Oshimhungu shomapulo

◼ Mbela osha yuka ngoo kOndombwedi yaJehova oku ka hakulwa moipangelo ile okufilwa oshisho momaumbo ovakulupe oo e li mepashukilo longeleka, ile tu tye lelongelokalunga?

Omalongelokalunga mahapu ohaa pashukile oipangelo ile omaumbo oo haa file oshisho ovakulupe. Eenhele da tya ngaho inadi nuninwa lela okuxumifa komesho omalongelokalunga aBabilon Shinene. (Eh. 18:2, 4) Otashi dulika pehovelo da li da tungwa nelalakano lokweetela elongelokalunga lonhumba ile longadi oyuuyemo, ndele kunena, oipangelo imwe otashi dulika i kale yelongelokalunga ashike edina. Imwe otashi dulika hai pashukilwa ashike kovawiliki velongelokalunga vanini.

Ngeenge Ondombwedi yaJehova otai diladila oku ka hakulwa koshipangelo ile oku ka filwa oshisho komaumbo ovakulupe, oi na okutokola kuyo vene kutya otai ka hakulwa ile otai ka filwa oshisho konhele oyo tashi dulika i na ekwatafano nelongelokalunga ile hasho. Otashi dulika eliudo laumwe li mu pitike, ndele eliudo laumwe otashi dulika lihe mu pitike. (1 Tim. 1:5) Otashi dulika eenghalo donhumba di kume etokolo lomunhu, noshiwa okudiladila kombinga yeenghalo da tya ngaho.

Pashihopaenenwa, otashi dulika oshipangelo ile eumbo lovakulupe olo li li popepi nanye elela oli na ekwatafano nelongelokalunga. Ile nonande ope na oshipangelo shimwe vali ile eumbo lovakulupe limwe vali olo li li popepi nanye, otashi dulika oshipangelo osho shi na ekwatafano nelongelokalunga osho hashi yandje ouhaku muwa. Oshipangelo shongeleka otashi dulika osho ashike shi na ouhaku oo wa pumbwa ile otashi dulika ndokotola woye ile omutandi woye ta dulu ashike oku ku hakulila ile oku ku tandela moshipangelo osho. Peemhito dimwe, oipangelo ya tya ngaho, otashi dulika i kale ya fimaneka etaleko lOvakriste li na sha nokuhatulwa ohonde, ofimbo oipangelo yopaumwene ile yepangelo tashi dulika i kale inai fimaneka omufika oo wopaKriste. Onghee hano, ope na oinima ihapu oyo omunhu tashi dulika a pumbwa okudiladila kuyo ofimbo ina fika pexulifodiladilo kutya ota i koshipangelo shilipi ile keumbo lovakulupe oko ta ka filwa oshisho.

Ngeenge owa tokola okuya koshipangelo ile keumbo lovakulupe olo li na ekwatafano nelongelokalunga, oto dulu oku shi tala ko kutya ove oto futu ashike ouhaku ile efiloshisho olo to pewa. Oto dulu yo okutala ko onhele oyo tai pashukilwa kelongelokalunga i li ngaashi ongeshefa. Onghee hano, eshi to futu ouhaku ile efiloshisho olo to pewa, inashi hala okutya oto yambidida pashimaliwa elongelokalunga loipupulu. Ove oto futu ashike oikwa noipangifo ile eyakulo olo to pewa.

Ashike Omukriste oo a hoolola oku ka hakulwa ile oku ka filwa oshisho konhele oyo i li mepashukilo lelongelokalunga oku na okuhenuka filufilu okukufa ombinga moinima oyo i na sha nelongelokalunga loipupulu. Natango, ke na okwiifana ovanailonga ile ovo hava talele po monhele omo nomadinafimaneko opalongelokalunga ngaashi, “Pastoli,” “Pata,” ile “Sestela.” (Mat. 23:9) Ou na ashike okuungaunga novanhu ovo pamufika wongeshefa shi na sha nouhaku ile eyakulo olo tave ku pe.

Ngeenge owa nangekwa meembete, oshiwa okupopya kutya ove Ondombwedi yaJehova nonokutya owa hala okukala to talelwa po kovakulunhuongalo veongalo lEendombwedi olo li li moshitukulwa osho. Kungaho, oto ka mona efiloshisho liwa lopamhepo ofimbo u li meembete. — 1 Tes. 5:14.

Ovapambele ovo ve li Eendombwedi, nosho yo ovakulunhuongalo novakwaneongalo ove na okukala hava file oshisho pamhepo ovamwatate novamwameme ovanamido ovo ve li momaumbo ovakulupe, unene tuu ovo ve li momaumbo oo e li mepashukilo lelongelokalunga. Osho otashi ka twa filufilu omukumo ovanamido va tya ngaho notashi ke va kwafela vaha kufe ombinga melongelokalunga inave shi didilika ile momadano omafiku ile moinima ikwao i na sha nelongelokalunga oyo hai ningwa meenhele odo.

Keshe umwe oku na okudiladila koitwa nokeenghalo odo da kundafanwa metetekelo nokutokola paumwene kutya ota ka konga ouhaku koshipangelo shilipi ile ota ka filwa oshisho keumbo lovakulupe la tya ngahelipi. — Gal. 6:5.