‘Natu shikuleni oshikoti shaKristus’
1. Oshike tashi ke tu kwafela tu kale ovakalele ovanekeka?
1 Jesus ka li a hongwa meefikola doorabbi. Ndele nande ongaho, oye a li Omukalele munenenene mondjokonona yovanhu. Opo nafye tu kale ovakalele ovanekeka, otu na ‘okushikula oshikoti shaye.’ (1 Pet. 2:21) Lao linene, otu na Omishangwa odo tadi hepaulula kombinga youkalele waJesus, odo tadi dulu oku tu kwafela tu lihonge koshihopaenenwa shaye notu mu shikule filufilu.
2. Oshike tashi ke tu kwafela tu kulike ohole yokuhola ovanhu ngaashi oyo Kristus a li e na?
2 Ulika kutya ou hole ovanhu: Jesus okwa li e linyengifwa kohole yaye yokuhola ovanhu opo a wanife po oukalele waye. Okwa li e na ko nasha navo. (Mark. 6:30-34) Ovanhu vahapu ovo ve li moitukulwa oyo hatu udifile ove li mouyahame munene oo tau yelekwa nomufimba e li ‘mefeto lokudala,’ nomolwaasho ova pumbwa neenghono okuuda oshili. (Rom. 8:22) Ngeenge otwa diladila keenghalo davo di etifa onghenda nosho yo kokunakonasha navo kwaJehova kwopahole, otashi ke tu linyengifa tu kale ovadiinini moilonga yetu yokuudifa. (2 Pet. 3:9) Kakele kaasho, ovanhu otave ke linyenga nawa ketumwalaka letu, ngeenge ova mono kutya otu na ko nasha navo shili.
3. Jesus okwa li ha udifa peemhito da tya ngahelipi?
3 Longifa omhito keshe: Jesus okwa li ha longifa omhito keshe opo a udifile ovanhu onghundana iwa. (Mat. 4:23; 9:9; Joh. 4:7-10) Sha faafana, nafye otu na okukala twe lilongekida okuhepaululila ovanhu oshili pomhito keshe, nonande otu na omalipyakidilo akeshe efiku. Ovaudifi vamwe ohava i nEembibeli davo nosho oyo oileshomwa yonhumba koilonga, keefikola, ngeenge tava i momalweendo ile ngeenge tava ka landa oinima keefitola ile keshe tuu opo tava i.
4. Ongahelipi hatu dulu okuyukifa elitulemo kOuhamba, oo u li enenediladilo leudifo letu?
4 Yukifa elitulemo kOuhamba: Enenediladilo leudifo laJesus ola li onghundana iwa yOuhamba. (Luk. 4:43) Nonande otashi dulika tuha tumbule Ouhamba metwalemo letu, otu na okukwafela omuneumbo a mone kutya Ouhamba waKalunga oo auke ekandulepo lomaupyakadi ovanhu. Itashi tu imbi tu popye kombinga yeenghalo dii odo tadi ulike kutya otu li momafiku axuuninwa. Ndelenee, otu na okuyukifa elitulemo unene ‘kokuudifa eenghundana diwa.’ — Rom. 10:15.
5. Ombibeli otai ke tu kwafela ngahelipi opo tu kale ovakalele ovanekeka?
5 Longifa alushe Eendjovo daKalunga: Jesus okwa li ha longifa alushe Omishangwa moukalele waye. Ka li ha hongo oinima yaye mwene. (Joh. 7:16, 18) Okwa li he lipalula nEendjovo daKalunga nokwa li he di longifa alushe opo e lipopile komaponokelo aSatana. (Mat. 4:1-4) Otwa pumbwa okukala hatu lesha Ombibeli keshe efiku nokutula moilonga osho hatu lihongo opo tu dule okuhonga vamwe nawanawa. (Rom. 2:21) Ngeenge hatu nyamukula omapulo ovanhu moukalele, otu na okutofa omishangwa mOmbibeli opo tu yambidide oitwa oyo hatu yelifa. Natu leshe omishangwa odo odikilila okudja mOmbibeli, ngeenge otashi shiiva. Otu na okuulikila omuneumbo kutya osho hatu popi kashi fi omadiladilo etu vene, ndele osho hatu popi oshe likolelela kEendjovo daKalunga.
