Nkene aatonateli yekonakono lyembo lyomegongalo hayu ulike ohokwe paumwene

¹ Ekonakono lyEmbo lyomEgongalo olya longekidhwa nelalakano oku shi ninga “tashi wapa opo eitulomo lyopaumwene olindji li gandjwe kekoko lyopambepo lyahandimwe kehe. . . . Mpaka opu na euliko lyohole yuunambili yaJehova nosho wo okusila kwe oshimpwiyu nolukeno oshigwana she.” (om p. 75; Jes. 40:11) Omutonateli gwekonakono lyembo ota dhana onkandangala ya simana mokugandja eitulomo paumwene lya tya ngaaka.

² Pekonakono lyembo: Molwashoka oongundu dhekonakono lyembo odha ningwa oonshona nelalakano, omutonateli gwekonakono lyembo ota vulu okutseya nawa oshilyo kehe shomongundu ye. (Omayel. 27:23) Olundji oshiwike kehe opu na oompito dhokweendathana naamwatate komeho nokonima yekonakono. Momukokomoko gwomwedhi, ota vulu okukala a kundathana konyala nomuntu kehe gwomongundu. Shika otashi kwathele iilyo yekonakono lyembo yi kale yi uvite ya manguluka okuya kuye uuna ya taalelwa komamakelo nenge uuna ya pumbwa etsomukumo. — Jes. 32:2.

³ Omutonateli gwekonakono lyembo oha kambadhala okuladhipika ayehe mongundu ya kuthe ombinga mekonakono. Omukalo gumwe oku shi ninga ogwo okuninga ekonakono momukalo gwohenda nogwombili ontalala. (1 Tes. 2:7, 8) Oha kongo omikalo dhokukwatela mo ayehe moonkundathana, mwa kwatelwa aanona. Ngele yamwe oya tila okuyamukula, ota vulu oku ya kwathela paumwene mokuninga nayo elongekidho komeho yethimbo opo ya leshe omanyolo nenge ya yamukule okatendo kontumba. Nenge ota vulu oku yu ulukila nkene ye na okuyamukula noohapu dhawo yene.

⁴ Ngele omupeha gwomutonateli gwekonakono lyembo omuyakuligongalo, omutonateli na ninge elongekidho naye a kale ha kwatele komeho ekonakono lumwe konima yoomwedhi mbali kehe. Shika otashi pitike omutonateli a kale ta tala omupeha noku mu pe omaetopo taga kwatha. Kali shi tuu elongekidho ewanawa okukwathela aamwatate ya hwepopaleke uunkulungu wawo wokulonga! — Tit. 1:9, NW.

⁵ Miilonga yomomapya: Shimwe shomiinakugwanithwa ya simanenena yomutonateli gwekonakono lyembo osho okukwatela komeho mokuuvitha evaangeli. (Num. 27:16, 17) Oha ningile ongundu omalongekidho ge na oshilonga gokugandja uunzapo noha kambadhala okukwathela ayehe mboka ye li mongundu ya kale ye uvite elago muukalele wawo. (Ef. 4:11, 12) Opo a tsakanithe shika, ohe shi ningi elalakano lye okulonga pamwe noshilyo kehe shomongundu. Oha longele wo kumwe nomutonateli gwiilonga mokuninga elongekidho opo mboka ya hala ya ninge ehwepopalo miinima yontumba yuukalele wawo ya kwathelwe kaauvithi mboka ye na owino oundji.

⁶ E li ongomusita omunahole: Omutonateli gwekonakono lyembo oku na ko nasha naamboka molwoonkalo dhawo taya wapa owala okukutha ombinga onshona miilonga yokuuvitha. Oha shilipaleke opo mboka taya ngambekwa kuukulupe nenge ihaaya vulu okupita mo nosho wo mboka ye na omangambeko gopokathimbo molwashoka taye ehama sha kwata miiti nenge ye ehamekwa unene kusha ya kale ye shi kutya opu na elongekidho ndyoka tali ya pitika ya lopote ethimbo lyiilonga yawo yomomapya ominute 15 ngele itaya wapa okulopota owili yu udha momwedhi gumwe. (Okomitiye yIilonga yEgongalo ohayi tokola kutya olye a gwana oku shi ninga.) Oku na ko wo nasha naamboka ya tulwa kongundu ye tashi vulika ihaaya longo we momapya noha kambadhala oku ya kwatha ya tamekulule okulonga pamwe negongalo. — Luk. 15:4-7.

⁷ Inatu nyanyukwa tuu omolwohokwe ndjoka hayi ulikwa kaatonateli yekonakono lyembo! Eitulomo lyopaumwene ndyoka haya gandja otali kwathele ‘ayehe ya thike mehangano limwe omeitaalo, ya thike kegwano lyuukuluntu waKristus.’ — Ef. 4:13.