Ompito yokulya pambepo nokunyanyukwa
1. Ongiini Jehova ha sile oshimpwiyu oompumbwe dhopambepo dhaapiya ye?
1 Jehova oha sile oshimpwiyu nohole oompumbwe dhopambepo dhaapiya ye. Omanga aantu oyendji muuyuni taya si ondjala pambepo, tse ohatu paluthwa nawa pambepo. (Jesaja 65:13) Omukalo gumwe ngoka Jehova he tu palutha pambepo ogwo okupitila miigongi yiitopolwa yokomumvo. Mbela oto ningi omalongekidho opo wu ka kale omasiku agehe poshigongi shoshitopolwa “Natu wilikweni kombepo yaKalunga”? Otwa longekidhilwa oshituthi shi na iikulya iitoye notayi tungu pambepo.
2. Oshike sha kwatelwa mokwiilongekidhila oshigongi kuyele?
2 Ninga omalongekidho kuyele: “Oompangela dhomunandjungu otadhi mu etele eliko.” (Omayel. 21:5) Onkee ano, manga inoo mana okuninga omalongekidho wu ka kale poshigongi omasiku agehe gatatu, ino kala inoo pula omugandji gwiilonga gwoye e ku pe ethimbo lyokuya koshigongi. Ngele owa pumbwa ehala lyokulala, mbela owe li konga nale? Ninga wo omalongekidho ge na ko nasha nomwiha opo wu vule okulila pamwe naamwaho poshigongi. Ninga omalongekidho wu thike kuyele poshigongi esiku kehe opo wu mone ehala lyokukuutumba nokwiimba eimbilo lyopetameko nokukala pegalikano.
3. Otu na okuninga omalongekidho tu ka zale omizalo dha tya ngiini?
3 Otwa hala okushilipaleka kutya omizalo ndhoka tatu ka zala odhi shi okutalwa nodha yogoka. (1 Tim. 2:9, 10) Oshigongi shOshitopolwa ohashi tu pe oompito oombwanawa okugandja uunzapo kaantu yopomudhingoloko. Ngele tatu zala momukalo gu shi okusimanekwa manga tu li moshitopolwa moka tamu ningilwa oshigongi nokukala twa zala uukalata wetu woshigongi, otatu ki imonikila mo mwaamboka kaaye shi ooitaali notashi inyengitha mboka taye tu tala.
4. Oshike tashi ke tu kwathela nosho wo omaukwanegumbo getu tu mone uuwanawa mopolohalama?
4 Pulakena nawa: Inatu hala nando tu pitililwe po kuuyelele mboka tatu pewa poshituthi shika shopambepo. (Omayel. 22:17, 18) Okulandula mOmbiimbeli yetu sho omanyolo taga leshwa nokuninga omaidhimbulukitho paufupi, otashi ke tu kwathela tu kaleke opolohalama momadhiladhilo nokuyanda omapiyaganeko. Opo nduno kongulohi otatu vulu okulongitha omaidhimbulukitho getu okukundathana nayalwe iitsa yimwe yopolohalama mbyoka ya simana. Oomvula opo dha zi ko osha li sha monika kutya aagundjuka yamwe ohaya kuutumba pamwe poshigongi nohaya kala taya popi pethimbo lyopolohalama nenge tayi itumine omatumwalaka koongodhi dhopeke. Ngele otu na aanona, mwa kwatelwa aagundjuka yoomvula omulongo nasha, otashi ka kala shi li nawa ya kuutumbe putse nokupulakena kopolohalama tu li uukwanegumbo pehala lyoku ya etha ya kuutumbe paagundjuka ooyakwawo.
5. Ongiini tatu ka tamununa mo okunyanyukilwa oshigongi?
5 Nyanyukilwa eendathano: Iikulya ohayi kala iitoye noonkondo ngele tayi liwa pamwe nookuume. (Omayel. 15:17) Sha faathana, okweendathana kwetu naamwatate naamwameme ohaku tu nyanyudha noonkondo poshigongi. Onkee ano, manga omutumba inaagu tameka nopehulilo lyago, itashi ka kala tuu shi li nawa okupopitha yalwe nokunyanyukilwa eendathano! (Eps. 133:1) Uuna omunashipundi te tu pula nesimaneko tu kuutumbe manga omusika inaayi tameka, otu na okuhulitha oonkundathana dhetu e tatu kuutumba opo opoloholama yi tameke.
6. Gandja oshimoniwa shopaumwene nkene tatu vulu okugandja uunzapo kaantu yomoshitopolwa moka tamu ningilwa oshigongi.
6 Longitha ompito kehe wu gandje uunzapo: Iigongi ohayi tu pe oompito oombwanawa dhokugandja uunzapo. Aanashigongi oyendji mboka haya ka lya koorestolanda konima yopoloholama ohaya pulwa kaayakuli nokuyalwe kombinga yoshipalanyolo shoshigongi shoka shi li kuukalata wawo. Shika ohashi ya fala moonkundathana nokugandja uunzapo kombinga yoshili. Yamwe mboka ya li ya pula oya li ya hiywa noye ya koshigongi.
7. Omolwashike tu na okukala poshigongi shoshitopolwa shoka tashi ya?
7 Oowili omayuvi odha longithwa okulongekidha opolohalama yoshigongi, omahala giigongi, okuunganeka iikondo yoshigongi nokulongekidha iipopiwa. Omalongekidho agehe ngoka ga ningwa mokulongekidha oshituthi shika shopambepo otagu ulike esiloshimpwiyu lyopahole lyaJehova ndyoka e nine oshigwana she. Atuhe natu kale po opo tu ilonge oshindji. Ngele tatu shi ningi, otatu ka ‘ligolela enyanyu lyokomwenyo,’ noitatu ka kala ngaashi aantu yuuyuni. — Jes. 65:14, OB-1954.