6. Jesus okwa li ha hongo monghedi ya tya ngahelipi opo a dule okuhanga omitima dovapwilikini vaye?
6 Lalakanena okuhanga omitima daavo to hongo: Ovapiya vonhumba ovo va li va tumwa va ka kwate po Jesus, ova li va dja ko eenyala dongaho. Eshi va pulwa kovapristeri ovakulunhu nokOvafarisai kutya omolwashike inava kwata po Jesus, ova nyamukula tava ti: “Kapa li omunhu noshito, a popya ngaashi winya ta popi.” (Joh. 7:46) Osho otashi ulike kutya Jesus ka li ashike ha udifa ta yandje omauyelele, ndele okwa li ha hongo monghedi oyo tai kumu ovanhu komitima. (Luk. 24:32) Okwa li ha longifa omafaneko oo e likolelela koinima oyo ovanhu ve shii nawa, naasho osha li hashi ningifa etumwalaka laye li kale lipu okuudiwa ko. (Mat. 13:34) Jesus ka li ha ndubile ovapwilikini vaye ouyelele muhapu pefimbo limwe. (Joh. 16:12) Okwa li ha yukifa elitulemo lovanhu kuJehova, ndele hakuye mwene. Ngaashi Jesus, nafye ohatu dulu ashike okuninga ovahongi ovanekeka ngeenge otwa kala alushe hatu ‘pashukile enongeko letu,’ sha hala okutya okuhonga kwetu. — 1 Tim. 4:16.
7. Omolwashike Jesus a li omudiinini moukalele waye?
7 Kala omudiinini nonande ope na omapataneko naavo vehe na ko na sha: Nonande Jesus okwa li ha longo oikumwifilonga, haaveshe va li va tumbula ko etumwalaka laye. (Luk. 10:13) Nokuli novapambele vaJesus ova li tava diladila kutya “ota i eenghwengu.” (Mark. 3:21) Ndele nande ongaho, Jesus okwa kala omudiinini moukalele. Okwa li ha kala alushe e na omukumo, molwaashi okwa li e na oushili kutya oshili oyo a li ta hongo ovanhu oya li tai dulu oku va mangulula. (Joh. 8:32) Nafye otu na okukala twa tokola toko tuha fye ounye. (2 Kor. 4:1) Natu kale twe lineekela kutya Jehova ote tu kwafele.
8, 9. Ongahelipi hatu dulu okuninga omaliyambo omolwonghundana iwa ngaashi Jesus a li a ninga?
8 Natu ningeni omaliyambo oo a pumbiwa opo tu wanife po oukalele wetu pauyadi: Jesus okwa li a yamba po omhito yokukala nonghalamwenyo youdjeko opo a wanife po oukalele waye pauyadi. (Mat. 8:20) Okwa li ha udifa nopehe na olufuwo. Omafimbo amwe okwa li ha udifa fiyo etango la toka. (Mark. 6:35, 36) Jesus okwa li e shii kutya efimbo laye lokuwanifa po oshilonga osho ola ngabekwa. Onghee hano, nafye otu na okuhopaenena Jesus, molwaashi ‘efimbo olo la xupa ko olixupi.’ Otu na okuyamba po efimbo letu, eenghono detu nosho yo oiniwe yetu opo tu wanife po oukalele wetu pauyadi, ngaashi Jesus. — 1 Kor. 7:29-31.
9 Ovakriste vomefelemudo lotete ova li ovakalele ovanekeka, molwaashi ova li ve lihonga koshihopaenenwa shaJesus. (Oil. 4:13) Nafye ohatu dulu okuwanifa po oukalele wetu pauyadi, ngeenge otwa shikula oshikoti shOmukalele munenenene mondjokonona yovanhu. — 2 Tim. 4:5.