Natu twikileni okuudifa nopehe na okweefa
1 Omafimbo amwe, otashi dulika tu kale tu udite kutya oshitukulwa shetu omo hatu udifa osha longwa lwoikando ndele ovanhu ihava pwilikine naanaa. Ndele nande ongaho, ope na omatomheno a fimanenena molwaashi tu na okutwikila okuudifa. — Mat. 28:19, 20.
2 Evangeli oli na okuningila oiwana aishe ondombwedi: Jesus okwa li a xunganeka kutya oilonga yokuudifa Ouhamba otai ka kala oshitukulwa sha fimana shedidiliko ‘lefimbo lexulilo longhalelo yoinima’ nonokutya evangeli lOuhamba ola li tali ka udifwa “li ningile oiwana aishe ondombwedi.” (Mat. 24:3, 14, yelekanifa NW.) Ohashi yandje oundombwedi wa kola ngeenge ovanhu ve tu wete hatu udifa onghundana iwa yOuhamba. Konima ngeenge twa fiya po oshitukulwa omo twa li hatu udifile, ovanhu vamwe ohava kala tava kundafana kombinga yetalelepo letu oule wefimbo lonhumba ile oule womafiku, nokuli nonande inava tambula ko etumwalaka letu. Okukala tu udite ko omatomheno kutya omolwashike hatu i moukalele otashi ke tu kwafela tu twikile okulonga noudiinini. Ohashi hafifa Jehova eshi hatu dana onghandangala mokuwanifwa kwomaxunganeko Ombibeli, eshi hatu yandje oundombwedi nosho yo etumwalaka lelondwelo. — 2 Tes. 1:6-9.
3 Natu longeni noudiinini: Otwa pumbwa okulonga noudiinini opo tu kulike ohokwe yaavo hatu udifile, molwaashi ope na oinima ihapu oyo tai dulu oku va piyaaneka nokumana po efimbo lavo. Pashihopaenenwa, opa li omukainhu umwe oo kwa li ha talelwa po kEendombwedi oshivike keshe oule wodula, ndele ka li he di pitike di uye meumbo laye. Ndelenee efiku limwe, omukainhu oo okwa li a pitika Eendombwedi di uye meumbo laye opo di kundafane naye shi na sha nOmbibeli. Okwa li a hafela neenghono eenghundafana odo nokwa li a tambula ko ekonakonombibeli. Okwa li yo a hovela okukala ha i kokwoongala, nokonima yefimbo lixupi okwa li a pula eninginifo.
4 Eenghalo mounyuni otadi lunduluka neendelelo, novanhu otava ende tava lundulula oikala yavo omolweenghalo odo tava shakeneke. Vahapu ovo va li inava hala okutambula ko etumwalaka letu monakudiwa, otashi dulika va ka tambule ko eteelelo letu tali hekeleke, olo hatu va hepaululile. Okulonga kwetu noudiinini otaku ti sha, molwaashi ope na ovanhu ovo tava tambula ko etumwalaka lOuhamba.
5 Ovanhu vahapu mounyuni otava ‘keme nokunyika oluhodi omolwoixuna aishe oyo tai ningwa.’ (Hes. 9:4) Ndelenee ope na oumbangi oo tau ulike kutya ovanhu ovo ve na oikala iwa otava tambula ko etumwalaka lOuhamba. (Jes. 2:2, 3) Onghee hano, natu twikileni ‘okuhepaululila ovanhu ondaka iwa’ nokulonga noudiinini moukalele nopehe na okweefa, hatu linyengifwa kohole. — Jes. 52:7; Oil. 5:42.