“Eyuvimumvo epe — Oli ku nine onakuyiwa ya tya ngiini?”

¹ Epulo ndika olya kala li li momadhiladhilo gaantu muuyuni auhe. Nonando aantu oya li ya tsakanitha oshindji omathelemimvo ga piti, aantu oya kala ya yemata molwashoka omaupyakadhi omanene ngoka ga kala taga hepeke aantu uule womayovimimvo opo ge li natango. (Job 14:1; Eps. 90:10) Openi mbela aantu taya vulu okwaadha epepelelo?

² Pethimbo lyomwedhi Oktoba nosho wo Novomba, otatu ka kala tu na ompito yi ikalekelwa okugandja eyamukulo lyepulo ndyoka kooyakwetu. Ngiini? Okupitila mokutaandeleka Onkundana yUukwaniilwa Onomola 36. Oyi na oshipalanyolo “Eyuvimumvo epe — Oli ku nine onakuyiwa ya tya ngiini?” Omasiku gopetameko gaOktoba otatu ka gandja iifo yOshungonangelo noAwake! Opo nduno okuza mOmaandaha, 16 Oktoba, sigo Etitano, 17 Novomba, otatu ka kutha ombinga metaandeleko lyokwakola lyOnkundana yUukwaniilwa Onomola 36. Pethimbo lyoshikonga shika, otatu ka gandja eitulomo kokugandja Onkundana yUukwaniilwa Onomola 36 moshiwike. Momahuliloshiwike, otatu ke yi gandja pamwe niifo iipe.

³ Oto ka kala u na mo ombinga yu udha? Aakuluntugongalo, aayakuligongalo nosho wo aakokolindjila otaya ka kala ye na ombinga onene moshikonga shika, oshoka oyo taya ka kwatela komeho miilonga mbika. Aauvithi oyendji oya lundulula oonkalo dhawo okuninga uukwathelikokolindjila omwedhi gumwe nenge adhihe mbali pethimbo lyetaandeleko ndika. Yamwe oya dhiladhila okulongitha ethimbo olindji li vulithe pulyoshito miilonga yomomapya.

⁴ Aakwatelikomeho yEkonakono lyEmbo lyEgongalo otaya vulu okuladhipika kehe gumwe gwokongundu yawo a kale e na ombinga yu udha metaandeleko lyOnkundana yUukwaniilwa Onomola 36. Otashi vulika pu na aauvithi yamwe mboka ihaaya longo sha we miilonga yeuvitho. Aakuluntugongalo oye na oku ya talela po ya tale shoka taya vulu okuninga opo ye ya kwathele. Otashi vulika pu ningwe omalongekidho opo moomwedhi ndhino omuntu kehe ngoka ihaa longo sha we a ye miilonga yomomapya pamwe nomuuvithi a pyokoka. Omukalo omupu gwokugandja Onkundana yUukwaniilwa Onomola 36 otashi vulika ogwo owala gwa pumbiwa okuyambula po aauvithi mbaka.

⁵ Shika otashi ka kala wo ompito ombwanawa kaakonakonimbimbeli mboka ye li pokumana ko embo Ontseyo noya gwana okukala aauvithi inaaya ninginithwa opo ya tameke okukala nombinga miilonga yomomapya. Nokuli aagundjuka otaya vulu okukala nombinga onene miilonga mbika yituntula.

⁶ Oohapu oompu odho owala dha pumbiwa. Oto vulu okutya:

◼ “Otandi longitha ethimbo lyandje nehalo ewanawa mokukwathela okutaandeleka etumwalaka ndika lya simana unene kuukwanegumbo kehe mo. . . [edhina lyoshilando nenge lyondoolopa]. Haka okoye. Alikana ka lesha.” Otashi vulika shi li nawa u kale waahe na ondjato yomomapya ngele to taandeleke Onkundana yUukwaniilwa Onomola 36.

⁷ Okugongala kwiilonga yomomapya kwa longekidhwa nawa: Aakuluntugongalo oye na okusa oshimpwiyu opo omalongekidho gokugandja uunzapo agehe ga kale ge li nawa notaga kwatha. Omutonateli gwiilonga oye unene tuu e na okushilipaleka kutya opu na oshitopolwa sha gwana okulonga egumbo negumbo nosho wo shoongeshefa opo kehe gumwe a vule okukutha ombinga yu udha miilonga mbika. Mpoka tashi wapa, okugongala kwiilonga yomomapya oku na okuunganekwa mesiku kehe lyomokati koshiwike, momahuliloshiwike nosho wo koongulohi. Omalongekidho otaga vulu okuningwa okutsakanena komatango okukwathela aanasikola, aaniilonga mboka haya longo tayi iyakaula nosho wo yalwe.

⁸ Shoka shi na okuningwa naamboka kaaye po pegumbo: Elalakano lyetu olyo okupopya naakwanegumbo oyendji ngaashi tashi vulika. Ngele pegumbo kapu na omuntu sho to ya po, nyola oandelesi e to yi ko pomathimbo gi ili nogi ili omutenya. Ngele oshiwike shahugunina shoshikonga ino shi pondola okuninga ekwatathano naanegumbo mbaka, oto vulu oku ya thigila Onkundana yUukwaniilwa Onomola 36 we yi tula pehala ndyoka itaali monika kaaendipo. Aakuluntugongalo yopune otaya vulu okulombwela egongalo li thige Onkundana yUukwaniilwa Onomola 36 pomagumbo mpoka kaapu na aantu petalelopo lyotango uuna tapu longwa moshitopolwa shoka shaahe li metonatelo lyegongalo nenge shokomikandi nosho wo pomahala galwe moka mu na iitopolwa oyindji itaayi vulu okumanwa pethimbo lyoshikonga.

⁹ Natu kaleni twi ipyakidhila! Omagongalo oge na okukambadhala okumana ko oshitopolwa shago manga oshikonga inaashi hula mo 17 Novomba. Ngele oshitopolwa sheni oshinene noonkondo, aauvithi yalwe otaya vulu okulonga oyo ayeke mpoka shika tashi longo nongele shi li egameno kuyo. Elongekidho ndika otali ke shi ninga oshipu ngaashi tashi vulika okuthika koyendji mboka ya gwana. Shilipaleka kutya owa nyola omadhina gaayehe mboka wa mona ye na ohokwe.

¹⁰ Aakuluntugongalo oye na okutala kutya iifo yi thike peni ya gwedhwa po egongalo tali ka pumbwa noku yi mbesitela shi thike mpoka sha pumbiwa. Aakokolindjila yi ikalekelwa, yondjigilile nosho wo aakwathelikokolindjila kehe gumwe ota ka pewa uutraktate 250 wOnkundana yUukwaniilwa Onomola 36 wokutaandeleka, omanga aauvithi megongalo kehe gumwe ta ka pewa uutraktate 50. Ano owi ilongekidha mbela nou na ehalo okukala wi ipyakidhila miilonga mbika yi ikalekelwa? Katu na tuu uuthembahenda okutseyithila ooyakwetu shoka Kalunga u uvanekela onakuyiwa yi li popepi!