongaka taga landula mpaka:
● “Anuwa okwa li rabbi (omulongi) ngoka a li e na olukeno monkalamwenyo ye.”
● “Okwa li omuntu ngaashi aantu ooyakwawo ngoka a longa iilonga mbyoka kaapu na nando omuntu gulwe a li e yi longo.”
● “Kapu na shoka tashi ulike kutya Jesus oko a li shili.”
● “Jesus Omwana gwaKalunga ngoka a valwa, a si, e ta yumuka kuusi e tu hupithe mo muulunde wetu. Oko e li nonena, note ke ya kombanda yevi ishewe.”
● “Ngame ondi itaala kutya Jesus Kristus oye omwana awike gwaKalunga, e li molupe lwopanyama noku li wo molupe lwopambepo.”
● “Omuntu ngoka i itaala muJesus ota dhiladhila a fa okanona.”
Osha yela kutya omayamukulo ngoka itashi vulika ga kale agehe ge li mondjila. Mbela opu na ngaa onzo yi shi okwiinekelwa tayi vulu okugandja omayamukulo gomondjila kombinga yaJesus? Aanyanyangidhi yoshifo shika oyi itaala kutya Ombiimbeli oyo Oohapu dhaKalunga noyo owala tayi vulu oku tu lombwela oshili yi ihwa po kombinga yaJesus.a—2 Timoteus 3:16.
Moshitopolwa tashi landula, otatu ka tala nkene Ombiimbeli ya yamukula omapulo ngoka haga pulwa kaantu oyendji kombinga yaJesus. Ye mwene okwa popi a ti kutya ehupitho ‘olyashaangoka te mu itaale.’ (Johannes 3:16) Otatu ku indile wu konakone omayamukulo ngoye wu tokole ngele owa pumbwa okwiilonga kombinga yaJesus nankene to vulu okukala we mu itaala.
[Enyolo lyopevi]
a Opo wu mone uuyelele wa gwedhwa po, tala ontopolwa 2, “Ombiimbeli oyo embo lya za kuKalunga,” membo Omalongo gashili gOmbiimbeli ogeni naanaa? lya nyanyangidhwa kOonzapo dhaJehova.