“Kaleni mu shi kupandula”
1 Eshi Jesus a li a velula ovanashilundu omulongo, omunashilundu ashike umwe a li a alukila kuJesus e mu pandule. Jesus okwe mu pula a ti: “Hamulongo ovo va velulwa? Venya 9 ove li peni?” (Luk. 17:11-19) Inashi wana ashike okukala tu na olupandu omolwoipewa iwa neeshali da wanenena odo Tate yetu womeulu omunahole nomuyandji, Jehova Kalunga, e tu pa, ndele osha fimana oku shi ulika pailonga kutya otu na olupandu shili. — Kol. 3:15; Jak. 1:17.
2 Otu na omatomheno elipi okupandula Jehova? Otu na omatomheno mahapu okupandula Jehova. Pashihopaenenwa, otu na oshikolo shokupandula Jehova omolwoshali inenenene oyo a yandja kovanhu, ekuliloyambo. (Joh. 3:16) Otu na yo etomheno liwa lokupandula Jehova eshi e tu nanena kuye. (Joh. 6:44) Natango, ohatu dulu oku mu pandula omolwoukumwe wetu wopaKriste. (Eps. 133:1-3) Nopehe na omalimbililo, oto dulu okudiladila natango keeshali dikwao dihapu odo Jehova e tu pa. Inatu dimbwa nandenande oilonga oyo Jehova e tu longela, ngaashi Ovaisrael ovo va li vehe na olupandu va ningile! — Eps. 106:12, 13.
3 Ulika kutya ou na olupandu: Nonande ovanashilundu aveshe omulongo ova li va hafa eshi va velulwa kuJesus, umwe aeke a li a ulika olupandu laye. (Luk. 17:15) Sha faafana, nafye ohatu dulu okuulika olupandu letu mokukala hatu kufa ombinga moukalele nouladi. Ngeenge otu na shili olupandu omolwoinima oyo Tate yetu omunahole e tu ningila, omitima detu otadi ke tu linyengifa tu hopaenene ohole yaye noikala yaye yokuyandja mokuhepaululila vamwe kombinga yaye. (Luk. 6:45) Kakele kaasho, eshi hatu hepaululile vamwe kombinga ‘yoikumwifilonga yaJehova neemhangela daye di na sha nafye,’ ohole yetu yoku mu hola nolupandu letu otai ka nenepala. — Eps. 40:6.
4 Kwafela vamwe va kale ve na olupandu: Otu na okukwafela ovana vetu nosho yo ovakonakonimbibeli vetu va kale ve na olupandu. Ope na eemhito dihapu odo ovadali tava dulu okulongifa opo va kwafele ovana vavo. Pashihopaenenwa, otava dulu oku shi ninga ofimbo tava hafele okutala oushitwe waJehova pamwe novana vavo. (Rom. 1:20) Ngeenge hatu konakona Ombibeli novakonakonimbibeli vetu, ohatu dulu oku va pula kutya, “Oshinima eshi otashi tu hongo shike kombinga yaJehova?” Apa ngoo pe fike olupandu lomukonakonimbibeli tali kulu, opo ngoo tapa ka kala pe fike ohole yaye yokuhola Kalunga nota ka kala a tokola toko oku mu hafifa.
5 Momafiku aa axuuninwa, ovanhu vahapu kave na olupandu. (2 Tim. 3:1, 2) Ihashi hafifa tuu Jehova ngeenge ta tale ovapiya vaye ve mu liyapulila tava ulike olupandu lavo mokukufa ombinga moukalele nouladi! — Jak. 1:22-25.