Uuna omunegumbo ta popi elaka lyi ili
1. Omolwashike pu na ompumbwe onene yokulongela kumwe miitopolwa mbyoka hatu longo?
1 Iikando oyindji, aauvithi yUukwaniilwa muuyuni ohaya tsakaneke aantu mboka ye na ohokwe haya popi elaka ndyoka ihaali longithwa megongalo lyomoshitopolwa. Opo ye ya kwathele pambepo, iitayimbelewa oyindji oyi wete sha pumbiwa opo pu totwe oongundu dhomalaka ngoka momagongalo. Molwashoka ohashi vulika moshitopolwa shontumba mu kale hamu popiwa omalaka ogendji, omagongalo ngoka haga popi omalaka ga yoolokathana otashi vulika gu uvithe moshitopolwa shimwe. Ongiini omagongalo taga ka longela kumwe opo ga shilipaleke kutya iilonga yokuuvitha otayi longwa melandulathano? — 1 Kor. 14:33.
2. Ongiini tatu vulu okulongela kumwe noongundu dhomalaka galwe nenge negongalo lyi ili moshitopolwa shetu, uuna tatu longo egumbo negumbo?
2 Elongelokumwe li li nawa: Uuna tatu longo iilonga yepandaanda nenge tatu gandja uunzapo wontukuluka, otu na okukala twa manguluka okupopya nakehe gumwe, mwa kwatelwa mboka haya popi omalaka gi ili noku pa omuntu kehe oshileshomwa melaka ndyoka a hala okulesha. Ihe uuna tatu longo egumbo negumbo miitopolwa mbyoka hayi longwa koongundu dhomalaka galwe nenge kegongalo lilwe, omuuvithi kehe oku na okusa oshimpwiyu opo a gandje eitulomo unene komagumbo ngoka mu na aantu mboka haya popi elaka ndyoka hali popiwa megongalo lyawo. Uuna omagongalo ga yoolokathana taga uvitha moshitopolwa shimwe, osha simana noonkondo opo ga ndhindhilike uukalata wiitopolwa mbyoka ya longwa. Aatonateli yiilonga yomagongalo ngoka ga kwatelwa mo oye na oku shi kundathana nokuunganeka oshitopolwa nawa momukalo ngoka tagu opalele aantu ayehe. (Omayel. 11:14) Ngele omuuvithi okwa tsakaneke gumwe ngoka ha popi elaka lyi ili miilonga yegumbo negumbo, ihe moshitopolwa kamu na egongalo li li popepi moka hamu popiwa elaka ndyoka, omuuvithi oku na okukambadhala a gandje uunzapo nokutsikila okukwathela omuntu ngoka ngele oku na ohokwe.
3. Otu na okuninga po shike ngele otwi iyadha tatu longo moshitopolwa shimwe naauvithi yongundu yelaka lyi ili nenge yegongalo lilwe?
3 Oshilonga shetu shimwe: Oshike shi na okuningwa po ngele aauvithi ya za komagongalo ga yoolokathana oyi iyadha tayu uvitha moshitopolwa shimwe pethimbo lya faathana? Odhoshili kutya ayehe otaya ka kala ye na ko nasha naantu mboka ye li moshitopolwa moka, nohole yOpakriste otayi ka sinda eyooloko kehe ndyoka li li po omolwomalaka. (Joh. 13:34, 35) Onkee ano, mboka taya kwatele komeho otaye ku ulika ondjele nohole mokutokola ngele ongundu yimwe otayi vulu oku ka longa koshitopolwa shilwe uule wokathimbo. — Jak. 3:17, 18.
4. Ehunganeko lini tali gwanithwa kunena?
4 Ombiimbeli oya hunganeka kutya aantu yomalaka ga yoolokathana otaye ku uvithilwa onkundana ombwanawa. (Eh. 14:6, 7) Ngele ayehe mboka ya kwatelwa mo otaya longele kumwe, otaya ka henuka okwiiyendulula naantu oyendji otaya ka uvithilwa onkundana ombwanawa mwa kwatelwa mboka haya popi omalaka gi ili. — Ef. 4:16.