“Itsikeni ondjoko yandje”
1 Muuyuni mbuka wu udha omathiminiko niimpwiyu oyindji, otatu vulu okumona epepelelo lyolela ngele tatu pulakene koohapu dhaJesus tu itsike ondjoko ye ndjoka tayi tu etele evululuko nenge etalaleko. (Mat. 11:29, 30) Okwiitsika ondjoko nokuninga omulongwa osha kwatela mo okukutha ombinga miilonga mbyoka yi li eshongo, ihe otayi eta wo etalaleko. Iilonga mbyoka oya kwatela mo okuuvitha onkundana ombwanawa yUukwaniilwa nokukwathela yalwe ya mone etalaleko pamwe natse ngele yi itsike ondjoko ompu yaJesus. — Mat. 24:14; 28:19, 20.
2 Etalaleko tali zi muukalele: Jesus ina pula nando aalanduli ye ya humbate sha kakele owala kwaashoka a li te ke ya pa. Okwa li e ya pula opo ye ethe po omitengi dhawo ndhoka omidhigu e taya itsike gwe ngoka omupu. Onkee ano, inatu gwilililwa po kiimpwiyu oyindji nosho wo kokwaahe na etegameno konkalelo ndjika noinatu lalakanena uuyamba mboka tawu hulu po. (Luk. 21:34; 1 Tim. 6:17) Nonando otwi ipyakidhila notu na okulonga opo tu mone iipumbiwa yesiku kehe, otwa lenga okulongela Kalunga monkalamwenyo yetu. (Mat. 6:33) Ngele otu na etaloko li li nawa kombinga yaashoka sha simana, nena uukalele otawu ka kala aluhe etalaleko kutse, ihe hamutengi nando. — Fil. 1:10.
3 Oshi li paunshitwe okupopya kombinga yaashoka tu hole unene. (Luk. 6:45) Aakriste ayehe oye hole unene Jehova nUukwaniilwa we mboka tawu ke eta omalaleko nuuyamba ngoka u uvaneka. Kashi li tuu etalaleko ngele tatu popi kombinga ‘yelaka etoye’ nokudhimbwa iimpwiyu yetu yakehe esiku uuna tu li muukalele! (Rom. 10:15) Odhoshili kutya ohatu kala tu shi nawa oshilonga noku shi nyanyukilwa ngele ohatu tu shi longo iikando oyindji. Onkee ano, ngele otashi vulika natu longithe ethimbo olindji muukalele notashi ke tu etela etalaleko lya gwedhwa po. Kashi li tuu ehekeleko uuna yamwe tayi inyenge nawa keuvitho lyetu! (Iil. 15:3) Ngele tatu tsakaneke aantu mboka kaaye na ohokwe yetumwalaka lyetu nenge taye tu pataneke, uukalele otawu ke tu talaleka pambepo ngele otu shi shi nokutya oonkambadhala dhetu otadhi nyanyudha Jehova notatu ka mona iizemo iiwanawa omolwomalaleko nuuyamba ge. — Iil. 5:41; 1 Kor. 3:9.
4 Mokutaamba ko ehiyo lyaJesus, otatu ka nyanyukilwa uuthembahenda wokulonga pamwe naye tu li Oonzapo dhaJehova. (Jes. 43:10; Eh. 1:5) Kapu na we etalaleko lilwe li vulithe ndyoka.