[Oshimpungu pepandja 4]
Omadhimbulukitho kombinga yoshigongi shoshitopolwa
◼ Ethimbo lyokutameka: Opolohalama otayi tameke po 9:00 gwongula omasiku agehe gatatu. Ngele omusika ya tameke, atuheni otu na okukuutumba opo opolohalama yi vule okutameka nziya. MEtitano nOmolyomakaya opolohalama otayi ka hula po 4:15 komatango nomOsoondaha opo 3:20.
◼ Opaakinga: Pomahala agehe giigongi omahala gokuthikama iihauto otaga ka kala metonatelo, kehe gumwe ota ka thikama pehala mpoka tu ulukilwa noitaga ka yalekwa. Mboka taya ka paakinga mehala moka tamu ningilwa oshigongi, otaya ka pulwa yu ulike uukalata woshigongi.
◼ Omahala gokukala: Aauvithi mboka ya pumbwa ehala lyokukala otaya ka pewa yu udhithe ofooloma hayi ithanwa Room Request ya kongelwe ehala. Okomitiye yIilonga mEgongalo oyi na okutala ngele aauvithi oya gwanitha po iipumbiwa mokulongitha omalombwelo ngoka ge li mofooloma moka nosho wo montumwafo yo 15 Juli 2008 ndjoka ya nyolelwa olutu aluhe lwaakuluntugongalo. Esiloshimpwiyu ndika otali pewa owala aauvithi mboka ye na edhina ewanawa nosho wo aanona yawo mboka hayi ihumbata nawa.
◼ Okundeekela yalwe omahala gokukuutumba: Omahala gokukuutumba otaga vulu owala okuthigilwa mboka we enda pamwe nayo mosheenditho shimwe nenge mwa kala megumbo limwe.
◼ Omwiha: Etelela omwiha gwoye opo kuu ka thige po ehala lyoshigongi pethimbo lyomwiha wu ka konge iikulya. Longitha okandjato okashona kokukaleka iinima ya talala hoka taka vulu okutulwa kohi yoshipundi shoye. Oondjato onene dhokukaleka iinima ya talala dhomaukwanegumbo odhi na okupungulwa mpoka to ulukilwa kaayakuli yehala. Iikwatelwa yiikwamakende nosho wo iikolitha inayi pitikilwa mehala lyoshigongi.
◼ Omayambidhidho: Otatu vulu okuulika kutya otwa pandula elongekidho lyoshigongi mokugandja nehalo ewanawa omayambidhidho ge na ko nasha niilonga yeuvitho muuyuni auhe kOshinyanga shetu shUukwaniilwa nenge koshigongi. Ngele owa hala okuyambidhidha notyeke, shilipaleka nOkomitiye yOshigongi kutya openi wu na oku yi tumina.
◼ Uuna gumwe a pumbwa ekwatho lyopaunamiti lyomeendelelo: Ngele poshigongi opu na gumwe a pumbwa ekwatho lyopaunamiti lyomeendelelo, mona nziya aayakuli mboka ye li popepi, opo ya tseyithile mbala mboka taya kwathele okugandja ekwatho lyotango nokutala kutya uupyakadhi owa kwata miiti shi thike peni.
◼ Uutemba wokulonga aanona okweenda niipundi hayi gonywa: Uutemba wokulonga aanona okweenda niipundi hayi gonywa kayi na okweetwa mehala lyoshigongi. Ihe uutemba mboka wokukuutumba aanona ya mangelwa mo owa pitikwa okukala ontega naavali.
◼ Omagadhi gokwiishasha: Iigongi yimwe ohayi ningilwa momahala kaage na omakende hamu longithwa omashina gokugandja ombepo. Onkee ano, oshi li nawa ngele itaatu longitha omagadhi gokwiishasha nogokugwaya nosho wo kehe shimwe shi na ezimba li na oonkondo ndyoka tali vulu okuninga nayi mboka ye na uupyakadhi wokufudha nenge omaupyakadhi galwe. — 1 Kor. 10:24.
◼ Oofooloma dhokulandula omuntu: Ofooloma hayi ithanwa Please Follow Up (S-43) oyi na okulongithwa okugandja uuyelele wu na ko nasha nakehe ngoka u ulika ohokwe omolwokupewa uunzapo wontukuluka pethimbo lyoshigongi. Aauvithi oye na okweetelela yimwe nenge mbali koshigongi. Oofoloma dhu udhithwa odhi na okugandjwa kondunda yomambo nenge kuamushanga gwegongalo ngele wa galuka koshigongi. — Tala Uukalele wUukwaniilwa waApilili 2005 (wOshiingilisa), epandja 5.
◼ Oorestolanda: Simanekitha edhina lyaJehova mokwiihumbata nawa poorestolanda. Pomahala ogendji oshi li omukalondjigilile okugandja olupandu lwokamaliwa koopersenda 10 sigo 15, shi ikolelela keyakulo.
◼ Omaimbilo: Otaga vulu okwiilongekidhwa komeho yethimbo.
Omaimbilo gomEtitano: 190, 79, 42, 57, 157 nosho wo 191.
Omaimbilo gomOlyomakaya: 215, 123, 207, 46, 3, nosho wo 10.
Omaimbilo gomOsoondaha: 163, 209, 4, 98, 8 nosho wo 212.