Okwiilongekidha okwa pumbiwa opo tu ninge omaishunoko taga pondola
1. Omomukalo guni uukalele wopaKriste wopetameko wa li wa tamununwa mo?
1 Jesus okwa li a longekidha nawa aalongwa ye opo ya kale aauvithi taya pondola ‘yevaangeli lyUukwaniilwa.’ (Mat. 4:23; 9:35, KB) Okwa li e ya dheula owala sho ya li muPalestina. Ihe manga Jesus inaa londa megulu, okwa li e ya tseyithile kutya uukalele wopaKriste otawu ka tamununwa mo opo ‘aantu ayehe ya ningwe aalongwa.’ — Mat. 28:19, 20.
2. Oshike sha kwatelwa mokuvulika kelombwelo lyaJesus lyokuninga ‘aantu aalongwa’?
2 Iilonga mbyoka oya kwatela mo okushuna koohandimwe mboka yu ulika ohokwe monkundana ombwanawa yUukwaniilwa waKalunga noku ya longa okudhiginina ayihe mbyoka Kristus e ya lombwele. Opo tu ninge omaishunoko taga pondola, otwa pumbwa okwiilongekidha nawa.
3. Ongiini to vulu okuninga eishunoko komuntu ngoka wa tsakaneke oshikando shotango?
3 Ilongekidha komeho yethimbo: Aauvithi yamwe ohaya pula epulo konima yoonkundathana dhotango e tayu uvaneke kutya otaya ka galuka ye li yamukule. Oya mona kutya okulongitha embo Omalongo gOmbiimbeli okugandja eyamukulo sho taya ningi eishunoko oshe ya kwathela ya tameke ekonakonombiimbeli.
4. Omolwashike kaatu na okutegelela iifo iipe yi ye opo tu ninge omaishunoko?
4 Ngele otu na owala iifo yomwedhi gumwe itashi ti kutya otu na okutegelela sigo iifo yomwedhi tagu landula ye ya opo tu ninge eishunoko. Otashi vulika tu penduthe ohokwe yomuntu mokukundathana naye uuyelele mboka wu li miifo mbyoka e na nale.
5. Uuwanawa washike hawu zi mokukala nelalakano uuna tatu ningi eishunoko?
5 Kala wu na elalakano: Omanga inoo ninga eishunoko, longitha ominute dhontumba okutala mpoka ho ningi omandhindhiliko nokutokola shoka wa hala okuninga. Pashiholelwa, kundathana naye moshileshomwa shoka wa li we mu thigile. Nenge mu thigila oshileshomwa shilwe tashi popi kombinga yaashoka mwa kundathana nale. Ngele oshikando sha zi ko owa pulile epulo, elalakano lyoye limwe otali ka kala oku li yamukula. Uuna to tsu omuthindo enyolo ndyoka tali yamukula epulo, kambadhala oku li lesha mOmbiimbeli.
6. Elalakano lyetu lyokuninga omaishunoko olini?
6 Elalakano lyetu: Elalakano lyetu olyo okutameka ekonakonombiimbeli. Omumwatate gumwe okwa li a pula a tameke ekonakonombiimbeli sho a ningi eishunoko lyotango, ihe omulumentu okwa tindi. Omumwatate okwa li a shuna ko ishewe noshifo shoka opo sha piti e ta ti: “Nena otatu yamukula epulo limwe lya kankamena kOmbiimbeli.” Sho a pulakene ketyokosha lyomulumentu ngoka, omumwatate okwa lesha enyolo nokulongitha okatendo ta ka gandja uuyelele tawu opalele okuza moshileshomwa shoka hashi longithwa mokukonakona Ombiimbeli. Shoka osha fala mokukonakona Ombiimbeli pandjigilile.
7. Ongiini okwiilongekidha nawa kwe ku kwathela wu tameke ekonakonombiimbeli?
7 Otashi pula oonkambadhala nethimbo opo tu ilongekidhile omaishunoko. Ihe oku shi ninga otaku tu etele enyanyu olindji, notaku tu monitha uuthembahenda okukwathela gumwe ngoka ‘e na iikala iiwanawa’ a ka mone omwenyo gwaluhe. — Iil. 13:48, NW.